ဟိုတုန်းက ကျေးလက်ယဉ်ကျေးမှု
အဘရယ်
ဘာဖြစ်လို့ ဒီလို
သစ်ပင်တွေစိုက်နေရသလဲ
ငါ့တူရယ်
အဘ နားခိုခဲ့တာ
သူများစိုက်ထားခဲ့တဲ့
သစ်ပင်အရိပ်တွေချည်းပဲ
နောက်လူတွေ နားခိုဖို့သက်သက်ပါ။
(နောက်လူတွေကတော့
နားခိုချွေးသိပ်ပါရဲ့
အပင်ကိုလှဲ ရောင်းစားနေကြတာ
အနှစ်သုံးဆယ်မကတော့။)
အဘရယ်
ရေသန့်ဗူးတွေ ခေတ်စားနေတာ
ဘာဖြစ်လို့ ဒီလို
ရေချမ်းစင် တည်ရတာလဲ
ငါ့တူရယ်
ကိုယ်ကြုံရတဲ့ ခေတ်အတိုင်းပေါ့
မောမောပမ်းပမ်းနဲ့ ရေချမ်းစင်က
ရေအေးအေးလေးက
ဘယ်လောက်ထိအရသာရှိသလဲဆို
ခုထိ အေးမြနေဆဲ။
ရေသန့်ဗူးက နေရာတိုင်းရှိလို့လား
လူတိုင်းရော သောက်နိုင်ကြလို့လား။
အဘရယ်
ဘာဖြစ်လို့ ဒီလို
နားခိုဇရပ် ဆောက်နေတာလဲ
ဟိုတယ် မိုတယ် အင်း များပြီး
ဧည့်စာရင်းတိုင် မှတ်ပုံတင်စစ်နဲ့
ဒီခေတ်စစ်ကြီးထဲမှာ
လိုအပ်သေးလို့လား
ငါ့တူရယ်
စစ်တော့လည်းစစ်ပေါ့လေ
အိပ်ဖို့မရတော့လည်း
နေ့ခင်း နားခိုဖို့တော့ ရလောက်ပါရဲ့
ဈေးကြီးကြီး တည်းခိုဖို့
တို့တောသားတွေအတွက်
ဟုတ်မယ် မဟုတ်လောက်ပါဘူး
ကျေးဇူးကို ကျေးဇူးတင်ပါတယ်ဆိုတာနဲ့
မကျေနပ်နိုင်သေးလို့ပါ
တကယ်တော့
တကယ်တော့
ပေးဆပ်ခြင်းဆိုတာ ကျေးဇူးတင်တာစစ်စစ်ပါ။
မှတ်ချက်။ ။ ပျောက်ကွယ်လုလု ကျေးလက်ယဉ်ကျေးမှုဂေဟစနစ်လေးသို့
0 comments:
Post a Comment