လွဲနေတဲ့ ဒါနများ အပိုင်း (၂-၃)

အပိုင်း ( ၂ )
ရွာစား ငှါးတာ ၄ သောင်းပါ၊
မင်းသမီး လူရွှင်တော် ၃ ထောင်ကျော်၊
ဓာတ်ပုံရိုက်ခ ၆ ထောင်ကျ၊
ရှင်လောင်းဝတ်စုံ ၅ ထောင်ကုန်၊
ကျွေးမွေးစရိတ် ၉ သောင်း အစိတ်၊
သံဃာတော်မြတ် ၅ ဆယ်ကျပ်၊
အားလုံးပေါင်းသော် ၁ သိန်းကျော်၊
နတ်လူ သာဓု ခေါ်စေသော်။ ။

ရေးစပ်သူ - စိုးမောင်မောင်

အထက်ပါ လင်္ကာကတော့ လွန်ခဲ့တဲ့ ၁၀ နှစ်ကျော်လောက်က လှူဒါန်းပြီးသား အလှူတခုရဲ့ မှတ်တမ်းမှတ်ရာတခုပါ၊ အဓိပ္ပါယ်ကတော့ ရှင်းနေပြီ၊ ဒီလောက်အကုန်အကျခံလှူဒါန်းတဲ့ ပွဲမှာ ဘာတွေများ ကိုယ့်နောက် ပါအောင် ယူနိုင်လိုက်သလဲ လို့ စစ်လိုက်တော့ ရေရေရာရာ ဘာမှ မရှိတာ တွေ့ရပါတယ်၊ မလိုအပ်တဲ့ ပကာသနတွေ ဂုဏ်တုဂုဏ်ပြိုင်တွေ ကို အလေးထား နေလေတော့ နိဗ္ဗာန် ပန်းတိုင်ကို သွားတာ လမ်းချော်နေကြတာကို အားလုံးက သတိမမူမိကြပါဘူး၊ပတ်ဝန်းကျင်ကလဲ သိနေ မြင်နေပါလျက်နဲ့ တားမြစ်ရကောင်းမှန်းမသိကြဘူး၊

အထူးအားဖြင့် မြန်မာနိုင်ငံမှာ အလှူပေးမယ် ဆိုတိုင်း ဆိုင်းဝိုင်း ငှါးနိုင်မှ အလှူလို့ သတ်မှတ်ကြတယ်၊ ပွဲတွေ ဇာတ်တွေ ပါမှ ခြိမ့်ခြိမ့်သဲသဲ အလှူလို့ လက်ခံကြတယ်၊ အေးအေးဆေးဆေးနဲ့ သာသနာအတွက် အကျိုးများမယ့် အလှူမျိုးကို ဆိုင်းမပါ ဗုံမပါပဲ ကန်တော့ပွဲလေးနဲ့ လှူလို့ကတော့ - အလှူပိန်လေးပါကွာ မဖြစ်စလောက်ပါ၊ အလှူပေးတယ် လို့တောင် ကမ္ဗည်းတပ်လို့ မရနိုင်ပါဘူး ဆိုပြီး ကဲ့ရဲ့ကြပြန်တယ်၊
အခြေအနေက အဲလောက်အထိကို ဖြစ်နေပြီ ၊ အလှူရဲ့ အနှစ်သာရကို ထုတ်ယူနိုင်ဖို့ မစဉ်းစားနိုင်ကြဘူး၊

တချို့ကျတော့လည်း ကိုယ်တတ်နိုင်သလောက်လေးနဲ့ လှူလိုပေမယ့် ပတ်ဝန်းကျင်က ၀ိုင်းမြောက်ပေးလို့ အကြွေးအတင်ခံပြီး လှူကြပြန်တယ်၊ သူတို့ရဲ့ ရဲရင့်တဲ့ သဒ္ဓါတရားကို သာဓုခေါ်နိုင်ပေမယ့် ဂုဏ်ပကာသန မက်ပြီး လှူနေတာတွေကိုတော့ ရသင့်သလောက် မရလိုက်တဲ့အတွက် စိတ်မကောင်းနိုင်ပါ။
တောရွာ တခုက အလှူမှာပေါ့၊ လွန်ခဲ့တဲ့ ၂၀၀၇ ခုနှစ်လောက်က အကြိုတရားဟောတဲ့ ဓမ္မကထိကဆရာတော်က အလှူ့အမကို မေးတယ်၊ အလှူ့အမကြီး ဒီနေ့ည မိတ်ကပ်လိမ်းထားတာ ဘယ်လောက်ကုန်သလဲ၊ ပြောပါအုံး ဆိုတော့ - -

မိတ်ကပ်ဘူးက ၇ သောင်းကျော်ပါဘုရား၊
လိမ်းပေးသူရဲ့ လက်ခတန်ဖိုးက မနက်ဖြန် အလှူနေ့အတွက်ရော နှစ်ရက်စာ ၁ သိန်းပါဘုရား ၊
( ဒါက တောရွာ အတိုင်းအတာပဲ ရှိသေးတယ်နော် )
အင်း ဒါဆိုရင်တော့ မဟုတ်သေးဘူး၊ နင်တို့ နည်းလမ်းမှားနေပြီ၊ ပင့်သံဃာတော်တွေကျတော့ တပါး ၀တ္ထုငွေ ၅ ထောင်ပဲ လှူတယ်၊ ကျန်တာတွေအတွက် ကုန်တာနဲ့ စဉ်းစဉ်းစားစားလဲ လုပ်ကြပါအုံး လို့ သတိပေးလိုက်တယ်၊( တကယ်တော့ အလှူ့အမနဲ့ ရင်းနှီးလို့သာ ဒီလို စကားပြောထွက်တာပါ၊ မဟုတ်ရင်တော့ ကဲ့ရဲ့ ခံရမည် အသေအချာပင်)

တုံး တံတား လျောက်စဉ် ၀ဲ ယာ မကြည့်နှင့်၊

သံသရာ တံတား ဖြတ်ကူးစဉ် အများ ကဲ့ရဲ့တာကို မမှု့နှင့် ။

တုံး တံတား လျောက်စဉ် ၀ဲ ယာ လျောက်ကြည့်နေက ချောက်ထဲ ကျတတ်သည်၊
နိဗ္ဗာန်သွားဖို့ သံသရာ( ဒါန ) တံတား ဖြတ်ကူးစဉ် သူများ ကဲ့ရဲ့ ခံရမှာ ကြောက်နေလျင် သံသရာချောက်ထဲပဲ ကျလိမ့်မည်၊ နိဗ္ဗာန်နှင့် လွဲလိမ့်မည်၊ ဟူလို၊

အရင်တစ်နှစ်က ရွာမှာ ဆရာတော် က တရားဟောနေတယ်။ ဘေးနားအိမ် က သားသတ်လိုင်စင် သမားက မနက်မှာ သတ်မယ့် နွားကို တရားပွဲနားက ဖြတ်ပြီး ဆွဲသွားတယ်။ နွားက တရားပွဲနားရောက်ရော ရုန်းပါလေရော။ တအူအူ..တဘဲဘဲ နဲ့။ အဲဒီ ကစပြီး ဆရာတော်လဲ ဒီ..သားသတ် တရားကို အမြဲတမ်း ဟောပြဆုံးမတယ်။ ကုသိုလ်အား..ပညာဥာဏ်အား နည်းလွန်းတော့ အကုသိုလ်အားများပြီး အခုထိ နားမလည်နိုင်ကြသေးဘူး။အထူးသဖြင့်အလှူရှင်တွေကိုယ်တိုင်ကိုက..ငါ့အလှူမှာဝက်သားကျွေးမှာ..ဘယ်နှပိသာ..ဒီလိုကြွားကြတာ။
တပည့်တော် အလှူပေးတော့... ငါးခြောက်ကြော်နဲ့ ရွာမှာ ကျွေးခဲ့တာ။ အဲဒါကို ဘုရား.. စင်ကာပူပြန် အလှူတဲ့ကွာ... ငါးခြောက်နဲ့ ကျွေးတယ်.. ၀က်သားလေးတောင် မကျွေးနိုင်ဘူးတဲ့..
ဒါကတော့ ဒကာလေးတယောက်ရဲ့ ကိုယ်တွေ့လေးပါ၊

ဘုရားအလောင်းတော်ဟာ ဘ၀တိုင်း ဘ၀တိုင်းမှာ ဘယ်လို ပကာသနတွေမှ မပါဘဲ လှူသွားပါတယ်၊ နောက်ဆုံး ဝေဿန္တရာမင်းကြီးဘ၀မှာ တိုင်းပြည်၊ ထီးနန်းစီးစိမ်၊ မိဖုရား နဲ့ သားသမီးတွေကိုရော သဒ္ဓါတရားသက်သက်မျှဖြင့် လှူသွားတာမျိုးပါ၊ မှတ်မှတ်ရရ သသပဏ္ဍိတ ယုန်မင်း ဇာတ်တော်မှာ သိကြားမင်းယောင်ဆောင်ထားတဲ့ ပုဏ္ဏားအိုက ဗိုက်ဆာနေပါတယ် စားစရာ လှူပါအုံး တဲ့၊

အဲဒီအခါ ဘုရားအလောင်းယုန်မင်းက စားစရာ မရှိပါဘူး၊ တကယ်ဆာလောင်တယ် ဆိုရင် မီးဖိုပေးပါ၊ အကျွနုပ် ခန္ဓာကိုယ်ကို မီးကင်ပြီးလို့ ကျက်ရင် စားနိုင်ပါပြီ၊
ဆိုပြီး မီးဖို ခိုင်းတယ်၊ နောက်ဆုံး လှူစရာ မရှိလို့ ကိုယ့်အသက်ကိုတောင် စွန့်လှူမယ် ဆိုတဲ့ ကြောက်စရာ ကြက်သီးမွေးညှင်း ထစရာ သတ္တိမျိုးနဲ့ မီးပုံထဲ ခုန်ဆင်းပြီး အသက်အသေခံ ပေးလှူခဲ့တယ်၊ တကယ်တော့ သိကြားမင်းရဲ့ အာနုဘော်ကြောင့် အသက်မသေပဲ လွတ်မြောက်ခဲ့ပေမယ့် - ယုန်မင်းကို အလွန်ကြည်ညိုလွန်းလို့ နောင်လာ နောက်သားတွေ သတိတရနဲ့ အတုယူနိုင်အောင် လ - ၀န်း ထဲမှာ ယုန်ရုပ်လေး ပေါ်နေစေ တဲ့ အထိအောင် သမိုင်းတွင်ရစ်ခဲ့တယ်။

အဲဒီ ယုန်ရုပ်လေးဟာ ကမ္ဘာပျက်သည့်တိုင်အောင် တည်တံ့နေမယ် လို့ စာပေများမှာ ဆိုပါတယ်၊ စာစကားနဲ့ ပြောရရင် ကပ္ပဋ္ဌိက ဋ္ဌိတိ - ကမ္ဘာမြေကြီး မပျက်မချင်း တည်ရှိနေမယ် တဲ့၊ အခုခေတ် သမိုင်းတွင်အောင် လုပ်သွားသူတွေက အလွန်ဆုံး ရာစုနှစ်လောက်သာ လုပ်နိုင်တာနဲ့ ယှဉ်ရင် ဒီဇာတ်တော်မှာ ဘုရားအလောင်းတော်ဟာ ကမ္ဘာနဲ့ ချီပြီး ကျော်ကြားအောင် သမိုင်းတွင်အောင် လုပ်ဆောင်သွားနိုင်တယ်လို့ ဆိုရပါမယ်၊ အဲဒီရဲ့ အကြောင်းရင်းကို လိုက်ရှာလိုက်တော့ ဂုဏ်ပကာသန မပါတဲ့ ယုံကြည်မှု့ သဒ္ဓါတရား ကို တွေ့ကြရမှာပါ။

( လ ၀န်းမှာ - ဆန်ဖွတ်သည့် အဖိုးအို က ဘယ်လို ပါလာသလဲ ဆိုတာ အခုထိ ရှာဖွေနေဆဲ ရှိပါသေးသည် ) ဗဟုဿုတအနေနဲ့ ကမ္ဘာပျက်သည့်တိုင်အောင် မပျက်မဆီး တည်ရှိနေမည့် အရာလေးမျိုး ( ကပ္ပဋ္ဌိက ဋ္ဌိတိ ) ကို ဖော်ပြလိုပါသေးတယ်။

အပိုင်း ( ၃ )

၁။ ကဿပ ဘုရားရှင်လက်ထက်တော်အခါက မိဘနှစ်ပါးကို လုပ်ကြွေးမယ့်သူမရှိလို့ သာသနာ့ဘောင်ဝင်လိုသော်လည်း မ၀င်နိုင်ပဲ ဘုရားရှင်နှင့်တကွ သံဃာတော်အပေါင်းအား လိုလေသေးမရှိ ထောက်ပံ့လှူဒါန်းပြီး အနာဂါမ် လူဝတ်ကြောင်ဘ၀ဖြင့်အသက်ထက်ဆုံးနေသွားတဲ့ ဃဋိကာရ အိုးထိမ်းသည်ဆိုတာ ရှိခဲ့ဖူးတယ်။ ဒီ ဂေါတမဘုရားရှင်သာသနာတော်မှာတော့ ဃဋိကာရဗြဟ္မာကြီးရယ်လို့ ဗုဒ္ဓ၀င်ကျမ်းများမှာ ဘုရားအလောင်းတော်ကို လိုအပ်တာကူညီပေးနေခဲ့သူပေါ့။

သူ့ရဲ့ သူငယ်ချင်းဖြစ်တဲ့ မာနကြီးလှတဲ့ ဇောတိပါလ ပုဏ္ဏားလုလင်ကိုလဲ ကဿပဘုရားရှင်ကို ကြည်ညိုတတ်အောင် သူပဲ ရအောင်စည်းရုံးပြီး သာသနာ့ဘောင်ဝင်အောင် ဆွဲခေါ်ပေးခဲ့ဖူးတယ်၊ ဇောတိပါလလုလင်ဆိုတာကလဲ ဘယ်လောက် မာနကြီးသလဲ ဆိုရင် “ ကဿပဘုရားရှင်က ၆ ရက်ထဲ ဒုက္ကရစရိယာကျင့်ပြီး ဘုရားဖြစ်နိုင်တယ် ဆိုရင် ဇောတိပါလတို့က ၆ နှစ်တောင် ကျင့်နိုင်သေးတယ်” လို့ ပါးစပ်ကြမ်းတဲ့အထိ အခြေအနေဆိုးခဲ့တာပါ။

ကဿပဘုရား ထင်ရှားပွင့်သော်၊
ဇောတိပါလ နာမအကျော်၊
ပုဏ္ဏားမာန်တက် နှုတ်မြွက်အာဘော်၊
ဝစီပြင်း ရှေးရင်း ၀ိပါတ်တော်။

ဆိုပြီး ဂေါတမဘုရားရှင်ရဲ့ ၀ိပါတ်တော် ( ၁၂ )ပါးမှာ ပါးစပ် ၀ဋ်ကြွေးအနေနဲ့ ၆ နှစ်ကျင့်ခဲ့ရတယ်။တခြားသူ ဟုတ်ပါရိုးလား အဲဒီ မာနကြီးသူက ဂေါတမဘုရားအလောင်းတော်ပါပဲ။

တနေ့မှာတော့ ကဿပဘုရားရှင်ရဲ့ ကျောင်းတော် မိုးမလုံတာကြောင့် သံဃာတော်တွေဟာ အိုးထိမ်းသည်ရဲ့ တဲကို ဖျက်ပြီး အမိုးတွေကို ဖြုတ်ယူကာ ကျောင်းအမိုးအဖြစ်အသုံးပြုတာကို ကြည်ညိုစိတ်တချက်ကလေးမှ မပျက်ပဲ မြတ်စွာဘုရားဟာ ငါ့ကို အကျွမ်းဝင်ပြီး ချီးမြှောက်တာပဲ လို့ တွေးပြီး ၀မ်းသာနေသတဲ့။ အဲဒီပီတိရဲ့ အဟုန်ကြောင့် သူ့အိမ်ဟာ ဟင်းလင်းပြင်ကြီး ဖြစ်နေပေမယ့် ရေတစက်မှ မကျပဲ အမိုးရှိနေသလိုပဲ၊ အဲဒီ အိမ်နေရာဟာ ကမ္ဘာပျက်သည့်တိုင်အောင် မိုးလုံးဝ မစိုစွတ်နိုင်ဘူးလို့ ဆိုပါတယ်။

( ဃဋိကာရသုတ္တံ၊ ရာဇ၀ဂ်၊ မဇ္ဈိမပဏ္ဏာသပါဠိတော် )

၂။ ဘုရားအလောင်းတော် ယုန်မင်းရဲ့ ကြည်ညိုမှု့သဒ္ဓါတရားကို ကမ္ဗည်းတင်စေချင်လို့ လ ၀န်းမှာ ယုန်ရုပ် ထင်စေခဲ့တဲ့ သိကြားမင်းရဲ့ အမှတ်အသားကလဲ အင်္ဂါတချက်ပါ။ ( သသ - ယုန်မင်း၊ ပဏ္ဍိတ - ပညာရှိ )

( သသ ပဏ္ဍိတဇာတက၊ စတုက္ကနိပါတ၊ ဇာတက အဋ္ဌကထာ ပထမတွဲ )

၃။ပရိတ်ကြီး ၁၁ သုတ်ထဲက ၀ဋသုတ် သမိုင်းလာ ဘုရားအလောင်းတော် ငုံးမင်းဟာ ငယ်ရွယ်စဉ် တောမီးကြီးလောင်တဲ့အခါ “ မထူးတော့ဘူး ငါ့မှာ သစ္စာမှတပါး ကူမည့်သူမရှိဘူး၊ သစ္စာဆိုပြီး တောမီးကြီးကို တားမယ်” တဲ့။ သူ့ရဲ့သစ္စာစကားကို ကြားရရင် အံ့သြသွားကြမလား မသိဘူး၊

ရှေးရှေးသော ဘုရားရှင်တွေ အဆူဆူ ပွင့်တော်မူခဲ့ကြပါတယ်၊ သူတို့ရဲ့ ကရုဏာ မေတ္တာ ပညာ သစ္စာပါရမီတွေကို အာရုံပြုပြီး သူတို့ရဲ့ တရားတော်တွေကို နှလုံးသွင်းပြီး သစ္စာဆိုပါတယ် -

ငါ့မှာ အတောင်ပံတွေ ရှိပေမယ့် မပျံနိုင်ဘူး၊ ခြေထောက်တွေ ရှိပေမယ့် မသွားနိုင်သေးဘူး၊ ငါ့မိဘတွေကလဲ ငါ့ကို ပစ်ပြေးကြပြီ၊ ဤမှန်ကန်တဲ့ သစ္စာစကားကြောင့် တောမီးကြီးငြိမ်းပါစေ - တဲ့။တကယ်လဲ ငြိမ်းခဲ့တာ ဒီနေ့ဒီအချိန်အထိ ဆိုပါတော့၊ နောက်ဆုံး ကမ္ဘာမပျက်မချင်း အဲဒီနေရာကို မီးမလောင်နိင်ဘူး၊ မီးကွင်းသွားတယ် လို့ ဆိုပါတယ်၊ ဒါကြောင့်လဲ ယနေ့ခေတ်မှာ မီးဘေးကာကွယ်ဖို့အတွက် ၀ဋသုတ်တော်ကို လေးလေးနက်နက် ရွတ်ဖတ်သရဇ္ဈာယ်နေကြတာပါ။ ( ၀ဋ - ငုံးမင်း )

( ၀ဋကဇာတက၊ ဧကကနိပါတ၊ ဇာတကအဋ္ဌကထာ ပထမတွဲ )

၎။ နောက်ဆုံးတခုကတော့ ဘုရားအလောင်းတော်ဟာ မျောက်အပေါင်း ၈ သောင်းကျော်ကို အုပ်ချုပ်ရတဲ့ မျောက်မင်းဖြစ်ခဲ့စဉ် ကျူပင်တွေပတ်လည်ဝိုင်းနေပြီး ရက္ခိုက်ဘီလူးစောင့်တဲ့ ရေကန်ကြီးအနားရောက်လာ
ကြသတဲ့။ ရေဆာနေတဲ့ မျောက်အပေါင်းကလဲ ရေသောက်ချင်တာ ငမ်းငမ်းတက်နေချိန်ပေါ့။ အဲဒီမှာ မျောက်မင်းက အမောင်တို့ အလျင်စလို ဆင်းမသောက်ကြနဲ့အုံး၊ ဒီရေကန်ကို ဆင်းသူမှန်သမျှ ဘီလူးစားခံရမယ်၊ ငါ အကြံထုတ်ပါရစေအုံး -

ဘာလို့ေ၇ကန်ဘေးဝိုင်းနေကြတာလဲ ဆင်းသောက်ကြပါတော့လား - လို့ မနေနိုင်တဲ့ ဘီလူးက ကိုယ်ထင်ပြပြောတယ်၊

ဒီရေကန်ထဲ မဆင်းပဲ သောက်လို့ရရင် သောက်ခွင့်ပေးမလား လို့ မျောက်မင်းကြီးက မေးလိုက်တယ်၊

ရတယ် မဆင်းပဲ မင်းတို့ သောက်နိုင်ရင် သောက်ကြပါ -

အဲဒီမှာ ဘုရားအလောင်းတော်ဟာ ဘ၀ပေါင်းများစွာ ဖြည့်ဆည်းလာခဲ့တဲ့ ပါရမီတော်တွေကို ဆင်ခြင်ပြီး သစ္စာဆိုပြီးသကာလ ကျူရိုးတခုကို ယူပြီး ပါးစပ်နဲ့ မှုတ်လိုက်တာ အဆစ်တွေ ပွင့်ပြီး ရေပိုက်လို ဖြစ်သွားတယ် တဲ့။ဒါကြောင့် ရေကန်ပတ်လည်က ကျူပင်တွေ မှန်သမျှ အလောင်းတော်ရဲ့ သစ္စာစကားကြောင့် အဆစ်တွေပွင့်ပြီး မျောက်အပေါင်း အသက်ချမ်းသာရာ ရခဲ့ဖူးတယ်၊ အဲဒီ ကျူပင်တွေဟာ ယနေ့အချိန်မကပဲ နောက်ဆုံးကမ္ဘာဆုံးသည်အထိ အဆစ်မရှိနိုင်တာဟာ ၄ ခုမြောက် အံ့ဖွယ်ပါပဲ။

( နဠပါနဇာတက၊ ဧကကနိပါတ၊ ဇာတကအဋ္ဌကထာ ပထမတွဲ )

အင်း ဒါနအကြောင်းဖော်ပြရင်းနဲ့ ရည်ရွယ်ချက် ပျောက်သွားတယ်၊ ကျမ်းကိုးစာရင်း ရှာရတာလဲ ကောက်ရိုးပုံထဲ အပ် ကျပျောက်တာရှာရသလိုပဲ၊မလွယ်ပါဘူး။ဒါကြောင့်ဘုရားအလောင်း
သူတော်ကောင်းတို့ထုံး နှလုံးမူပြီး သူများကဲ့ရဲ့ ခံရမှာကို မကြောက်ပဲ ရဲရဲ ၀ံ့ဝံ့ သတ္တိရှိရှိ နည်းသည် များသည် လို့ မမြင်ပဲ ကျေကျေနပ်နပ် လှူနိုင်အောင် ကြိုးစား နိုင်စေဖို့ တိုက်တွန်းရင်း ဒါန ၂ ကို နိဂုံးချုပ်ပါရစေ၊

နောက်ပို့စ်မှပဲ သားသမီးတွေအတွက် အလှူပေးမယ်ဆိုတဲ့ စိတ်နဲ့ သေသွားပြီး ပရလောကမှာ ဒုက္ခရောက်ရတဲ့ လူတယောက်အကြောင်းကို ဆက်ပါအုံးမည် - -