ဗောဓိလမ်း
အ၀ိဇ္ဇာက
ဘ၀ကို ဆေးခြယ်
လက်သည်ဖော်မရအောင်
စစ်မှန်မှုတရားတွေကို သော့ခတ်
ဘ၀ဇာတ်ဆရာဗျာများရလေအောင်
လမင်းကို အမှောင်ထဲမှာနှစ်
ညစ်ပတ်မှုမာယာတွေနဲ့
အရာအားလုံးကို လှည့်ဖြား
အမှားကို အမှန်ထင်ရလေအောင်
ဘောင်ခတ်ကာ နယ်ရုပ်လိုကစား
ဒီတော့ ဘ၀ဟာ
တပ်မက်မှုသံစဉ်တွေနဲ့ ကခဲ့ပေါ့။
တဏှာက
ဘ၀ကို ချပ်ရပ်လှပစွာ ၀တ်ပြ
တသသဖြစ်နေတဲ့ ဘ၀ကို
အလွမ်းဆေးတွေ တိုက်ကျွေး
ဆွေးမြေ့နေတဲ့တပ်မက်မှုတွေကို
ဥပါဒါန်ရေတွေနဲ့ သောက်ချ
ဘယ်အခါမှ မပြီးခဲ့တဲ့ ဇာတ်ညွှန်းကိုရေး
တစ်မှေးအိပ်စက်ဖို့
မေ့နေတဲ့ ဘ၀ဟာ
အ၀ိဇ္ဇာသံစဉ်အောက်
တဏှာကကြိုးတွေနဲ့ မှောက်ပေါ့။
နောက်ဆုံးတော့
ဘ၀ဟာ အ၀ိဇ္ဇာကို ဒူးထောက်
တဏှာကို အရှင်သခင်တင်
ဝန်ခံမှုကို ဖြောင့်ချက်ပေး
ရင်အေးမဲ့ ဆေးတစ်ပြားရဖို့
ဘ၀များစွာကို အရည်ဖျော်
ရွှေပြည်တော် မျှော်လေတိုင်း ဝေးဆိုသလို
တွေးကြည့်ရင်
ဘ၀ဟာ
သူတို့ပြုသမျှ နုခဲ့ရပေါ့။
ဒါပေမယ့်လေ
ဒီတစ်ခါတော့
ဘ၀များစွာထဲက
တစ်မိပေါက်တစ်ယောက်ထွန်းဆိုသလို
အလောင်းတော်သိဒ္ဓတ္ထကို မွေးဖွား
များသတ္တ၀ါချမ်းသာစေဖို့
ဘ၀တွေကို အရင်းတည်
အသွေးတော်ကို
သမုဒ္ဒရာမှာထည့်
အသားတော်တောင်လိုပုံ
ခိုင်လုံတဲ့ ပါရမီတော်ကို မွေး
နောက်ဆုံးအ၀ိဇ္ဖာအမှောင်ကို ဖြတ်
တဏှာလက်သမားကို သတ်ပြီးတော့
သန္တိသုခပလ္လင်ထက်
သတ္တ၀ါကောင်းကျိုးအတွက်
မိန့်မြွက်ခဲ့ တရားဘာဝနာ
အဲ့ဒါ
ဗောဓိလမ်းစဉ်ပေါ့။
မဂဓ ဓမ္မ
(အဖွဲ့ပဉ္စမနှစ်ပတ်လည်စာစောင်မှ ပြန်လည်ဖော်ပြပါသည်။)
0 comments:
Post a Comment