၃၁။ အမ္ဗပါလိထေရီ
ထိုနောက် သုံးဆယ့်တစ်ကမ္ဘာထက်၌ ပွင့်တော်မူသော ‘သိခီမြတ်စွာဘုရား’ လက်ထက်တော်ဝယ် အရုဏဝတီ ပြည်တွင် ပုဏ္ဏားမျိုး၌ ဖြစ်လေသည်။ မြတ်စွာဘုရား၏ တရားတော်ကို နာကြားရသဖြင့် ရဟန်းမိန်းမ ပြုလုပ်သည်။ တစ်နေ့သ၌ များစွာသော ရဟန်းမိန်းမတို့နှင့် အတူတကွ စေတီတော်ကို ရှိခိုး၍ လက်ယာရစ် လှည့်ခြင်းကို ပြုသည်ရှိသော် ရှေ့မှသွားလင့်သော ခီဏာသဝ ရဟန္တာမိန်းမသည် ချေဆတ်မိချေသည်။
ရဟန္တာမိန်းမ ချေဆတ်ရာမှ တံတွေးပေါက်သည် စေတီတော်ရင်ပြင်ပေါ်၌ ကျသည်ကို ရဟန္တာမိန်းမကြောင့် ဟု မမြင်မသိဘဲ နောက်မှ ရောက်လာသော အမ္ဗပါလိ အလောင်း ရဟန်းမိန်းမသည် ထိုတံတွေးပေါက်ကို မြင်လျှင် “အဘယ် ပြည့်တန်ဆာမသည် စေတီ ရင်ပြင်၌ တံတွေးပေါက်ကို ချပါလိမ့်နည်း” ဟု ဆဲဆို ရေရွတ်မိပေသည်။
ထိုဆဲဆိုမိသော ဘိက္ခုနီမသည် သီလကို စောင့်ရှောက်ထိန်းသိမ်း၍ ‘ပဋိသန္ဓေအမိဝမ်း၌ နေရသည်ကို ကြောက်လှသဖြင့်’ ဥပပါယ် ပဋိသန္ဓေ အဖြစ်၌ စိတ်ကို ထား၍ စိတ်ကို ညွှတ်၏။ ယင်း ဘိက္ခုနီ စုတေသောအခါ ရဟန္တာအရှင်မကို နှုတ်ဖြင့် ပြစ်မှားဖူးသော မကောင်းမှုကံကြောင့် ငရဲ၌ကျက်၏။
ငရဲမှ လွတ်သော်လည်း ဘဝပေါင်း တစ်သိန်းပတ်လုံး ပြည့်တန်ဆာမ ဖြစ်ရ၏။ ထိုနောက် ဤကမ္ဘာအတွင်း၌ ပွင့်တော်မူသော ကဿပ မြတ်စွာဘုရား သာသနာတော်၌ ရဟန်းမိန်းမ ဖြစ်ပြန်၏။ ထိုကုသိုလ်ကံ အကျိုးပေးပြန်သဖြင့် နောက်ဘဝတွင် တာဝတိံသာနတ်ပြည်၌ ဖြစ်လေ၏။
ယခုနောက်ဆုံးဖြစ်သော ဘဝ၌ကား သုံးဆယ့်တစ်ကမ္ဘာထက်က သီလစောင့်သုံး၍ ‘ဥပပါတိက ပဋိသန္ဓေ’ ကို စိတ်ဖြင့် တောင့်တလိုလားခြင်း ရှိသောကြောင့် ကံအားလျော်စွာ ဝေသာလီပြည် လိစ္ဆဝီမင်းတို့၏ ဥယျာဉ်တော်တွင်း သရက်ပင်ရင်း၌ တစ်ဆယ့်ငါးနှစ် တစ်ဆယ့်ခြောက်နှစ် အရွယ် ကောင်းကင်ကျ ‘ဥပပါတိက’ ဖြစ်၍ အမ္ဗပါလိ ဟူသော အမည်ဖြင့် မှည့်ခေါ်ကြကုန်၏။
ဥပပါတိက ကောင်းကင်ကျ ဖြစ်၍ နတ်မမီလူမက အလွန်လှသော အဆင်းရှိရကား မင်းသားအများတို့သည် အလုံးစုံ ဝိုင်းဝန်းကာ ရောက်လာကြကုန်၍ ကြည့်ရှုကြကုန်၏။ ဥယျာဉ်တော်အတွင်း သရက်ပင်ရင်း၌ ဥယျာဉ် စောင့်သောသူသည် ထိုမိန်းကလေးကို မြင်၍ အမျိုးအဆွေ မိဘ စသည်တို့ကို မေးမြန်း၏။ ဥပပါတိက ကောင်းကင်ကျ ဖြစ်ရကား ဆွေမျိုး မိဘတို့ကို အဘယ်မှာ မေးမြန်း၍ ရနိုင်ပါမည်နည်း။
ဆွေမရှိ မျိုးမရှိ အမိအဖ ရှာမရသော မိန်းကလေးသည် မင်း၏ ဥယျာဉ်တော်အတွင်း၌ တွေ့သောကြောင့် မင်းတို့သာလျှင် ပိုင်ထိုက်၏ဟု မင်းဘဏ္ဍာပြုပြီးလျှင် ဝေသာလီမင်း အပေါင်းတို့သည် ကိုယ်စီ ကိုယ်စီ သိမ်းယူ၍ မယားပြုလိုကုန်ကြ၏။
သူ ရထိုက်သည်၊ ငါ ရထိုက်သည် စသည်ဖြင့် အချင်းချင်း ငြင်းခုံကြကုန်၏။ ထို ဝေသာလီ မင်းတို့၏ ငြင်းခုံခြင်းသည် ပြီးငြိမ်းခြင်း မရှိနိုင်၍ ဤ မိန်းကလေးကို တစ်ဦးတည်းသော မင်း မပိုင်စေရ၊ အလုံးစုံသော ဝေသာလီမင်းတို့ ပိုင်ထိုက်စေဟု ဆုံးဖြတ်ကြလေတော့၏။
ဤကား ရဟန္တာမကို ပြည့်တန်ဆာမဟု သုံးဆယ့် တစ်ကမ္ဘာထက်က ဆဲဆိုမိသော ဝစီကံ စီမံ တိုက်တွန်းသောကြောင့် မင်းသားအများတို့ ပိုင်ထိုက်စေဟု ဆုံးဖြတ်ခြင်းကို ခံရလေသတည်း။ မကောင်းမှု ကံကြွင်း ဝဋ်မကင်း၍ မင်းသားများနှင့် ဆက်ဆံရသော ပြည့်တန်ဆာမ ဖြစ်ရသတည်း။
၃၁။ အမ္ဗပါလိထေရီ အပိုင်း-၂ အားဆက်တင်ပါမည်။
0 comments:
Post a Comment