စူးနစ်နောင်တ..ကဋေကဋာ...
*အမေ….အမေ…. အမေ ရေ….လို့
မည်သို့ ဆိုလေ…အော်ခေါ်လေ လည်း
လက်ခံနိုင်စွမ်း….ကြားနိုင်စွမ်း မဲ့…….
ခပ်သဲ့သဲ့ပင်….. မျှော်လင့်ချင်သေး…….
ခပ်ယဲ့ယဲ့ပင်……တောင်းပန်ချင်သေး…..
ဝေးကား ဝေးခဲ့……..တကယ်ပင်ဝေးခဲ့
ဝေးခဲ့ပြီကော..သံသရာတော တဲ့
မောဟိုက် ပင်ပန်း ၊ လမ်းလည်းမမြင် ၊ ကမ်းမမြင်…ဘူး
စူးနစ်နောင်တ..ကဋေကဋာ…။
*အမေ ရေ…
သားသမီးဟူသည် ..
အယူသမား…. အပူသမား….တွေပါ။
ယူသာသွားပြီး… အပူတွေလာလာထား…
လူတကာအများဖြစ်သတဲ့ ။
ငါးပါးသောရန်သူထဲ….
သမီးလည်းပါဝင်….နေဝင်ချိန်မှသိခဲ့ရ…
သိပ်ကိုနောက်ကျ လွန်းပါတယ်..။
*အမေ့မျှော်လင့်ချက်…လင်းလက်စေသော..
အမေ့နှလုံးသား …..အားတက်စေသော..
အမေ့စိတ်အာရုံ ..လုံခြုံစေသော….
အမေ့မျက်ရည်တစ်ပေါက်…သွေ့ခြောက်စေသော..
အမေ့ ဆန္ဒ…ပြည့်ဝစေသော..
အမေ့အနာဂတ်…..လှပကျေနပ်စေသော…
အမေ့ဘဝ……..တောက်ပ စေသော…..
တစ်သော..သော…နဲ့ ဘဝအမော တွေပြေ
ပန်းတွေဝေ နဲ့… စမ်းရေစီးဆင်း….
ထီးတစ်စင်း ..လို
သမီးမဖြစ်ခဲ့ဘူးအမေ..။
*သားသမီး အချစ်…မြေးအနှစ်တဲ့……
မေတ္တာစစ်စစ်..စကား ဘယ်လိုဆို… အမှန်ကိုသိနေခဲ့
မြေးကို ထိန်း တဲ့လက်တွေဟာ….. တစ်ခါတခါ..
သမီးထက်ကိုမပိုတာ….အမှန်ပါပဲ..။
အနာဂတ်ပျောက်ဆုံးသူရယ်လို့..ယူကြုံးမရ…
ရင်ထဲကငို…..
မြိုလို့လည်းမဖြစ်...ထွေးအန်လည်း မပစ်နိုင်…
ယိုင်နွဲ့ သတိ..ဝိရောဓိ တွေ..ဆက်ဆက်နေပြီး
မွှေမွှေနှောက်နှောက်….ဆောက်တည်ရာမရ..
ဘဝ မီးတွေ
သမီး လောင်မြိုက်စေခဲ့တယ်..။
*အမေ..အမေ….အမေ ရယ်…
အမေရယ် လို့
ထပ်ဆင့်ကာဆို……မည်သို့ဆိုလည်း
ကုသိုလ် ကြမ္မာ မမှီပါ ခဲ့……ကုန်လွန်ခဲ့ပြီ..။
တုံ့လှည့် ဝဋ်အင်…ဆင်ခြင်သတိ..ရှိလာတဲ့အချိန်…။
လဲရာကထ...ဘဝရေဆန်…တဖန်ထုဆစ်…..အသစ်ဖြစ်ချိန်….။
အမေ့ဆန္ဒ..မြင်လိုလှတဲ့…ဘဝပုံရိပ်…အကျိတ်အခဲ…ဖြိုခွဲမိချိန်….။
အပေးသမား ဆိုတာ အအေးသမား တဲ့..
ဆရာရှင် ရဲ့စကား၊ မှတ်သားအေးမြနေခဲ့အချိန်…..။
အရိပ်ရခြင်း၊ စိတ်ချခြင်း တွေ…
ဝေဆာနေခဲ့… အမေ့ရဲ့ ထီးတစ်စင်း ..အဖြစ်..
လင်းချင်း သန့်စင်..အမှန်မြင်ခဲ့…။
*ဒါပေမဲ့….လေ….
ဘယ်မှာဝေမျှ..ခံစားရမလဲ..။
ဘယ်မှာ အုပ်မိုး… လှုပ်နှိုးရမလဲ…။
ဘယ်မှာပေးဝေ….ချမ်းမြေ့စေမလဲ..။
ပြန်ဝယ်မရ….ပြန်မရ တဲ့
တစ်ခါက..အတွက်..၊ မျက်ရည်နှင့်လူး
စူးနစ်နောင်တ…. ကဋေကဋာ…။
***၂၀၀၃ ခုနှစ် ဧပြီလ ၂၉ ရက် နေ့ ည ၉နာရီ အချိန်မှာ အားလုံးကိုချန်ထား၊ဘဝတစ်ပါးသို့ ပြောင်းသွားခဲ့ပါသော ကျေးဇူးရှင် မိခင်ကြီး သို့ ဤ ကဗျာ ဖြင့်ဝန်ချတောင်းပန် ကန်တော့အပ်ပါသည်။******
သစ္စာအလင်း
0 comments:
Post a Comment