ဒီကမ္ဘာကြီးထဲက ထွက်ခွါသွားဖို့ ဘာကြောင့် ခက်ခဲရပါသလဲ
သေခြင်းတရားဆိုတာ လူအများစုအတွက် မလိုလားအပ်တဲ့ ဖြစ်ရပ်တစ်ခုပါ။ ဒုက္ခတွေ တစ်လှေကြီး ဖြစ်ပင်ဖြစ်လင့်ကစား ကျေနပ်နှစ်သက်ဖွယ်ရာ တဏှာတွေ ဗလပွနှင့်အတူ အသက်ရှင် ရပ်တည်ရတဲ့ အလုပ်ကတော့ ဘယ်သောအခါမှ ပြီးဆုံးသွားတယ် ဆိုတာ မရှိပါဘူး။ သေခြင်းတရား တည်းဟူသော အစစ်အမှန်တရားနှင့် နေရတာထက် ပျော်ရွှင်မှုသုခ တည်းဟူသော လှည့်စားမှုတွင်သာ သက်တောင့်သက်သာရှိသည်ဟု ထင်နေကြတယ်။ သူတို့တွေ သေခြင်းတရားအကြောင်းသာ လုံးဝ စဉ်းစားကြရမည် ဆိုလျှင်တော့ မိုးကုန်ခါနီးမှ ထွန်ရေးချရသလို ဖြစ်ပါလိမ့်မည်။
လောကီဘဝကို တပ်မက်ငြိတွယ်မှုက သေခြင်းတရားကို ကြောက်ရွံ့စိုးရိမ်မှုကို ဖန်တီးပါတယ်။ သို့သော်လည်း သစ္စာတရားကတော့ ဘဝမှန်သမျှ ဒုက္ခမျှသာ ဖြစ်ပါတယ်။ သေခြင်းတရား ဆိုတာ သဘာဝတရားဖြစ်သည့် အပြင် ရှောင်လွှဲလို့လည်း မရပါဘူး။ သေခြင်းတရားဟာ တွေးကြည့်တာရဲ့ တဝက်တောင်မှ ကြောက်လန့်စရာ မကောင်းပါဘူး။ သေခြင်းတရားရဲ့ အာရုံပုံရိပ်တွေကို ဖန်တီးပြီး ဖုံးအုပ်ထားဖို့ စိတ်မှာ စွမ်းရည်ရှိပါတယ်။ အကြောင်းကတော့ ရေနစ်တော့မည့် လူဟာ ကောက်ရိုးလေး တစ်မျှင်ကိုတောင် ဆွဲကိုင် ဖက်တွယ်ထားမှာ ဖြစ်သလို ဘဝကို မမြဲခြင်း၊ ကျေနပ်နှစ်သက်ဖွယ်ရာ မရှိခြင်း တရားတွေနှင့် လေ့ကျင့်ပေးမထားတဲ့ စိတ်ဟာ စိတ်လှည့်စားမှု အာရုံတွေကို ကပ်ငြိ စွဲကိုင်ထားတော့တာ ပါပဲ။
ဒီလို ကပ်ငြိမှုဟာ ဘဝကို မျှော်လင့်ချက် မရှိတော့ပြီလို့ ထင်ရတဲ့ အခါမှာတော့ ခွင့်လွှတ်တော်မူပါကြောင်းနှင့် ကောင်းကင်ဘုံမှာ နေရာလေး ပေးသနားတော် မူပါမည့်အကြောင်း စိတ်ကူးထဲက အနန္တတန်ခိုးတော်ရှင်ကို ထက်ထက်သန်သန်ကြီး ဆုတောင်းနေသူတွေ အတွက်ပင် စိုးရိမ်ပူပန်မှုကို ဖြစ်စေပါတယ်။ သေခြင်းတရားကို ကြောက်ရွံ့မှုဟာ အတ္တကို အလိုလို ထိန်းသိမ်းထားမှုရဲ့ သရုပ်သကန်ဆိုတာ အမှန်ပါပဲ။ သို့သော်လည်း အဲဒီ ကြောက်ရွံ့မှုကို အောင်နိုင်ရေး နည်းလမ်းရှိပါတယ်။ နောက်ဘဝမှာ မျှော်လင့်ချက်နှင့် ယုံကြည်ချက် ရရှိဖို့ ကိုယ်ကျိုးမဖက် အများကျိုးအတွက် ဆောင်ရွက်ပါ။ ပရဟိတအလုပ်က အတ္တနှင့် ပတ်သက်တဲ့ တွယ်တာမှု မှန်သမျှကို နှုတ်ပယ်ပစ်တတ်ပါတယ်။
စိတ်ဖြူစင်သန့်ရှင်းမှုနှင့် လောကီဥစ္စာတွေကို တွယ်တာမှုကင်းခြင်းက ဒီလောကမှ ပျော်ပျော်ကြီး ထွက်ခွါသွားဖို့ သေချာစေပါလိမ့်မည်။ အဲဒါကတော့ ဘဝရဲ့ မမြဲခြင်းသဘောကို နားလည် သဘောပေါက်ဖို့ သေခြင်းတရားကို အမြဲမပြတ် ဆင်ခြင်ပွားများမှုနှင့် သေခြင်းတရားကို ကြောက်ရွံ့စေတတ်သော မှားယွင်းသည့် ဘဝနေနည်းကို အမှန်ပြုပြင်ပေးတတ်သည့် ဉာဏ်ပညာ ဖြစ်ပါတယ်။ ဘဝရဲ့ ရှောင်လွှဲမရသည့် မကောင်းသည့်အချက်များနှင့် အမှန်တရားများကို ရင်ဆိုင်ဖို့ စိတ်အားသတ္တိမြှင့်ပါ။ လက်တွေ့မကျသည့် ရည်မှန်းချက်များကို ရှောင်ပါ။ မိမိကိုယ်ကိုယ် ယုံကြည်ကိုးစားမှုကို ကြီးထွားအောင်လုပ်ပါ။ အဲဒီလို လုပ်လျှင် ဘဝ၏ အခက်အခဲများကို ပိုမို လွယ်ကူ သက်သာစွာ အောင်မြင် ကျော်လွှားနိုင်ပါလိမ့်မည်။
(ဤတွင် ဆရာတော် Ven. K. Sri Dhammananda ၏ How to Overcome Your Difficulties စာအုပ်ငယ်ကို ဘာသာပြန် တင်ပြသော “အခက်အခဲများ အောင်မြင် ကျော်လွှားနည်း” ပို့စ်များ ပြီးဆုံးပါပြီ။)
နှလုံး စိတ်ဝမ်း အေးချမ်းကြပါစေ။
ဘုန်းဉာဏ်
0 comments:
Post a Comment