မိုးကုတ်ဆရာတော်ဘုရားကြီး-၁၃
သက်တော်ကား ၅၆-နှစ်အတွင်းသို့ပင် ၀င်လာချေပြီ။ ဆရာတော့် အနေနှင့် ကျန်းမာရေးအတွက် အစစအရာရာတွင် ဆင်ခြင်နေရသည်။ ညနေတိုင်း လမ်းလျှောက်ထွက်သည့် အလေ့ကိုလည်း မပြတ်ပြုတော်မူသည်။ ထိုသို့ သတိထား ဆင်ခြင်နေသည့်ကြားကပင် ၁၃၁၇-ခုနှစ်အစတွင် ဆရာတော့်၌ လေငန်းရောဂါစွဲကပ်ခဲ့သည်။ တရားပင်မဟောနိုင်သဖြင့် တရားပွဲများ ရပ်ထားရသည်။ ဆရာတော်၏ လေငန်းရောဂါအတွက် မန္တလေးမှ နာမည်ကျော် ဆရာဝန်များ လာရောက်ကုသပေးကြသည်၊ သို့သော် ဒကာဆရာဝန်များအနေနှင့် အမရပူရသို့ တကူးတက လာရောက်ကုသပေးရခြင်းဖြစ်ရာ ဆေးရုံတာဝန်တစ်ဖက်နှင့် အတော်ပင် ကသီလင်တ ဖြစ်ကြရသည်။ ထို့ကြောင့် မန္တလေး နန်းမြို့ရိုး တောင်ဘက် ရွှေလှံရပ်တွင် နေထိုင်သော ဦးချစ်ဆွေ-ဒေါ်မမတို့က ဆရာတော့်အား နေအိမ်သို့ပင့်ကြတော့သည်။ နေအိမ်အပေါ်ထပ်ကို ကျောင်းအဖြစ် သီတင်းသုံးဖို့ရန် လှူဒါန်းကြပြီး၊ ညအိပ်ချိန်တွင် ဆရာတော်ကြီးအတွက် ၀ိနည်းနှင့် မဆန့်ကျင်အောင် ဦးချစ်ဆွေ-ဒေါ်မမတို့က ခြံဝင်းဘေးတွင်ရှိသော ဂိုထောင်တန်းလျားများသို့ သွားရောက်အိပ်ပေးကြရှာသည်။ ဆရာတော်သည် ဒကာ-ဒကာမများ၏ အဖက်ဖက်က ဂရုတစိုက် ပြုစုပေးမှုတို့ကြောင့် လျင်မြန်စွာပင် ကျန်းမာလာခဲ့သည် (လပိုင်းမျှသာ ကြာမည်ဟု ယူဆပါသည်)။ ဆရာတော်ကြီးသည် အားအင်ပြည့်ဝလာသည်နှင့် တစ်ပြိုင်နက် မန္တလေးပရိတ်သတ်ကို တရားဟောပေးရန် ပြင်ဆင်တော့သည်၊ တရားဟောချိန်ကို အများစု လာရောက်နာယူနိုင်သော ည ၇-နာရီ မှ ၈-နာရီ ဟူ၍ သတ်မှတ်ပေးတော်မူသည်။ ဆရာတော့်တရားကို အရသာတွေ့သွားသော မန္တလေး တရားနာပရိတ်သတ်သည် အမရပူရ၊ မိုးကုတ်၊ ညောင်လေးပင် များတွင်ကဲ့သို့ မိမိတို့မန္တလေးကိုလည်း နောင်တွင် အချိန်တစ်ခုသတ်မှတ်၍ ဟောကြားပေးပါရန် လျှောက်ထားတောင်းပန်ကြတော့သည်။
*************************
ဒကာ-ဒကာမများ၏ လျှောက်ထားချက်အရ ဆရာတော်သည် သစ္စာတရားများ ဟောကြားပေးမည့် အချိန်ကာလကို အောက်ပါအတိုင်း ခွဲဝေသတ်မှတ်ပေးတော်မူသည်-
(က) မိုးတွင်း- ၀ါဆိုလပြည့်ကျော် ၁-ရက်နေ့မှစ၍ တန်ဆောင်မုန်းလပြည့်နေ့အထိ၊ အမရပူရတွင် ၄-လ။
(ခ) ဆောင်းတွင်း- တန်ဆောင်မုန်းလပြည့်ကျော် ၁-ရက်မှစ၍ တပေါင်းလပြည့်နေ့အထိ မန္တလေးတွင် ၄-လ။
(ဂ) နွေပိုင်း- တပေါင်းလပြည့်ကျော် ၁-ရက်မှစ၍ ၀ါဆိုလပြည့်နေ့အထိ မိုးကုတ်မြို့တွင် ၄-လ။
ဆရာတော်၏ နေ့စဉ်ဆောင်ရွက်နေပုံမှာ စက်နာရီတစ်လုံး အချိန်မှန်ကန် တိကျစွာ သွားနေသကဲ့သို့ ဖြစ်တော့သည်၊ နံနက်အာရုဏ်တက်ချိန်မှစ၍ ညအိပ်ချိန်အထိ သူ့အကွက်နှင့်သူ မှန်မှန်ဆောင်ရွက်တော်မူသည်။ နေ့စဉ်ပင် ညနေ ၄-နာရီထိုးသည်နှင့် ကျန်းမာရေးအတွက် လမ်းလျှောက်ထွက်တော့သည်၊ နောက်တော်က တစ်ယောက်စ၊နှစ်ယောက်စ လိုက်ပါလေ့ရှိလေသည်။ မိုးကုတ်မြို့တွင် ရှိစဉ် တစ်ခါတစ်ရံ မင်္ဂလာတိုက်မှ အထက်တောင်ကုန်းကို ကျော်ဖြတ်၍ ၂-မိုင်ခန့်ပင် လမ်းလျှောက်တော်မူတတ်ပါသည်။ ကျောင်းသို့ပြန်ရောက်ချိန်တိုင်း မိုးကုတ်တရားနာပရိတ်သတ်က အသင့်စောင့်မျှော်နေသည်သာဖြစ်၍၊ ခေတ္တ အမောဖြေပြီး တရားဟောရာသို့ ကြွရလေသည်။ တရားဟောရာတွင် အခက်အခဲများ ရှိသဖြင့် ဒကာဦးမြင့်-ဇနီး ဒေါ်သန်းသန်းတို့က မီးစက်ကြီးတစ်လုံးနှင့် အသံချဲ့စက်တစ်လုံး လှူဒါန်းကြသည်။
***********************
မိုးကုတ်ဆရာတော်ဘုရားကြီးသည် သက္ကရာဇ် ၁၃၁၇-ခု တပေါင်းလ (၁၉၅၆-ခု၊ မတ်လ)တွင် နောက်ဆုံးအကြိမ်အဖြစ် ညောင်လေးပင်သို့ တရားဟောကြွလေသည်။ ပြည်လုံးချမ်းသာစေတီရင်ပြင်တော်နှင့် မြို့မမီးသတ်ကွင်းထဲတွင် ၁၆-ရက်တိုင်တိုင် ၀ိပဿနာတရား၊ အလုပ်ခွင်တရားများချည်း ဟောပြတော်မူရာ ပရိတ်သတ်များ လွန်စွာ များပြားလှပါသည်။ ညောင်လေးပင်တွင် ဆရာတော်ကြီးတရားဟောခဲ့သည်မှာ စစ်မဖြစ်မီ နှစ်စဉ်ဆက်တိုက် ၉-ကြိမ်၊ စစ်ပြီးခေတ်တွင် ၂-ကြိမ် ဖြစ်သည်။ ဆရာတော်နှင့် ညောင်လေးပင် ပရိတ်သတ်မှာ လွန်စွာ သံယောဇဉ်ကြီးပါသည်၊ သို့သော် ညောင်လေးပင်တွင် ၁၁-ကြိမ်တိုင်အောင် ဆရာတော် တရားဟောပေးခဲ့သော်လည်း တရားအသံတော်များကို ဖမ်းယူထားခြင်းမရှိသည့်အတွက် နှမြောဖွယ်ကောင်းစွာ တရားတိပ်ခွေ တစ်ခွေမျှပင် မရလိုက်ကြပေ။
0 comments:
Post a Comment