ဂင်္ဂါကမ်းက အလင်းတန်း
ဂင်္ဂါ ကမ်းခြေရဲ့ ညဆည်းဆာ ပုံရိပ်များ
သူသည် စိတ်အလိုမကျတဲ့ အခါ၊ စိတ်ဖိစီးမှုတွေ အဆမတန် အားကြီးလာတဲ့အခါ၊ လောကကြီးနဲ့  သူ အဓိပ္ပါယ်ကင်းမဲ့ သယောင်ယောင်ဖြစ်လာတဲ့အခါ ထွက်ပေါက်အဖြစ် ဂင်္ဂါမြစ်ကမ်းသို့ သာ အသောနှင်ခဲ့သည်က များလေသည်။
ရောက်စမှာတော့ သူ့ ရဲ့ စိတ်ကလေးတွေက ထွေပြားပျံ့ လွင့်နေခဲ့သည်။ လောကဇာတ်ခုံမှာ အူတူတူ၊ အတတ နိုင်နေဆဲပင်ဖြစ်သည်။ လောကဓံရဲ့ ရိုက်ခက်မှုကြောင့် ဒဏ်ရာတွေကလည်း ညိုမည်း ပုတ်ပွနေဆဲပင်။ ဂင်္ဂါမြစ်ကမ်းက သူရောက်တဲ့အခါတိုင်း ညင်ညင်သာသာ စီးဆင်းမှုဖြင့် သူ့ အားတရားပြကာ စီးကြိုလေတော့၏။ “စီးဆင်းနေတဲ့ ရေအလျဉ်လိုပဲ ပြီးတော့လည်း ပြီးသွားကြလိမ့်မယ်”တဲ့။
ဂင်္ဂါရဲ့ ကျေးဇူးကြောင့် သူရဲ့ စိတ်တွေ နုပျိုလန်းဆန်းလာသည်။ ပတ်ဝန်းကျင်ရဲ့ ရယ်သံ၊ မောသံတွေ အဓိပ္ပါယ် ပြည့်ဝ လာခဲ့ပြန်သည်။ တလောကလုံးကို ရင်ဆိုင်ဖို့  သတ္တိတွေ ရရှိလာခဲ့ပြန်သည်။ အရာအားလုံး သိမ်မွေ့ ပေါ့ပါးလာသလို ခံစားလာရပြန်သည်။ လောကကြီးတစ်ခုလုံးကို ဂင်္ဂါမြစ်ရဲ့ သန့် ရှင်း လတ်ဆက်သော လေပြည်လေညှင်းများလို ချိုမြိန်သော အရာများအဖြစ် မြင်ယောင်လာပြန်တော့သည်။
သူ့ ရဲ့ ဘ၀မှာ အမြတ်အနိုးဆုံးအရာ၊ တွယ်တာမှုအရှိဆုံးသော အရာတွေအဖြစ် တေးထားတဲ့ စာရင်းထဲမှာ ဂင်္ဂါမြစ်ကိုလည်း နေရာပေးမိပြန်သည်။ ဂင်္ဂါက ဘ၀နေ့ စွဲ အသစ်တွေ လှလှပပ သီကုံးဖို့ ရန်အတွက် မရှိမဖြစ်သလောက် လိုအပ်လာခဲ့သလို၊ လူမသိ၊ သူမသိ အလိုမကျလို့  ငိုချခဲ့ရတဲ့ မျက်ရည်စတွေ ခြေရာအဖြစ် မကျန်စေရေးအတွက် သူ့ ရဲ့ စီးဆင်းမှုတွေကိုလည်း လိုအပ်လာခဲ့သည်။ အခုနေများ ဂင်္ဂါမြစ်နဲ့  ကင်းပြီး အသက်ရှင်နေထိုင်ရမည် ဆိုလျင်လည်း နည်းနည်းတော့ လွမ်းဆွတ် တမ်းတမိဦးမှာ သေချာပါသည်။
ဘာပဲဖြစ်ဖြစ် ဂင်္ဂါနဲ့ အတူ နေရတဲ့ အခိုက်အတန့် လေးမှာတော့ အတိတ်က နာကျည်းမှုတွေကိုလည်း မေ့ထားနိုင်ခဲ့သည်။ ပစ္စုန်ပ္ပန်မှာလည်း ကြည်နူးမှုတွေ တ၀ကြီးရခဲ့တာ သေချာပါသည်။ အနာဂတ်ကိုလည်း တွေးမိတိုင်း ကျေနပ် အားတက် စရာများသာ ကြိုတင်မြင်ယောင်လာပြန်သည်။
ထွေပြားနေတဲ့စိတ်တွေ လိုအပ်သလောက် ကြည်လင်ပေါ့ပါးလာသည်ဟု ထင်ရသောအခါ သူ့ ရဲ့ အိမ်ပြန်လမ်းအတွက် ဂင်္ဂါကမ်းကို နှုတ်ဆက်လိုက်လေတော့၏။
ဂင်္ဂါရေ…..ငါ့ဘ၀မှာ သိမ်ငယ်မှုတွေ၊ နာကျင်မှုတွေ၊ စိတ်ဆင်းရဲမှုတွေ သည်းမခံနိုင်လောက်အောင် ဖြစ်လာတဲ့အခါမှာပေါ့။ အဲဒီအရာ အားလုံးကို ဖယ်ရှားပေးဖို့ အတွက် မင်းနေရာမှာ အစားထိုးမယ့်သူ မရှိသေးသရွေ့  မင်းကိုပဲ လာပြီး အားကိုမိဦးမှာ ပါပဲ။ မင်းကိုယ်တိုင်က ကမ်းအစစ် မဟုတ်မှန်းတော့ ငါလည်းသိပါတယ်။ ဒါပေမယ့် ကမ်းအစစ်ရှာမတွေ့ သေးတဲ့ ငါ့အတွက် ကမ်းအတုကပေးတဲ့ အရိပ်မှာပဲ ခဏတာ အေးအေးလူလူ ခိုနားပါရစေဦး။
ဒီအတွက် မင်းငါ့ကို ဗွေမယူဖို့ ၊ သနားကျင်နာစွာနဲ့  နားလည်ပေးဖို့ ၊ နောက်ထပ် ပျော်ရွှင်စရာ ခွန်အားသစ်တွေ ထပ်လောင်း ပေးဖို့  အားနာနာနဲ့ ပဲ တောင်းဆိုပါရစေ။ ငါ့အတွက် မနက်ဖြန်ဆိုတာ ရှိနေဦးမယ်ဆိုရင်ပေါ့ကွာ။ နောက်ထပ်တစ်ခါ ပြန်ဆုံကြဦးမယ့် နှုတ်ဆက်ခြင်းနဲ့ သာ မင်းကို လက်ပြခဲ့ပါတယ်။
0 comments:
Post a Comment