နှလုံးကျန်းမာရေးကို မြှင့်တင်ပေးနိုင်မည့် အလေ့အထငါးရပ်
နှလုံးကျန်းမာရေးကို ပိုကောင်းလာစေမည့် အလေ့အထငါးရပ်ကို ဖော်ပြပေးလိုက်ပါတယ်။
၁။ ဒါကို စားပါ-ငါးအဆီ ---
ငါးအဆီမှာ အကျိုးကျေးဇူးများစွာ ပါဝင်ပါတယ်။ လေ့လာမှုများစွာအရ ကိုလက်စထရောပမာဏ မြင့်မားနေသူတွေမှာ ငါးအဆီစားပေးတာဟာ နှလုံးသွေးကြောပြဿနာကို ၂၀-ရာခိုင်နှုန်းနီးပါး လျောကျသွားကြောင်း၊ နှလုံးရောဂါ ထဖူးသူတွေမှာ ငါးအဆီစားပေးတာဟာ ဒုတိယအကြိမ် နှလုံးရောဂါ ထနှုန်းကို ၁၅-၃၀ ရာခိုင်နှုန်း လျော့ကျစေနိုင်ကြောင်း သိရပါတယ်။ ကျန်းမာနေတဲ့ လူအားလုံးဟာ တနေ့မှာ ဖက်တီးအက်စစ် EPA နဲ့ DHA ပေါင်း ၅၀၀ မီလီဂရမ်လောက် မှီဝဲသင့်ပါတယ်။ ဒီပမာဏကိုရဖို့ တပတ်မှာ ငါးဟင်းနှစ်ကြိမ် စားတာ ဒါမှမဟုတ် အားဖြည့်ဆေး မှီဝဲတာတွေ လုပ်ပေးနိုင်ပါတယ်။
၂။ ဆရာဝန်နဲ့တိုင်ပင်ပြီး ဒါကို သောက်ပါ---အက်စပရင် ဆေးပြား---
အက်စပရင်ဆေးပြားဟာ အမျိုးသားတွေမှာ နှလုံးရောဂါထခြင်းနဲ့ အမျိုးသမီးတွေမှာ လေဖြတ်ခြင်း အန္တရာယ်တွေကို လျှော့ချပေးနိုင်ပါတယ်။ ဒါပေမဲ့ အက်စပရင်ဆေးပြားကို ကိုယ့်သဘောနဲ့ကိုယ် မှီဝဲနေတာဟာ အစာအိမ် သွေးယိုမှုဖြစ်နိုင်ခြေရှိကြောင်း ကျွမ်းကျင်သူတွေက ဆိုပါတယ်။ အမျိုးသားတွေအနေနဲ့ အသက် ၄၅-နှစ်မတိုင်ခင်၊ အမျိုးသမီးတွေအနေနဲ့ အသက် ၅၅-နှစ်မတိုင်ခင် အက်စပရင်ကို မမှီဝဲသင့်သေးပါဘူး။ အသက် ၇၉-နှစ်ရောက်ချိန်မှာ အက်စပရင်ဆေး မှီဝဲတာကို ရပ်ပစ်သင့်ပါတယ်။ ဒါ့အပြင် နှလုံးရောဂါကာကွယ်ဖို့ အက်စပရင်ဆေးမှီဝဲမယ်ဆိုရင်လည်း ဆရာဝန်နဲ့ တိုင်ပင်ပြီးမှသာ သောက်ရပါမယ်။
၃။ ဒါကို ကုသပါ-စိတ်ဓာတ်ကျခြင်း ---
စိတ်ဓာတ်ကျခြင်းဟာ နှလုံးရောဂါ ဖြစ်နိုင်စေတဲ့၊ အန္တရာယ်ရှိတဲ့အချက်ပါ။ ၁၂-နှစ်ကြာ လေ့လာမှုအရ စိတ်ဓာတ်ကျနေတဲ့ အမျိုးသမီး ၆၃၀၀၀ ယောက်ဟာ နှလုံးရောဂါနဲ့ ရုတ်တရက်သေဆုံးနိုင်ခြေနှစ်ဆ မြင့်မားကြောင်း သိရပါတယ်။ ဒါကြောင့် စိတ်ဓာတ်ကျနေရင် စိတ်ဓာတ်ကျရောဂါကုဆေးမှီဝဲဖို့ လိုအပ်ပါတယ်။
၎။ ဒါကို ပြုလုပ်ပါ-တရားထိုင်ခြင်း ---
လေ့လာမှုတွေအရ စိတ်ဖိစီးမှုကို လျှော့ချပေးတဲ့နည်းလမ်းတွေဟာ သွေးဖိအားလျော့ကျစေပြီး သွေးလွှတ်ကြောတွေမှာ အဆီခဲပိတ်ဆို့မှုကို လျော့ပါးစေကြောင်း သိရပါတယ်။ နှလုံးသွေးကြာရောဂါရှိတဲ့ အာဖရိကန်-အမေရိကန် လူမျိုး ၂၀၁-ဦးဟာ တရားထိုင်လိုက်တဲ့အခါ တရားမထိုင်သူတွေထက် နှလုံးရောဂါထခြင်း ဒါမှမဟုတ် လေဖြတ်ခြင်းနဲ့ သေဆုံးနိုင်ခြေ ၄၇-ရာခိုင်နှုန်း လျော့နည်းကြောင်း သိရပါတယ်။
၅။ ဒါကို အားပေးပါ-ဆေးလိပ်မသောက်ရ တားမြစ်နေရာများ---
ဆေးလိပ်မသောက်ရဆိုတဲ့ သတိပေးဆိုင်းဘုတ်တွေဟာ ၂၀၀၆-ခုနှစ်လောက်က စပြီး အများပြည်သူနဲ့ ဆိုင်တဲ့ နေရာတွေမှာ တော်တော်များလာပါတယ်။ ကိုလံဘီယာဆေးပညာ တက္ကသိုလ်ရဲ့ လေ့လာမှုအရ အများပြည်သူနဲ့ ဆိုင်တဲ့ နေရာတွေမှာ ဆေးလိပ်မသောက်ရ တားမြစ်ပြီးနောက်ပိုင်းမှာ နှလုံးရောဂါထသူ ဦးရေဟာ ၄၇-ရာခိုင်နှုန်းအထိ လျော့ကျသွားကြောင်း သိရပါတယ်။
ဇွန်ခိုင်ဦး (ဆေးဝါးကျွမ်းကျင်မှုတက္ကသိုလ်)
(Good Health 3-17-10)
0 comments:
Post a Comment