ကျောင်းသားဘ၀ရဲ့ တစ်နေ့တာ (၂)
အတန်းဖော် ပူးနေးက သူကို မိဂါရမာတာ လို့ ခေါ်ကြတယ် ကျွေးမွေးတတ်လွန်းလို့ နာမည်ရင်းက သုမိတ္တာ
ပူနေးတက္ကသိုလ်ကျောင်းသား (၂)
သင်တန်းစချိန်
မကြာမီ သင်တန်းဆရာတော်နှင့် အခြားသင်တန်းသား စုံညီစွာရောက်ရှိလာကြသည်ပြီဖြစ်၍ သင်တန်းစတင်သည်။ ရှေးဦးစွာ လက်အုပ်ချီမိုး၍ နမောတဿ သုံးခေါက်၊ ဘုရားဂုဏ် ၊ တရားဂုဏ် ၊ သံဃာ့ဂုဏ်ပါဠိများကို သံပြိုင် ရွတ်ဆို ရတနာသုံးပါးအား ကန်တော့ကြသည်။ သင်တန်းချိန်မှာ နေ့စဉ် နံက် ၉း၃၀ မှ နေ့ ၁၁း၀၀အထိ ဖြစ်သည်။
သင်တန်းပြဆရာတော်
သင်တန်းပြဆရာတော်မှာ ချက်ကိုစလိုဗက်နိုင်ငံမှ အရှင် ဓမ္မဒဿီဖြစ်သည်။ ဆရာတော်သည် လွန်ခဲ့သော ၁၈ နှစ်က သီရိလင်္ကာနိုင်ငံတွင် သာသနာ့ဘောင်သို့ ၀င်ရောက်ခဲ့သည်။ သီရိလင်္ကာ၊ မြန်မာနိုင်ငံတို့တွင် ပရိယတ္တိပညာရပ်များ ဆည်းပူးခဲ့သည်။ အထူးသဖြင့် မြန်မာ နိုင်ငံ ဖားအောက်တောရတွင် တောနေရဟန်းဘ၀ဖြင့် တရားရှုမှတ်အားထုတ်ခဲ့သည်။ အဘိ ဓမ္မာကျမ်းစာများကိုလည်း ဖားအောက်ဆရာတော်ထံ ၃- နှစ်ခန့်သင်ယူခဲ့သည်။ ဆရာတော် သည် ထေရ၀ါဒ စစ်စစ်ကြီးဖြစ်ပြီး ဘာသာရပ် ၁၈ ခုအထိ တတ်မြောက်ကြောင်း သိရသည်။ ဆရာတော်သည် အဘိဓမ္မာနှင့် တရားသင်တန်းများကို ကမ္ဘာအရပ်ရပ်သို့ လှည့်လည်သင်ပြ လျက်ရှိသည်။
သင်တန်း နှင့် သင်တန်းကာလ
ဆရာတော်သည် အဘိဓမ္မာ သဂြိုဟ်သရုပ်သကန်ကို အခြေပြု၍ ပဋိစ္စသမုပ္ပါဒ်နည်းနှင့် ပဋ္ဌာန်း နည်းကို တွဲဖက်သင်ပေးသည်။ မြန်မာ့နည်း မြန်မာ့ဟန်အပြည့်ဖြင့် ကျမ်းဂန်အထောက်ပြ သင်ပြပေးသည်မှာ ကျေနပ်စရာကြီးဖြစ်သည်။ မကြာခဏဆိုတာလို မြန်မာနိုင်ငံ၏ အဘိဓမ္မာ သင်ကြားပို့ချနည်းများကို ထည့်သွင်းပြောပြသဖြင့် မိမိတို့မှာ နေရင်း ထိုင်ရင်း ဂုဏ်တက် လျက်ရှိသည်။
သင်တန်းသားများထဲတွင် ဂျပန်၊ ထိုင်ဝမ်၊ ဗီယက်နမ်၊ ကိုရီယား၊ အိန္ဒိယနိုင်ငံမှ ပါဝင်တက် ရောက်ကြရာ မြန်မာဆိုတာ အဘိဓမ္မာမှာ ရှေ့ဆုံးက သူရဲကောင်းတွေပါလားဟု အလိုလို သိသွားကြသည်။
သင်တန်းကာလမှာ တစ်လဖြစ်သည်။ ပြီးခဲ့သော လ ၂၅ ရက်မှ စတင်ခဲ့ရာ ယခုလ ၂၅ တွင် အဆုံးသတ်မည်ဖြစ်သည်။ ယခု ပဋိစ္စသမုပ္ပါဒ်နည်းပြီး၍ ပဋ္ဌာန်းနည်းသို့ ရောက်လာခဲ့ပြီ ဖြစ်သည်။ မကြာမီ မြန်မာနည်းဖြင့် ကမ္မဋ္ဌာန်းရှုပွားပုံများကို ပြောပြပေးဦးမည်ဟု မိန့်သည်။
သင်တန်းပြီး မေးခွန်းအချို့
ယနေ့ သင်တန်းကို မှတ်တမ်းတင်ရန် ကင်မရာယူလာသည်။ သင်တန်းတက်ရောက်နေပုံများ ကို မှတ်တမ်းတင်သည်။ ဆရာတော်နှင့် တွဲ၍ အမှတ်တရ ဓာတ်ပုံ ရိုက်ယူသည်။ သင်တန်းပြီး ဆရာတော်အနီးကပ်၍ ၀ီထိစဉ်နှင့် ပတ်သက်သော မေးခွန်းအချို့ကို မေးမြန်းသည်။ ၀ီထိစဉ် များကို အရှင်အနုရုဒ္ဓါသည် အဘယ်ကျမ်းများက ယူ၍ ရေးသားခဲ့ပါသနည်း။ အဋ္ဌကထာ ဋီကာများကို ကြည့်က ရှင်းရှင်းလင်းလင်း သိနိုင်ကြောင်း ပြန်လည်ပြောပြသည်။
ထို့နောက် ဆရာတော်၏ အတ္ထုပ္ပတ္တိကို ရလိုသဖြင့် department office သို့ သွားသည်။ တာဝန်ခံ စာရေးမအား ဆရာတော်၏ အတ္ထုပ္ပတ္တိ ရလိုကြောင်း ပြောပြ။ သူမက ဆရာတော်၏ အတ္ထုပ္ပတ္တိ မရှိ၊ ဆရာတော်အား မေးရန် ညွှန်ပြ။ ထို့နောက် ဆရာတော်က email account ရေးပေးလိုက်သည်။ internet တွင် ရှာရန်။
canteen
အတန်းရှိသော နေ့များတွင် အဘိဓမ္မာသင်တန်းပြီး ပုံမှန်အတန်းများကို ဆက်လက် တက် ရောက်ရသည်။ ယနေ့ အတန်းများမရှိ။ Department မှ ပြန်လည် ထွက်ခဲ့ပြီး အနီးရှိ canteen ထဲသို့ ၀င်ခဲ့သည်။ counter တွင် ကျရည်(လဘက်ရည်) မှာနေသော မောင်သုဇနနှင့် ယူမီကို တွေ့ရသည်။ သူတို့သည်လည်း အဘိဓမ္မာသင်တန်းသားများဖြစ်ကြသည်။ ယူမီသည် ဂျပန်နိုင် ငံသူဖြစ်ပြီး သူ၏ Ph.D စာတမ်းအတွက် scholarship ဖြင့် ပူးနေးတက္ကသိုလ်သို့ ရောက် လာခြင်းဖြစ်သည်။ ပါဠိသင်တန်းများကို နေ့စဉ် တက်ရောက်သဖြင့် မိမိတို့နှင့် ရင်းနှီးသည်။ မောင်သုဇနသည်လည်း M.Aတန်းကို သီရိလင်္ကာတွင် ပြီးခဲ့ပြီး Ph.D အတွက် ကြိုးစားနေ သူဖြစ်၏။
စကားဝိုင်း
ကျရည်သုံးခွက် ဘာဂျီသုံးပွဲမှာယူ၍ စားကြသည်။ မောင်သုဇနက မိမိကို စောင့်နေသေးကြောင်း မပေါ်လာသဖြင့် ထွက်ခဲ့ကြောင်း ပြောသည်။ မိမိကလည်း ဆရာတော်ထံတွင် ၀ီထိစဉ်နှင့် ပတ်သက်သော မေးခွန်းအချို့ မေးနေ၍ နောက်ကျသွားကြောင်းပြောသည်။ မိမိတို့နှစ်ဦး မြန်မာစကားဖြင့် အပြန်အလှန် ပြောဆိုနေသည်ကို ယူမီက ကြည့်နေ၏။ ဘာပြောနေကြတာလဲဟု မေး။ မောင်သုဇနက အင်္ဂလိပ်ပြန်လည်ပြောပြမှ နားလည်ပြီး အရှင်က ဆရာတော်ကို စစ်ဆေးနေတာလားဟု မေးသည်။
မေးခွန်းများနှင့် ယူမီ
ယူမီသည် မယာယာနဗုဒ္ဓဘာသာကို သက်ဝင်ယုံကြည်သူဖြစ်သည်။ ယခု သူမရေးသားသော ကျမ်းစာသည်လည်း နာမည်ကျော် မဟာယာနကျမ်းစာတစ်ခုဖြစ်သည့် မဟာပုဏ္ဍရိကသုတ္တန် ကြီးကို သုတေသနပြုထားသော ကျမ်းစာကြီးဖြစ်သည်ဟုသိရသည်။ သို့သော် သူမ၏ သုတေ သနပြုမှုမှာ မဟာယာန ထေရ၀ါဒ နှစ်ဘက် အဆိုအမိန့်များကို နှီးနှောတိုက်ဆိုင် ပြလို၏။ ထို့ကြောင့် ထေရ၀ါဒမှလာသော အကြောင်းအရာများကို စူးစမ်းလေ့လာနေခဲ့၏။
ယခု ရေးသားနေသော အခန်းမှာ ဧကာယနဖြစ်သည်။ ဧကာယနဆိုသော စကားသည် ထေရ၀ါဒ မဟာသတိပဋ္ဌာနသုတ္တန်ကြီးတွင် ပါရှိသည်။ သို့သော် ထိုပုဒ်သည် မဟာယာနဟူ သော စကားနှင့် သက်ဆိုင်ခြင်းရှိ မရှိ။ ထိုပြင် ထေရ၀ါဒတွင် လူတိုင်း ဘုရားဖြစ်ခွင့် ရှိမရှိ စသည် မေးမြန်းသည်။
ဧကာယနအဓိပ္ပါယ်
ဧကာယနသည် ဧက+အယန နှစ်ပုဒ်ဖြစ်ပြီး နိဗ္ဗာန်သို့ သွားသောလမ်းမှာ နှစ်လမ်းမရှိ မဟာ သတိပဋ္ဌာန် ကျင့်စဉ် တစ်လမ်းတည်းသာ ရှိသည်ဟု ဆိုလိုကြောင်း မိမိက ပြောပြလိုက်သည်။ သို့သော် မဟာသတိပဋ္ဌာန်သုတ် အဋ္ဌကထာ၌ ဧကာယနပုဒ် အဓိပ္ပါယ်ကို ၅ မျိုးလောက် ဖွင့်ဆိုပြထားကြောင်း သူမက ပြောပြလာသည်။ သိပြီးသားကို ဘာလို့ထပ်မေးနေတာလဲ မိမိစိတ်ခုသွားမိသည်။ မဟာယာနနှင့် လုံးဝမတူပါ ဟု အဆုံးသတ်ဖြေလိုက်သည်။
ကိုကောင်းမွန်း၏ ကျောင်းသားဘ၀ အပိုင်း (၃) ကို ဆက်ပါဦးမည်။
သီတဂူစတား
၁၂-၃၂၀၁၀
0 comments:
Post a Comment