ကံ ကံ၏အကျိုး ( ၅၁ )

( ဖိနပ်လှူသောကြောင့် )

ဒေါ်ဝင်းမြသည် မလှိုင်မြို့နယ် ကမ္ဘားဖြူရွာ အခြေခံပညာ မူလတန်းကျောင်းမှ ဆရာမတဦးဖြစ်သည်။ မိဘများကို ပြုစုလုပ်ကျွေးနေသော သမီးပျိုတဦးဖြစ်သည်။ ကမ္ဘားဖြူကျေးရွာ အမျိုးသမီး ဓမ္မစကြာအသင်း၏ အကျိုးဆောင် တဦးလည်း ဖြစ်သည်။ သူမသည် ဓမ္မာစကြာနှင့် ပဋ္ဌာန်းပစ္စယနိဒ္ဒေသတို့ကို နေ့စဉ်မပြတ် ရွတ်ဖတ်ပူဇော်လေ့ ရှိသည်။

ကမ္ဘားဖြူကျေးရွာ ဘုန်းတော်ကြီးကျောင်းတွင် နှစ်စဉ် အသံမစဲ မဟာပဋ္ဌာန်း ရွတ်ဖတ်ပူဇော်ပွဲ ကျင်းပမြဲ ဖြစ်သည်။ ဆရာမ ဒေါ်ဝင်းမြသည် ထိုပူဇော်ပွဲ၏ ဝေယျာဝစ္စများကို တတ်စွမ်းသမျှ ကုသိုလ်ယူ လုပ်ကိုင်လေ့ ရှိသည်။ ၁၃၅၄- ခုနှစ် ပဋ္ဌာန်းပူဇော်ပွဲ ကျင်းပသောအခါ ထိုပူဇော်ပွဲသို့ ရေနီရွာအရှေ့ကျောင်း ဆရာတော်နှင့် အခြားဆရာတော် တပါးတို့ ကြွရောက်တော်မူလာကြသည်။ ထိုဆရာတော်တို့ စီးလာသောဖိနပ်များမှာ လွန်စွာမှပင် ဟောင်းနွမ်းပျက်စီးနေသည်ကို ဒေါ်ဝင်းမြ မြင်တွေ့ရသည်။ ထို့ကြောင့် ကြိုတင်ရည်ရွယ်ချက်မရှိဘဲ ရုတ်တရက် ဖြစ်ပေါ်လာသော စေတနာအလျောက် မိမိ၏ကိုယ်ပိုင်ငွေဖြင့် ဆရာတော်နှစ်ပါးအား ဖိနပ်များဝယ်၍ လှူဒါန်းခဲ့သည်။ ဖိနပ်တရန်လျှင် ငွေ ၁၅၀-ကျပ် ပေးရသည်။

ထိုသို့ ဖိနပ် လှူပြီးလျှင်ပြီးချင်း ရေနီရွာ အရှေ့ကျောင်းဆရာတော် ဦးကေလာ-က ဤကဲ့သို့ စေတနာသဒ္ဓါတရား သန့်သန်ဖြင့် ဖိနပ်လှူရသော အကျိုးအားကြောင့် ယဉ်ပိုင်ရှင် ဖြစ်ပါစေ-ဟု ဒေါ်ဝင်းမြအား ဆုပေးခဲ့ပါသည်။
တနေ့တွင် မလှိုင်မြို့နယ် ၀န်ထမ်းပေါင်းစုံ အလှူပွဲကျင်းပရန် ကံစမ်းမဲဖွင့်သည်။ ၀န်ထမ်းတိုင်းသည် ကံစမ်းမဲ တစောင်လျှင် ငါးဆယ်ကျပ်နှုန်းဖြင့် ၀ယ်ယူလှူဒါန်းကြရသည်။

ဒေါ်ဝင်းမြသည် မြို့နယ်ပညာရေးဌာန၏ အစီအစဉ်ဖြင့် ကံစမ်းမဲလက်မှတ်နံပါတ် ၁၁၂၄၃-ကို ၀ယ်ယူခွင့် ရခဲ့ပါသည်။ ၁၀-၅-၉၂- တနင်္ဂနွေနေ့တွင် ကံစမ်းမဲဖွင့်သည်။ ထိုဖွင့်ပွဲ၌ သူမသည် တန်ဖိုးအများဆုံးဖြစ်သည့် ကျောက်စိမ်းရောင် ဆိုင်ကယ် ( နံပါတ် ယ/၅၅၂၅၉) ကို ပထမဦးဆုံး မဲပေါက်ခဲ့သည်။

ဤကဲ့သို့ ဦးဦးဖျားဖျား ထူးထူးခြားခြား ဆိုင်ကယ်ပေါက်ခြင်းမှာ ဆရာတော်နှစ်ပါးအား ဖိနပ်လှူဒါန်းခဲ့သော စေတနာကြောင့်ဟု ယုံကြည်ယူဆပါကြောင်း ဆရာမဒေါ်ဝင်းမြက ပြောပြပါသည်။

( ဇော်ဝင်းမောင်-ပညာရေး )
********************************************************************************

( ဗောဇ္ဈင်သုတ်တော်အကျိုး )

ညောင် --- ဝေါင်---ဝေါင်--
ခွီး
ဟဲ့--ဟဲ့၊ လုပ်ကြပါဦး၊ သေပါပြီတော်---သေပါပြီ။
စီခနဲ ညံခနဲ အသံရိုင်းများကြောင့် ကျောင်းစာထဲတွင် အာရုံစူးနစ်နေသော ကျွန်မသည် အသံလာရာ အိမ်ရှေ့ ခန်းသို့ လှမ်းကြည့်လိုက်ပါသည်။

ဟောတော့---ကြောင်စုန်းကြီး။
တလသား ကြောင်ပေါက်စကလေးကို လည်မျိုမှ ကိုက်ချီ ယမ်းခါနေသည့် ကြောင်ထီးကြီးအား ကျွန်မသည် လက်လှမ်းမီရာ တုတ်တချောင်းဖြင့် ပစ်ပေါက်ရင်း အိမ်ရှေ့ခန်းသို့ ပြေးလာမိပါသည်။

ကျွန်မသည် သွေးအိုင်ထဲတွင် ငြိမ်သက်နေသည့် ကြောင်ကလေးကို တယုတယ ကောက်ယူလိုက်ပါသည်။ ရင်ဘတ်ကလေးကား နိမ့်ချည်မြင့်ချည်နှင့် အသက်ရှိနေသေးကြောင်း တွေ့လိုက်ရပါသည်။

မေမေရေ၊ ညီမလေးရေ၊ ကြောင်ကလေး မသေသေးဘူး၊ အသက်ရှိသေးတယ်။
သမီးတို့ သူ့အသက်ကို ကယ်ကြရအောင်၊ မေမေ သမီးကို တောင်တန်းသာသနာပြု ဆရာတော်ကြီးရဲ့ ပရိတ်ရေ ပေးပါ။ ညီမလေးက နနွင်းပုလင်း သွားယူ။ ရေနွေးနဲ့ ရေပါ ခပ်လာခဲ့နော်။

ကျွန်မသည် ကြောင်ကလေး၏ လည်မျိုမှ ဒဏ်ရာပေါက်ကို ဆေးကြောပေးသည်။ ထို့နောက် ပရိတ်ရေနှင့် နနွင်းကို ဖျော်ကာ ၄င်းဒဏ်ရာအပေါက်ထဲသို့ သိပ်ထည့်ပေးပါသည်။ ဒဏ်ရာကို အ၀တ်သန့်သန့်ဖြင့် စည်းနှောင်ပေးပြီး တကိုယ်လုံးကို ပရိတ်ရေဖြင့် တောက်ပေးပါသည်။ ထို့နောက် ဘုရားစင်ရှေ့တွင် ကြောင်ကလေးကို ချထားပြီးသော်-

အရှင်ဘုရား၊ တပည့်တော်မ၏ ဦးခေါင်းထက်တွင် ခေတ္တရပ်တည် စံပယ်တော်မူပါဘုရား။ တပည့်တော်မသည် ငါးပါးသီလအကျင့်မြတ်ကို စောင့်ထိန်းပါသည်ဘုရား။ ဘုရား တရား သံဃာတော်များကိုလဲ ယုံကြည်စွာ ကိုးကွယ် ဆည်းကပ်ပါသည်ဘုရား။ ထို့ပြင် ကျေးဇူးရှင် မိဘနှစ်ပါး၏ ကျေးဇူးတရားများကိုလဲ အောက်မေ့လျက် ရိုသေစွာ လုပ်ကျွေးပါသည်ဘုရား။ တပည့်တော်မအပေါ် ပြုဖူး ပေးဖူး ကျွေးဖူး အကျိုးဆောင်ပေးဖူးသော မိတ်ဆွေများ၏ ကျေးဇူးတရားများကိုလည်း အစဉ်နှလုံးသွင်းလျက် ပြန်လည်တုံ့ပြန်ရန် ကြိုးစားလျက် ရှိပါသည်ဘုရား။

ဤစကားများသည် မှန်ကန်ပါသည်ဘုရား။ ဤမှန်ကန်သော သစ္စာစကားကြောင့် ယခု ဝေဒနာခံစားနေရသော ကြောင်ကလေး အသက်ရှင်ပြီး ဝေဒနာမှ သက်သာပျောက်ကင်းပါစေကြောင်း ကြီးမားသောမေတ္တာ စေတနာဖြင့် ဆုတောင်းအပ်ပါသည်ဘုရား-ဟု တိုင်တည်ကာ ဗောဇ္ဈင်္ဂသုတ်တော်ကို ဝေဒနာကျရောက်နေသော ကြောင်ကလေးအတွက် ဌာန်ကရိုဏ်းကျကျ ပီပီသသ ရွတ်ဖတ်ပေးပါသည်။

ထိုသို့ ရွတ်ဖတ်နေစဉ် နာရီဝက်ခန့်အကြာ၌ ကြောင်ကလေးမှာ မျက်လုံးလေး ပွင့်လာသည်ကို တွေ့ရပါသည်။ မေတ္တာစိတ်ဖြင့် ဆက်လက် ရွတ်ဖတ်ရာ နောက်ထပ် နာရီဝက်ခန့်ကြာသော် ကြောင်ကလေးသည် ညောင်-ခနဲ အော်ကာ ယိုင်တိယိုင်ထိုးဖြင့် ထလာပါသည်။ ကျွန်မ၏ ၀မ်းသာပီတိဖြစ်မှုကား နှိုင်းဆဖွယ်ရာ မရှိတော့ပါ။

( တက္ကသိုလ် ခင်မြတ်နိုး )
*********************************************************************************

( မီးကိုတားဆီး ၂၄-ပစ္စည်း )

စာရေးသူ၏ ဖခင် ဦးမြဇော်သည် စကားပြောရာတွင် ချိုချိုသာသာဖြင့် အပိုအလိုမရှိ ပြောဆိုတတ်သည်။ မဟုတ်မမှန်သောစကား၊ ရုန့်ရင်းကြမ်းထမ်းသောစကားတို့ကို ဘယ်သောအခါမျှ မပြောခဲ့ပါ။
ဖခင်ကြီးသည် သူ့အသက်ကို သတ်ဖို့ဝေးစွ၊ သူ့အားလာကိုက်နေသည့် မှက်၊ ခြင်၊ ယင် စသည့် အကောင်ငယ်လေးများကိုပင် မေတ္တာစိတ်ဖြင့် သည်းခံခွင့်လွှတ်ခဲ့ပါသည်။

ဖခင်ကြီးသည် သေရည်သေရက်သောက်စားဖြင့်၊ လောင်းကစားခြင်းအမှုတို့ကို စမ်းသပ်သည့်သဘောမျှပင် မပြုလုပ်ခဲ့ပါ။ သူတပါး၏ ပစ္စည်းဥစ္စာများကိုလည်း ပိုင်ရှင်မသိအောင် ခရမ်းသီးတလုံး၊ ဟင်းရွက် တညွန့်မျှပင် မဆွတ်ခူးခဲ့ပါ။ အမှန်တကယ် လိုအပ်လျှင် ပိုင်ရှင်ထံ တောင်းယူတတ်သည်။

ဖခင်ကြီးသည် ဤသို့ နေလာရင်း တဖက်မှ ဘာသာတရားကိုလည်း လေးလေးစားစား အရေးထားခဲ့သည်။ ညစဉ် ဘုရားရှိခိုးပြီးတိုင်း အရပ်ရှစ်မျက်နှာကို ပဋ္ဌာန်း ၂၄-ပစ္စည်းဖြင့် စည်းချပြီးမှ အိပ်လေ့ရှိသည်။ မိမိ အနှစ်သက်ဆုံး ပရိတ်နှင့်ဂါထာ တို့ကိုလည်း မပြတ်မလတ် ရွတ်ဆိုလေ့ရှိသည်။

တနေ့တွင် ဖခင်ကြီးအိမ်၏ အရှေ့တောင်ဘက် တခေါ်လောက်အကွာရှိ အိမ်တအိမ်တွင် မီးလောင်ပါသည်။ မီး စတင်လောင်သည့်အိမ်၌ လူကြီးတယောက်မျှ မရှိသဖြင့် မီးတောက်ကြီး အိမ်ခေါင်ပေါ်တက်လာမှ သိကြရသည်။
ထိုအချိန်သည် ရွာသားများ တောသွားနေချိန်ဖြစ်၍ ရွာထဲတွင် ယောက်ျားသားမရှိသလောက် ဖြစ်နေသည်။ ဖခင်ကြီးလည်း တောသွားဆဲဖြစ်သည်။ အိမ်တွင် မိခင်ကြီးနှင့် ညီမငယ်လေး တယောက်သာ ရှိသည်။

ဖခင်ကြီးသည် တောထဲမှာ အလုပ်လုပ်ရင်း ရွာပေါ်မှ မီးခိုးလုံးများကို လှမ်းမြင်လိုက်ရာ ချက်ချင်းထပြေး လာသည်။ ပါးစပ်မှလည်း ဘုရားကယ်တော်မူပါ-ဟု ဆို၍ ပဋ္ဌာန်း ၂၄-ပစ္စည်းကို ရွတ်ဆိုလာသည်။
ရွာထဲသို့ ၀င်လိုက်သည်နှင့် စလောင်သည့်အိမ်ကို သိလိုက်သည်။ ထိုအိမ်နှင့် အိမ်နီးချင်း မဝေးသဖြင့် မိမိတို့အိမ် ဘယ်နည်းနှင့်မှ မလွတ်နိုင်ဟု တထစ်ချ ယူဆလိုက်ပါသည်။

အိမ်သို့ရောက်လျှင် မီးသည် ဖခင်ကြီး၏ အိမ်ကို ကျော်သွားသည်။ အနောက်မြောက်ဘက်ရှိ အိမ်များသို့ ကူးစက် လောင်နေသည်။ ထိုအချိန်က ၀ိုင်းထဲက ပဲစင်းငုံ အမှော်များ တောင်လိုပုံထားဆဲ ဖြစ်သည်။ ၄င်းပေါ်သို့ မဆိုစလောက် မီးပွားလေးတပွား ကျလျှင်တောင် တွေးရဲစရာမရှိပါ။ ယခုမူ မီးသည် ဖခင်ကြီး၏အိမ်ကို ကျော်သွားသဖြင့် တရွာလုံးက အံ့သြမဆုံး ရှိကြသည်။ အမျိုးမျိုးလည်း ထင်ကြေးပေး ဝေဖန်ခဲ့ကြသည်။

အမှန်မှာ အခြားမဟုတ်၊ ဖခင်ကြီးသည် ငယ်စဉ်တောင်ကျေး ကလေးအရွယ်ကတည်းက ယနေ့ အသက် ၆၀-ကျော်သည်အထိ ၅-ပါးသီလကို ခါးဝတ်ပုဆိုးကဲ့သို့ မြဲမြံခြင်း၊ ညစဉ် ပဋ္ဌာန်း ၂၄-ပစ္စည်းဖြင့် အရပ်ရှစ်မျက်နှာကို စည်းချအိပ်ခြင်း စသည့် အကျိုးတို့ကြောင့် ဤကဲ့သို့ မီးဘေးမှ လွတ်မြောက်ခဲ့သည်ဟု ယုံကြည်ယူဆကြပါသည်။

( ခင်မောင်တင်-၀ဲလောင် )

( မြတ်မင်္ဂလာ ၁၉၉၆-ခု မေလ )

Posted by: mingala at 6:26 AM