ဓမ္မဘေရီ အရှင်ဝီရိယ(တောင်စွန်း)၏ လောကချမ်းသာတရားပွဲ
မြန်မာနိုင်ငံ၊ မွန်ပြည်နယ်၊ တောင်စွန်းမြို့၊ ရွှေစေတီ၊ ဓမ္မဘေရီကျောင်းတိုက်တွင် သီတင်းသုံးသော ဓမ္မဘေရီ အရှင်ဝီရိယ (တောင်စွန်း)သည် အမေရိကန်နိုင်ငံသို့ အလည်အပတ်ခရီး ရောက်ရှိနေစဉ် နယူးယောက်မြို့ လောကချမ်းသာဘုရားကျောင်း၏ အပတ်စဉ်ကျင်းပလေ့ရှိသော ၂၀၀၉ ခုနှစ် မေလ ၂ ရက် စနေနေ့ ဆည်းဆာတရားပွဲ၌ တရားဓမ္မ ဟောကြားခဲ့ပါသည်။
ဓမ္မဘေရီ အရှင်ဝီရိယ(တောင်စွန်း)၏ ဖြစ်စဉ်အကျဉ်း
၁၃၀၇ ခု ပြာသိုလပြည့်ကျော် ၁၃ ရက် (၃၀-၁-၁၉၄၆) ဗုဒ္ဓဟူးနေ့တွင် မကွေးတိုင်း၊ နတ်မောက်မြို့နယ်၊ ဥယျာဉ်တော်ရွာ၌ အဖ ဦးပု-အမိ ဒေါ်မင်းစိန်တို့က မွေးဖွားသည်။
၁၃၂၃ ခုနှစ်တွင် အမရပူရမြို့နယ် တူမောင်းတိုက်သို့ ရောက်ရှိပြီး တူမောင်းဆရာတော်ကြီးနှင့် စာချဆရာတော် ဘဒ္ဒန္တမေဓိယတို့ထံ၌ ပရိယတ္တိပညာ စသင်သည်။
၁၃၂၅ ခုနှစ်တွင် ပထမငယ်တန်းကို တစ်ပြည်လုံး တတိယဖြင့် အောင်၏။
၁၃၂၆ ခုနှစ်က စ၍ တူမောင်းတိုက်တွင် အဘိဓမ္မာ နေ့ဝါ ညဝါကို စာချသာမဏေအဖြစ် ကူညီပို့ချရင်း စာချ စာသင် နှစ်တာဝန်ကို ထမ်းဆောင်ရ၏။
၁၃၂၇ ခုနှစ် ကဆုန်လပြည့်နေ့၌ ရဟန်းအဖြစ် ရောက်၏။
၁၃၃၂ ခုနှစ်တွင် သာသနဓဇဓမ္မာစရိယဘွဲ့ကို ရရှိ၏။
၁၃၄၂ ခုနှစ် တိပိဋကဓရ ရွေးချယ်ရေး စာမေးပွဲတွင် ပိဋကတ်တစ်ပုံဆောင် ‘ဒီဃဘာဏက’ဘွဲ့ ရရှိသည်။
၁၃၄၃ ခုနှစ်၌ ဒီဃနိကာယအဂ္ဂဓမ္မာစရိယဘွဲ့ ရရှိသည်။
၁၃၆၂ ခုနှစ်မှ စ၍ စာရေးဆရာ သတင်းစာဆရာကြီး မောင်မဲ၊ ရဝေနွယ်(အင်းမ)နှင့် ကံထွန်းသစ်တို့၏ တိုက်တွန်း အားပေးမှုကြောင့် စာပေလောကထဲ ရောက်ရှိလာပြီး မြတ်သတိဝါဒီ၊ ဘာသာသွေးနှင့် အတွေးသစ်ဂျာနယ်တို့မှာ စာရေးသားဖြစ်ခဲ့၏။
တပည့် အရှင်နေမိန္ဒာလင်္ကာရာဘိဝံသ၊ ရဝေနွယ်(အင်းမ)၊ ရွှေပါရမီ အရှင်ဆန္ဒာဓိကတို့၏ ကမကထ ပြုမှုကြောင့် ဓမ္မဘေရီစာစဉ် ပေါ်ပေါက်လာသည်။
အတွေးသစ်ဂျာနယ်ပါ ဆောင်းပါးများ စုစည်းမှုအဖြစ် ‘မထေရ်မြတ်တို့ စကားဝိုင်း’စာအုပ်တွဲများကို ၂၀၀၂ ခုနှစ်မှ စတင် ထုတ်ဝေခဲ့သည်။
ယခုအခါ မွန်ပြည်နယ်၊ တောင်စွန်းမြို့၊ ရွှေစေတီ၊ ဓမ္မဘေရီကျောင်းတိုက်တွင် သီတင်းသုံး နေထိုင်ပြီး၊ အမရပူရမြို့ တူမောင်းတိုက်နှင့် တောင်ကြီးမြို့ သိမ်တောင်ပရိယတ္တိတိုက်တို့၌ ပဋ္ဌာန်းစာဝါကို နှစ်စဉ် ပို့ချရင်း စာပေများ ရေးသားလျက် ရှိ၏။
+++++
၂၀၀၉ ခုနှစ် မေလ ၂ ရက် စနေနေ့ လောကချမ်းသာ ဆည်းဆာတရားပွဲတွင် ဓမ္မဘေရီ အရှင်ဝီရိယ(တောင်စွန်း)က အင်္ဂုတ္တိုရ်ပါဠိတော်၊ အပဏ္ဏကဝဂ်၊ သမ္မဒိဋ္ဌိသုတ်လာ အာသဝေါတရားတို့ ကုန်ရန် အကြောင်းဖြစ်သည့် ကာမဂုဏ်မှ ထွက်မြောက်ရန် ကြံခြင်း ‘နေက္ခမ္မဝိတက်’၊ မပျက်စီးရန် ကြံခြင်း ‘အဗျာပါဒဝိတက်’၊ မညှင်းဆဲရန် ကြံခြင်း ‘အဝိဟိံသာဝိတက်’နှင့် မှန်ကန်သောအမြင် ‘သမ္မာဒိဋ္ဌိ’ တရားလေးမျိုးတို့နှင့် ပြည့်စုံစေရန် အကြောင်းများကို ဟောကြားသွား၏။
0 comments:
Post a Comment