မြတ်ဗုဒ္ဓကို ရှောင်နေခဲ့သော ရူပနန္ဒာထေရီ
သာကီဝင်မင်းသမီး ဇနပဒကလျာဏီသည် အလွန်တင့်တယ်လှပပြီး မိမိ၏ ရုပ်အဆင်းကို အလွန်သာယာနှစ်သက်ကာ အလှမာန်ယစ်နေသူဖြစ်၏၊ လှပသောဂုဏ်ကို အကြောင်းပြုပြီး ရူပနန္ဒာ-ဟူ၍လည်း အမည်တွင်၏။
မောင်တော်ကြီး သိဒ္ဓတ္ထမင်းသား ဘုရားအဖြစ် ရောက်ပြီးနောက် တူတော် ရာဟုလာ၊ ချစ်သူ နန္ဒမင်းသား၊ မယ်တော် ပဇာပတိဂေါတမီတို့သည် အားလုံး ရဟန်းပြုကြကုန်၏၊ ထိုအခါ ငါလည်း ရဟန်းပြုမှ ကောင်းမည်-ဟု ကြံစည်ပြီး ရဟန်းဘောင် ၀င်ခဲ့၏၊ သာသနာတော်ကို ကြည်ညိုသော သဒ္ဓါတရားကြောင့် မဟုတ်ဘဲ ဆွေမျိုးများ သံယောဇဉ်ကြောင့် ဘိက္ခုနီဘ၀ ရောက်လာသော အရှင်မ မင်းသမီးသည် ရုပ်အဆင်း၏ အပြစ်၊ အပုပ်ကောင်အကြောင်း ဟောတတ်သော ဘုရားရှင်အနားသို့ မရောက်အောင် နေလေသည်။
ဘုရားရှင်၏ဂုဏ်တော် ကျေးဇူးတော်တို့ကို ကြားရဖန်များသောအခါ တနေ့တွင် တရားသဘင်သို့ ပုန်းလျှိုး ကွယ်လျှိုး လာရောက်၍ တရားနာ၏၊ ဤအကြောင်းကို သိတော်မူသော ရှင်တော်ဘုရားသည် ခြေတော်ရင်းတွင် လူမက နတ်တမျှ လှသော အမျိုးသမီးငယ်တဦးကို ဖန်ဆင်း၍ ယပ်လေခတ်ပေးနေစေ၏၊ ထိုဖန်ဆင်းသူ အမျိုးသမီးငယ်ကို အခြားသူများ မမြင်ရ၊ ဇနပဒကလျာဏီ အရှင်မသာ မြင်ရ၏၊ အရှင်မသည် နုပျိုချောမောလှပသော အမျိုးသမီးငယ်ကို တအံ့တသြ ငေးစိုက်ကြည့်နေမိသည်။
မိမိ၏ အလှအပသည် ထိုသူငယ်မနှင့် နှိုင်းစာလျှင် ရွှေဟင်္သာနှင့် ကျီးမည်းကဲ့သို့ ဖြစ်နေသည်ကို သတိပြုမိ၏၊ သူငယ်မ၏ တကိုယ်လုံးကို တခုစီကြည့်ပြီး အားမရနိုင်အောင် ငေးမောကြည့်ရှုနေစဉ်ပင် သူငယ်မသည် တဖြည်းဖြည်း အိုမင်းရင့်ရော်လာသည်ကို တွေ့မြင်ရလေသည်။
နုပျိုပြေပြစ်သော ၁၆-နှစ်ရွယ် အမျိုးသမီးငယ်သည် တဖြည်းဖြည်း အသက် ၂၀-ရွယ်၊ ၂၅-နှစ်ရွယ်၊ ၃၀-ရွယ်၊ ၄၀-၅၀-ရွယ် ဖြစ်လာကာ အရေတွန့် ခါးကိုင်းပြီး အမယ်အိုဖြစ်လာသည်၊ ထို့နောက် ကိုင်နေသော ယပ်ကိုပစ်ချကာ သူနာဘ၀ရောက်သွားပြီး သေဆုံးသွားသည်ကို ထိတ်လန့်ဖွယ် တွေ့မြင်ရသည်။
တဖန် အလောင်းကောင်သည် တဖြည်းဖြည်း ပုပ်ပွဖူးရောင်ပြီး သွေးပြည်များ ယိုစီးကာ လောက်များ တဖွားဖွား တက်လာသည်ကို မြင်ရပြန်လေသည်၊ အရှင်မ ဇနပဒကလျာဏီ-ရူပနန္ဒာသည် ထိတ်လန့်တုန်လှုပ်ပြီး သံဝေဂတရားများ ဖြစ်ပေါ်လာသည်၊ ဤအချိန်တွင် မြတ်စွာဘုရားသည် ဖန်ဆင်းရုပ်ကို ကွယ်ပျောက်စေကာ အောက်ပါဂါထာကို ဟောတော်မူလေသည်၊ တရားတော်အဆုံးတွင် အရှင်မသည် အကျွတ်တရားရလျက် ရဟန္တာမ ဖြစ်သွားလေသည်။
( ပါဠိဂါထာ )
အဋ္ဌီနံ နဂရံ ကတံ ၊ မံသလောဟိတလေပနံ ။
ယတ္ထ ဇရာ စ မစ္စု စ ၊ မာနော မက္ခော စ သြဟိတော ။
( မြန်မာပြန် )
အရိုးတို့ကို စိုက်ထူ၍ အသားအသွေးတို့ဖြင့် လိမ်းကျံလျက် အတ္တဘောတည်းဟူသော မြို့ကို တဏှာလက်သမားသည် ဆောက်လပ်အပ်၏။
ယင်းမြို့၌ အိုခြင်း, သေခြင်း, မာန, ထောင်လွှားခြင်း, သူ့ကျေးဇူးကို ချေဖျက်ခြင်းသည်သာ တည်ရှိလေ၏။
( ဆောင်ပုဒ် )
အရိုးသုံးရာ၊ တိုင်ထူကာဖြင့်၊ များစွာကြောများ၊ ယှက်တွယ်ထားလျက်၊ သွေးသားလိမ်းကျံ၊ အရေရံကာ၊ ပန်းရန်တဏှာ၊ ဆောက်လုပ်လာသည့်၊ ခန္ဓာမြို့တွင်း၊ ဤကိုယ်တွင်းကား၊ အိုခြင်း-သေခြင်း၊ မာန်မူခြင်းနှင့်၊ မှားယွင်းပေါ့သွမ်း၊ ကျေးဇူးကန်းသာ၊ သိုမှီးပါ၏။
( ဇရာဝဂ်၊ ဇနပဒကလျာဏီ-ရူပနန္ဒာဝတ္ထု )
0 comments:
Post a Comment