ဘန်ကောက် မြန်မာအလုပ်သမားများ ၀ါဆိုသင်္ကန်းကပ်နှင့် တရားပွဲကျင်းပ
ထိုင်းနိုင်ငံ ဘန်ကောက်မြို့ ဘန်းခေး အရပ်ရှိ ၀ပ်တလုံး ဘုန်းတော်ကြီး ကျောင်းတွင် ပြီးခဲ့သည့် တနင်္ဂနွေနေ့က မြန်မာ အလုပ်သမားများ စုပေါင်း၍ ၀ါဆိုသင်္ကန်း ကပ်ပွဲနှင့် တရားပွဲ ကျင်းပသည်။မြန်မာနိုင်ငံသား စာသင်သား ရဟန်း ၉၀ ကျော်နှင့် ပင့်ဖိတ်သံဃာ အပါအ၀င် သံဃာတော် ၁၀၀ ခန့်ကို ဘန်ကောက် မြို့ဝန်းကျင်ရှိ စက်ရုံ အလုပ်ရုံ အသီးသီးမှ မြန်မာအလုပ်သမားများက ၀ါဆို သင်္ကန်း ဆက်ကပ်လှူဒါန်းကြောင်း သိရ သည်။
ဝါဆို သင်္ကန်းကပ်ပွဲသို့ ကြွလာသည့် သံဃာတော်များ (ဓာတ်ပုံ - ဧရာဝတီ)
နေ့လယ်ပိုင်းတွင် မြန်မာနိုင်ငံမှ နာမည်ကြီး ဓမ္မကထိက ဒယ်အိုးဆရာတော် အမည်ရ ဆရာတော် ဦးသုမင်္ဂလ က တရားဟောကြားရာ ထောင်နှင့်ချီသော မြန်မာတရားနာ ပရိသတ်များ သဘောကျ နှစ်ခြိုက်ခဲ့ကြောင်းလည်း သိရှိရ သည်။
ဘန်ကောက်မြို့ ဘန်ဘော် ဧကချိုင် ၆၆ လမ်းရှိ အထည်ချုပ် စက်ရုံတခုမှ မ မဉ္ဖူက“ဒီဆရာတော်ရဲ့ တရားခွေတွေကို နာပြီးကတည်းက ကြည်ညိမှု အပြည့်ရှိတာဆိုတော့၊ အခုလို ကိုယ်တိုင် တရားနာခွင့်ရတော့ အရမ်းပီတိဖြစ်မိတာပေါ့၊ သူ့ရဲ့တရားက တပုဒ်နာရင် ကိုယ်တွေလိုမျိုး လူတွေအတွက်က လိမ္မာရေးခြားတခု တိုးတယ်လေ”ဟု ပြောသည်။
တရားပွဲသို့ စက်ရုံအလုပ်ရုံများမှ မြန်မာပရိသတ် ၁၅၀၀ ကျော် လာရောက်ခဲ့ကြောင်း၊ ထိုနေ့က ဦးသုမင်္ဂလ ဟောကြား ခဲ့သည်မှာ“ကျေးဇူးမဲ့ မဖြစ်စေနဲ့”အမည်ရှိ တရားတော်ဖြစ်ကြောင်း သိရသည်။
ဝါဆိုသင်္ကန်း ကပ်ပွဲတွင် တရားဟောမည့် ဆရာတော် ဦးသုမင်္ဂလ (ဓာတ်ပုံ - ဧရာဝတီ)
ယခုတရားပွဲကို ထိုင်းနိုင်ငံအတွင်းရှိ တက္ကသိုလ် အသီးသီး၌ ၀ိဇ္ဇာတန်း၊ မဟာဝိဇ္ဇာတန်းများတွင် ပညာသင်ကြားနေကြ သော မြန်မာနိုင်ငံသား စာသင်သား ရဟန်းတော်များမှ ဦးဆောင်ကာ မြန်မာအလုပ်သမားများက ပထမ အကြိမ် ၀ါဆို သင်္ကန်းကပ်ပွဲကျင်းပရာတွင် ဆရာတော်ကို ပင့်ဖိတ်၍ ကျင်းပကြခြင်းဖြစ်ကြောင်း သိရသည်။
ဆရာတော် ဦးသုမင်္ဂလသည် ပြီးခဲ့သည့် မေလ အတွင်းကလည်း မဲဆောက်မြို့ရှိ မြန်မာပြည်သား အလုပ်သမားများ ကို တရားဟောခဲ့သေးသည်။
ဆရာတော် ဦးသုမင်္ဂလ တရားပွဲလာသည့် မြန်မာ အလုပ်သမား တရားနာ ပရိသတ်များကို ဤကဲ့သို့ တွေ့ရ (ဓာတ်ပုံ - ဧရာဝတီ)
ဦးသုမင်္ဂလသည် သက်တော် ၄၃ နှစ် ၊ ၀ါတော် (၁၅) ၀ါရှိ၍ မန္တလေး တက္ကသိုလ်မှ ဓာတုဗေဒ အထူးပြု ဘာသာရပ် ဖြင့် သိပ္ပံဘွဲ့ ကို ရရှိခဲ့သည်။ မန္တလေးတိုင်း မိုးကုတ်မြို့ဇာတိဖြစ်ပြီး မိုးကုတ် ၀ိပဿနာတိုက်တွင် တရားအားထုတ်ခြင်း၊ တရားဟောခြင်းများ ပြုလုပ်ခဲ့သည်။
လွန်ခဲ့သော လေးနှစ်ခန့်က စတင်ကာ မြန်မာနိုင်ငံ အနှံ့လှည့်လည်၍ တရားဟောကြားခဲ့သည်။ လက်ရှိ ရန်ကုန်တိုင်း မှော်ဘီမြို့ မင်္ဂလာကျောင်းတိုက်တွင် သီတင်းသုံးသည်။
ဧရာဝတီ
0 comments:
Post a Comment