ကာမေသုမိစ္ဆာစာရကို မှားယွင်းစွာ ဟောပြောရေးသားချက်” ကို ဖြေရှင်းချက်

Posted by အရှင်ဝရသာမိ at 2:09 AM December 18, 2009

အရှင်ဥာဏ က-
“အတွေ့မှ အထူးအားဖြင့် လိင်ဆက်ဆံမူ့၊ မေထုန်မူ အတွေ့မှ ကာမဂုဏ်မဟုတ်ဘူး။
အာရုံငါးပါးကို ကိုယ့်လိုအင်နဲ့ တွေ့ထိမူတွေဟာ ကာမဂုဏ်တွေပဲ။
ဒါတွေကို မှားယွင်းကျက်စားတာဟာ ကာမဂုဏ် မှားယွင်းကျက်စားမူပဲ”
(ဘုရား၊ စာအုပ်- စာ-၁၅၃)

“မှားယွင်းကျက်စားမူကို အဓိပ္ပါယ် နည်းနည်းဖွင့်ရမယ်။ ကာမဂုဏ် ကျက်စားတာ
မှားယွင်းကျက်စားနဲ့ မမှားမယွင်း ကျက်စား နှစ်မျိုးနှစ်စားရှိတယ်။
စားစရာတွေလဲ ကာမဂုဏ်တွေပဲ။
ဝတ်စရာတွေလဲ ကာမဂုဏ်တွေပဲ။
ကျန်တဲ့ လူအသုံးအဆောင် ပစ္စည်းတွေ အားလုံးလည်း ကာမဂုဏ်တွေပဲ။
အသုံးကို လွန်ပြီး အကြိုက် အစွဲ အလျောက် ကျက်စားတာဟာ မှားယွင်းတဲ့ ကျက်စားမူပဲ။
(ဘုရား၊ စာအုပ်- စာ-၁၅၄)

ကာမပိုင်လဲ မိစ္ဆာစာရဖြစ်
“ကာမဂုဏ် မှားယွင်းကျက်စား ရှောင်မူဟာ ကိုယ့်ကာမပိုင် မဟုတ်သူကို
မေထုန်မူပြုလို့ အဓိပ္ပါယ် ရမှာမဟုတ်ဘူး။
ပစ္စည်းအသုံးအဆောင် အားလုံးမှာ အကြောင်းမဲ့ သုံးဆောင်မူ (ဖြုန်းတီးမှု) တွေ ဖြစ်လာမယ်။
လိုအပ်တာထက် ပိုပြီး စားတာ၊ ၀တ်တာ၊ သုံးဆောင်တာတွေဟာ ကာမဂုဏ် မှားယွင်းကျက်စားမူတွေပဲ။
ကာမပိုင် ဖို မ ပင်ဖြစ်ပါစေ အကြောင်းမဲ့ လိင်ဆက်ဆံမူ ဖြစ်ရင်
ကာမဂုဏ် မှားယွင်းကျက်စားမူ ဖြစ်မယ်”
(ဘုရား၊ စာအုပ်- စာ-၁၅၄)

စားတယ်၊ ၀တ်တယ် သုံးဆောင်တယ်၊ ကြည့်တယ် အစရှိတာတွေလဲ
ကိုယ်နဲ့ပဲ လုပ်ရတာ ဖြစ်တယ်။
ဒီကိုယ်နဲ့ အမှုတွေမှာ မှားယွင်းကျက်စားတာတွေဟာ
ကာမဂုဏ် မှားယွင်းကျက်စားတာတွေပဲ။
(ဘုရား၊ စာအုပ်- စာ-၁၅၅)

ဘယ်သူ့အာရုံ ငါးပါးဖြစ်ဖြစ် မှားယွင်းကျက်စားက ကာမေသုမိစ္ဆာစာရပဲ
“အလှအပတစ်ခုကို အပျော်သဘောသက်သက်နဲ့ ကြည့်မယ်ဆိုရင်
ကာမဂုဏ်မှားယွင်းကျက်စားမူက လွတ်ဖို့မရှိဘူး။ အဲဒီ အာရုံကို အပျော်သဘောသက်သက်
ဆွဲမြူညို့ယူလဲ ဒီလိုပဲ။ သီိချင်း၊ ဂီတ ကို အကြောင်းတစုံတစ်ရာမရှိဘဲ ခံစားရဖို့အတွက်
နားထောင်သီဆိုတာလဲ အပျော်သက်သက်ပေါ့။ ဒါဆိုရင် ကာမမိစ္ဆရ ပဲ။
ကိုယ်က မွေးထားတဲ့ ခလေးကို အကြောင်းမရှိဘဲ နမ်းရှုံ့ ပွေ့ဖက်တာလဲ
ကာမဂုဏ် မှားယွင်းကျက်စားမူ ဖြစ်တယ်။
ခလေးရဲ့ ကျန်းမာရေး၊ ကိုယ်အနံ့၊ အငွေ့သိဖို့ နမ်းတာ၊ ပွေ့ဖက်တာတွေဟာ
အဲဒါတွေရဲ့ အကြောင်းတွေပဲ။
ကာမပိုင် လင်မယားလည်း ဒီအတိုင်းပဲ။
ကာမပိုင်ဖြစ်ပေမယ့် အပျော်သက်သက် နမ်းရှုံပွေ့ဖက်ရင် အမှားပဲ။
တစ်စုံတစ်ခုကို တွေ့သိဖို့ နမ်းရှုံ့ ပွေ့ဖက်မှ ကာမဂုဏ်မှားယွင်းကျက်စားမှုက လွတ်မယ်။” ဟု
ဟောပြောရေးသားထားပါသည်။
(ဘုရား၊ စာအုပ်- စာ-၁၅၅)

ရှင်းလင်းချက်

အရှင်ဥာဏသည် “ကာမေသုမိစ္ဆာစာရ” ၌ ကာမေသု ကို “အာရုံငါးပါး” ဟု ဘာသာပြန်၍
အာရုံငါးပါးကို ခံစားပါက ကာမေသုမိစ္တာစာရကံ” ထိုက်သည်ဟု
ဆိုထားပါသည်။
ကိုယ့်သားသမိးကို ပွေ့ဖက်နမ်းရှုံ့မူ ကိုပင် ကာမေသုမိစ္ဆာစာရ ဟု ဆိုထားပါသည်။


ကာမေသုမိစ္ဆာစာရ ၌ ကာမေသုသည် အရှင်ဥာဏ ဟောပြောသကဲ့သို့ အာရုံငါးပါးကို ဆိုလိုသည်မဟုတ်ပါ။

သံယုတ်အဌကထာ၌...

ကာမေသူတိ မေထုန သမာစာရေသု။
(သံယုတ်အဌကထာ-၂၊ ၁၃၄။)
(မဇ္ဈီမ ပဏ္ဏာသ အဌကထာ ၁၊ ၂၀၂)
(ပဋိသံ၊ ဌ၊ ၁၊၂၀၄)

ကာမေသု ဆိုတာ ရာဂအားဖြင့် တူကုန်သော သူနှစ်ယောက်တို့၏ အကျင့်တို့၌ (မေထုန်အကျင့်) တို့၌ ဟု ဖွင့်ဆိုထားပါသည်။
ထို့ကြောင့် ကာမ ဆိုသည်မှာ မေထုန်အကျင့်ပင်ဖြစ်၍၊ ကာမေသုမိစ္ဆာစာရ ဆိုသည်မှာ မေထုန်အကျင့်(မေထုန် ၀တ္ထု)တို့၌
တကယ်ကဲရဲ့ထိုက်စွာ ယုတ်မာသော အကျင့်ကို ခေါ်ဆိုခြင်း ဖြစ်ပါသည်။

မေထုန်အကျင့် ဆိုသည်မှာ မိန်းမ ယောက်ျား နှစ်ဦးသားတို့၏ ပျော်ပါးရွှင်မြူး ကြည်နူးပေါင်းဖက်
စပ်ယှက်ခြင်းပင် ဖြစ်ပါသည်။
ယောက်ျား တို့အဖို့ မိမိပိုင် ဇနိးမယားနှင့် ပျော်ပါးခြင်း၊
မိန်းမ တို့ အဖို့ မိမိ၏ကာမပိုင် လင်ယောက်ျားနှင့် ပျော်ပါးခြင်းတို့မှာ
လောကအလိုက် မကဲ့ရဲ့ ထိုက်သဖြင့် ယုတ်မာသည်ဟု မဆိုသာသဖြင့် ကာမေသုမိစ္ဆာစာရ မဖြစ်ပါ၊
မိမိဇနီးမောင်နှံမှ တပါး မသွားလာအပ်သူ အမျိုးသမိးနှစ်ဆယ်နှင့် ပျော်ပါးခြင်းတို့ကား
လောက အလိုက်ကဲ့ရဲ့ ထိုက်၍ ယုတ်မာသော အကျင့် ဖြစ်သောကြောင့်
ကာမေသုမိစ္ဆာစာရ ကံ ထိုက်ပါသည်။

ဤ၌ မသွားလာထိုက်သော မိန်းမ(၂၀) ဆိုသည်ကို အကျယ်ရေးပြပါမည်
1-မိခင်စောင့်ထိန်းသောမိန်းမ။
2-ဘခင်စောင့်ထိန်းသောမိန်းမ။
3-မိဘနှစ်ပါးစောင့်ထိန်းသောမိန်းမ။
4-မောင်ကြီးမောင်ငယ်စောင့်ထိန်းသောမိန်းမ။
5-အစ်မညီမစောင့်ထိန်းသောမိန်းမ။
6-ဆွေမျိုးစောင့်ထိန်းသောမိန်းမ။
7-အနွယ်တူစောင့်ထိန်းသောမိန်းမ။
8-သီတင်းသုံးဖော်စောင့်ထိန်းသောမိန်းမ၊
9-၀မ်းတွင်းကပင်မှန်း၍စောင့်ရှောက်ထားသောမိန်းမ။(အမိဝမ်းတွင်းကပင် ဖွားမြင်လာလျှင် မယားအဖြစ်လက်ထပ်ယူရန် တောင်းရမ်းသတ်မှတ်ထားသောမိန်းမ)။
10-မင်းဒဏ်ထားသောမိန်းမ(အာဏာပိုင်တို့က ကိုယ်တိုင်သိမ်းပိုက်ရန်ရည်ရွယ်ထားသဖြင့် ဤမိန်းမကိုသွားလာကျူးလွန်လျှင် ဤအပြစ်ဒဏ်သင့်စေ ဟု သတ်မှတ်ထားသောမိန်းမ)
11-ဥစ္စာဖြင့်ဝယ်ယူထားသောမယား။
12-အလိုတူနေထိုင်သောမယား။
13-စည်းစိမ်အတွက်သွားရောက်နေထိုင်သောမယား(ယောက်ျားထံမှ ဆုံ၊ကျည်ပွေ့ စသော အိမ်အသုံးအဆောင်ကိုရ၍ မယားအဖြစ်ခံယူသောမိန်းမ)။
14-ထမီအတွက်နေထိုင်သောမယား(၀တ်ရုံလောက်ကာမျှသော အ၀တ်ထမီကိုရ၍ မယား အဖြစ်ခံယူသောမိန်းမ)။
15-ရေခွက်၌ လက်နှစ်ဘက်ချ၍ ထိမ်းမြားသောမယား
(ဤရေသည်မကွဲမပြားသကဲ့သို့ သင်တို့နှစ်ယောက်မကွဲမပြားစေသတည်းဟု ရေတစ်ခွက်တည်း၌ လက်နှစ်ဘက်ကိုချကာမိဘနှစ်ပါးစုံထိမ်းမြားပေးသောမယား)။

16-ခေါင်းခုကိုချခိုင်း၍ နေစေသောမယား
(ထင်းခွေ၊ ရေခပ်ခြင်းအမှုကို ပြုလုပ်နေသောအမျိုးသမီးကို မယားအဖြစ် သိမ်းပိုက်လို၍ သင်ယနေ့မှစ၍ ထင်းခွေ၊ ရေခပ်ခြင်းအမှုကိုမပြုနဲ့တော့ ဟုပြောဆိုသိမ်းပိုက်ထားသောမယား။
17-ကျွန် မယား(မယားအဖြစ်သိမ်းပိုက်ထားသောကျွန်မ)၊
18-အမှုလုပ်မယား(မယားအဖြစ်သိမ်းပိုက်ထားသော အိမ်စေမိန်းမ)။
19-စစ်အောင်သဖြင့် အောင်လံစိုက်ထောင်၍ ယူဆောင်အပ်သောသုံ့ပန်းမယား။
20-တစ်ခဏမျှပေါင်းဖော်ရသော ပြည့်တန်ဆာ စသောမိန်းမများ ဖြစ်ပါသည်

ထို့ကြောင့် အဌကထာတို့၌..

အသဓမ္မာ ဓိပ္ပါယေန ကာယဒွါရ ပ၀တ္တာ အဂမနီယဌာန ၀ီတိက္ကမစေတနာ ကာမေသုမိစ္ဆာစာရရော။
(သံယုတ်အဌကထာ-၂၊ ၁၃၄။)
(မဇ္ဈီမ ပဏ္ဏာသ အဌကထာ ၁၊ ၂၀၂)
(ပဋိသံ၊ ဌ၊ ၁၊၂၀၄)
ယုတ်မာသော မသူတော်တို့၏ အလိုသဘောဖြင့် မသွားလာထိုက်သော မိန်းမတို့၌ လွန်ကျူးကြောင်း
ကာယကံ စေတနာသည် ကာမေသုမိစ္ဆာစာရ မည်၏။“ ဟု ဖွင့်ဆိုထားပါသည်။

ကာမေသုမိစ္ဆာစာရ၌ ကမ္မပထမြောက်သည့် အဂါင်္လေးပါးရှိ၏။
ဤ အဂါင်္လေးပါး တို့မှာ..
၁။ မသွားလာထိုက်သော မိန်းမဆိုသည့် အဂမနီယ ၀တ္ထုဖြစ်ခြင်း၊
၂။ ထိုဝတ္ထု၌ မှီဝဲပေါင်းသင်းဆက်ဆံလိုသည့် စိတ်ရှိခြင်း။
၃။ မှီဝဲမူ လုံးလမယောဂ ပြုခြင်း။
၎။ မှီဝဲ ပေါင်းသင်းဆက်ဆံရာ၌ သာယာခြင်း.. တို့ဖြစ်၏။

ဤ အဂါင်္လေးပါးနှင့် မညီလျှင် ကမ္မပထ မမြောက်ဘဲ လေးပါးညီမှသာလျှင် ကမ္မပထ မြောက်၏။“ဟု အဌကထာဆရာတို့
ဖွင့်ဆိုထားပါသည်။
အထက်ဖော်ပြပါ အဌကထာ အဖွင့်တို့ အရ
ငါးဖြာအာရုံ ကာမဂုဏ်ခံစားမူ။
ကလေးပွေ့မူ။
မိမိကာမပိုင်ကို မှီဝဲမူတို့သည် ကာမေသုမိစ္ဆာစာရ မထိုက်ကြောင်း ထင်ရှားပါသည်။

သို့ဖြစ်ပါ၍ အရှင်ဥာဏ ၏
ကာမေသုမိစ္ဆာစာရကိုမှားယွင်းစွာဟောပြောရေးသားချက်
များသည် အဓမ္မ၀ါဒ ဖြစ်ကြောင်း တင်ပြအပ်ပါသည်။