အိပ်မက်ဆိုတာ (၂)

အိပ်မက် ၆ ။ ။ လူတွေက တစ်သိန်းတန်ရွှေခွက်ကို သန့်နေအောင်လုပ်ပြီး မျောက်ကို ကျင်ငယ်စွန့် (သေးပေါက်) ထည့်ခိုင်းတယ်။
နောင်အခါ ယုတ်မာကောက်ကျစ်တဲ့မင်းတွေ အုပ်ချုပ်လိမ့်မယ်။ အဲဒီအခါ ချမ်းသာကြွယ်ဝ သူများက မင်းလိုလိုက် မင်းကြိုက်ဆောင်ပြီး မတန်တဆ လာဘ်လာဘတွေ ထိုးရလိမ့်မယ် လို့ဆိုလိုတယ်။
အိပ်မက် ၇။ ။ လူတစ်ယောက်က ကွပ်ပျစ်မှာနေပြီး ကြိုးကျစ်နေတယ်။ ကြိုးအဆုံးပိုင်းကို အောက်ချတဲ့အခါ အောက်က ခွေးက သူ့ကြိုးကို စားနေတယ် လို့ မင်းကြီး အိပ်မက်ပြန်တယ်။
ဘုရားရှင်းပြတဲ့ ဒီအိပ်မက်ရဲ့ အဓိပ္ပါယ်က နောင်အခါ ယောကျာ်းတွေက ပင်ပင်ပန်းပန်း ရှာဖွေစုဆောင်းထားတာတွေကို မိန်းမတွေက shopping သွားပီး အဆင်တန်ဆာဝတ်ဆင်ဖို့ ကြွားဝါဖို့ အတွက် သုံးဖြုံးကြလိမ့်မယ်။ ယောကျာ်းရဲ့ နောက်ကွယ်မှာ လင်ငယ်နဲ့ ဖောက်ပြားလိမ့်မယ်။ လင်ကြီးရှာ သမျှ လင်ငယ်အတွက် ဖြစ်လိမ့်မယ် လို့ဆိုလိုတယ်။
အိပ်မက် ၈။ ။ "မင်းရင်ပြင်မှာ ရေမရှိတဲ့အိုးတွေက အများကြီး၊ ရေပြည့်နေတဲ့ အိုးက တစ်အိုးတည်း ရှိတယ်။ လူတွေက ပြည့်နေတဲ့အိုးထဲကိုပဲ ထပ်ဖြည့်နေကြတယ်တဲ့။
ဒါက "နောင်အခါ တိုင်းပြည်အုပ်ချုပ်မင်းလုပ်သူတွေ ဆင်းရဲလိမ့်မယ်။ အဲဒီအခါ တိုင်းသူပြည်သား တွေကို နှိပ်စက်ပြီး လုပ်အားပေးခိုင်းလိမ့်မယ်" လို့ဆိုလိုတယ်။
အိပ်မက် ၉။ ။ ရေကန်တစ်ကန် ရှိတယ်။ လေးဘက်လေးတန်က သတ္တ၀ါတွေ အကုန်လုံး ရေ လာသောက်ပေမယ့် ရေက မနောက်ဘူးလို့ အိပ်မက်မက်ပြန်တယ်။
"နောင်အခါ မင်းတွေက တရားဥပဒေမရှိ အုပ်ချုပ်လိမ့်မယ်။ လာဘ် စားမယ်။ အခွန် မတရား ကောက်မယ်။ လူတွေကို နှိပ်စက်မယ်။ လူတွေကလည်း တရားမရှိဖြစ်လာမယ်။ လူတွေက နယ်စွန်နယ်ဖျား တွေမှာ ပိုပြီးသွားရောက်နေထိုင်လိမ့်မယ်" လို့ဆိုလိုပါတယ်။
အိပ်မက် ၁၀။ ။ ထမင်းအိုးက မာတစ်ဝက်။ တူးတစ်ဝက် ။ မနပ်တစ်ဝက် နပ်တစ်ဝက်ဖြစ်နေ တယ်။
ဘုရားရှင် ဒီအိပ်မက်အကြောင်းကို ရှင်းပြတာက နောင်အခါ တရားမရှိတဲ့ မင်းဆိုးမင်းညစ်တွေ အုပ်ချုပ်လိမ့်မယ်။ အဲဒီအခါ လက်အောက်ငယ်သားတွေကလည်း ယုတ်မာလာမယ်။ တိုင်းသူပြည်သားလူအများကလည်း တရားမဲ့လာလိမ့်မယ်။ မိုးကလည်း လိုအပ်တဲ့နေရာမှာ မရွာသွန်းပဲ မလိုအပ်တဲ့နေရာမှာ အလွန်အမင်း ရွာသွန်းပြီး လူတွေ အကြီးအကျယ်ဒုက္ခရောက်ကြလိမ့်မယ်။
အိပ်မက် ၁၁။ ။ နောက်ထပ် မင်းကြီးရဲ့အိပ်မက်က တစ်သိန်းတန် စန္ဒကူးအနှစ်ကို အရက်နဲ့ လဲသောက်တယ် တဲ့။
"နောင်အခါ ရဟန်းတွေဟာ တရားတော်ကို ငွေကြေးဖြတ်ပြီး ဟောကြားလိမ့်မယ် (မြတ်စွာဘုရားတရားတော်နဲ့ စီးပွါးရှာကြသလို ဖြစ်လိမ့်မယ်)" လို့ မြတ်စွာဘုရားက ရှင်းပြတယ်။ (ဒါကတော့ ကိုယ့်ကိစ္စမို့သိတယ်။ သွေးထွက်အောင် မှန်တယ်။ တချို့ဓမ္မကထိကဆရာတော်တွေ ပိုက်ဆံအရနည်းတဲ့ အရပ်ဒေသဆိုရင် မကြွချင်ကြတော့ဘူး၊ တရားမဟောချင်ကြတော့ဘူး)။
အိပ်မက် ၁၂။ ။ ကျောက်ဖျာတွေက ရေပေါ် ပေါလောပေါ်ပြီး သွားနေကြပါတယ်။
အဓိပ္ပါယ်က "အမျိုးကောင်းသားတွေ ပညာတတ်တွေ လူရာမ၀င်ဖြစ်လာလိမ့်မယ်။ သီလ စင်ကြယ်သူတွေ နာမည်ပျက်လိမ့်မယ်"တဲ့။
အိပ်မက် ၁၃။ ။ ဘူးခွံတွေက ရေထဲမြုပ်ကုန်တယ်။
ဒါက "ယုတ်မာတဲ့ အရှက်တရားမရှိသူတွေ ကြီးပွားချမ်းသာလာလိမ့်မယ်။ ယုတ်မာတဲ့သူတွေက အုပ်ချုပ်သူတွေ ဖြစ်လာလိမ့်မယ်။ လူယုတ်မာတွေ ကောင်းသတင်းကျော်ကြား တန်ခိုးထွားလိမ့်မယ်" လို့ဆိုလိုတယ်။
အိပ်မက် ၁၄။ ။ အလွန်ငယ်တဲ့ ဖားသတ္တ၀ါတွေက အလွန်ကြီးတဲ့ မြွေဟောက်တွေကို စားသောက် ၀ါးမျိုနေတယ် လို့ မင်းကြီး အိပ်မက်ထပ်မက်တယ်။
"နောင်သောအခါ အလွန်ကြီးတဲ့ ယောကျာ်းတွေက ရာဂအလိုကိုလိုက်ပြီး အလွန်ငယ်တဲ့ ကောင်မ လေးတွေကို ယူမိလို့ ဒုက္ခ ရောက်ရလိမ့်မယ်" လို့ မြတ်စွာဘုရားက ရှင်းပြတယ်။
အိပ်မက် ၁၅။ ။ ကျီးတွေကို ရွှေဟင်္သာတွေကို ၀ိုင်းရံခစားနေတယ် လို့ အိပ်မက်မက်တယ်။
"နောင်အခါ တိုင်းပြည်အုပ်ချုပ်မင်းလုပ်သူတွေဟာ ပညာမတတ်လို့ သူတို့ရဲ့စည်းစိမ် ပျက်စီးမှာ ကြောက်ပြီး လူမိုက်တွေကို မွေးရလိမ့်မယ်။ ပြီးတော့ လူမိုက်ကို ဆရာတင်ထားရလိမ့်မယ်" လို့ဆိုလိုတယ်။
အိပ်မက် ၁၆။ ။ သိုးတွေက ကျားသစ်ကို ကျွတ်ကျွတ်မြည်အောင် ၀ါးစားနေတယ်။ ၀ံပုလွေ တွေက အဝေးကနေ သိုးကို ကြောက်လန့်နေရတယ် လို့ မင်းကြီး နောက်ဆုံးမြင်မက်တယ်။
ဒီအိပ်မက်အဓိပ္ပါယ်က "နောင်အခါ လူမိုက်တွေက တိုင်းနိုင်ငံကို အုပ်ချုပ်လိမ့်မယ်။ သူတို့ လိုချင်တာကို လက်ညှိုးထိုးပြီး မတရား သိမ်းပိုက်ကြလိမ့်မယ်" တဲ့။
ဒါတွေကတော့ လွန်ခဲ့တဲ့နှစ်ပေါင်း(၂၅၀၀)ကျော်က ကောသလမင်းကြီးမက်ခဲ့တဲ့အိပ်မက်တွေကို မြတ်စွာဘုရားက ရှင်းပြထားတာပါ။ ဒီမင်းကြီးရဲ့ အိပ်မက်တွေ မှန် မမှန်ကိုတော့ ကိုယ်ကိုယ်တိုင်သာ ဆုံးဖြတ်ပါတော့။

Posted by Dhammacariya, BA, MA, PhD at 9:08 AM