မိန်းခေးရေ
အဲ့ဒီနေ့က မိန်းခေးဆီ
ဖုန်းဆက်ဖြစ်တယ်
“စိမ်းဖန့်ဖန့် မျက်နှာတွေကြား
ပျော်ရဲ့လား အစ်ကို” တဲ့
မေးလိုက်တဲ့ မေးခွန်းပါ။
မိန်းခေးရေ
အစ်ကို ပျော်ပါဘူး
မိသားစုနဲ့ ဝေးနေရတဲ့ဘဝ
ဘယ် နေသားကျတယ်ဆိုတာ ရှိပါ့မလဲ။
မိန်းခေးရေ
နင်က အမေ့လိုပဲ
ပြတ်ပြတ်နဲ့လိုရင်းပြောတယ်
ဒါနဲ့ အမေ့ကို လွမ်းဖြစ်ပြန်ရော။
မိန်းခေးရေ
သတိရတယ်
“အဖေရော နေကောင်းလား” ဆိုတော့
“ကောင်းတယ်..........အငြိမ်မနေတာ ခက်တယ်” တဲ့
ယောက်ဖကလည်း အဲ့လို ပြောဖူးတယ်
ဟုတ်တော့လည်း ဟုတ်တယ်
အဖေက ဆွေမျိုးမက်တယ်
အလှမ်းဝေးတဲ့ ဆွေမျိုးတွေဆီ သွားရတာအမော။
“အဖေစိတ်ချမ်းသာအောင် ထားပါဟ” ဆိုတော့
မိန်းခေးက
“ဟင်း......ဟင်း” တဲ့
အမေ့လို ရွဲ့ရီ ရီတာမလားမသိ
“ထားပါတယ်....ထားပါတယ်” တဲ့
အဖေက ၇၅နှစ်ကျော်ပြီကိုး။
မိန်းခေးရေ
နင်က ကံကောင်းတယ်နော်
အဖေ့အရိပ်အောက်မှာ
အမြဲတမ်းနေခွင့်ရတယ်
ငါကတော့
ဓါးအိမ်မရှိတဲ့ ဓါးတစ်ချောင်းလို
နည်းနည်းနီးလိုက်
ဝေးဝေးရောက်သွားလိုက်
အဝေးရောက်လွမ်းနေခြင်းနဲ့
လွမ်းနေတတ်ပါပြီ။
မိန်းခေးရေ
အဖေနဲ့ မိန်းခေးကို
ငါ လွမ်းတယ်
တစ်ယောက်တည်း ခရီးလွန်သွားတဲ့
အမေ့ကိုလည်း လွမ်းတယ်။
အမေ့ကိုလည်း လွမ်းတယ်။
မှတ်ချက်။ ။(ကျနော့် တစ်ဦးတည်းသော ညီမလေးနေတဲ့ရွာမှာ ကိုယ့်အောက်ကညီမလေးကို မိန်းခေး(မိန်းကလေး)လို့ ချစ်စနိုးနဲ့ခေါ်ကြတယ်)
0 comments:
Post a Comment