ချိုပြုံးလည်း လွမ်းနေရတဲ့ မစဉ်းစားခြင်း သေတ္တာ။
ဒီကမ္ဘာမှာ ငါ့ကိုချစ်တဲ့လူဘောလုံးတစ်သင်းစာလောက်မှ ရှိရဲ့လား
မစဉ်းစားတော့ပါဘူးတဲ့။
မောင်ချောနွယ်
(မစဉ်းစားခြင်းသေတ္တာ)
ဒီနေ့မနက်ခင်းမှာတော့ သူ့ရဲ့ ဖွင့်လက်စသင်တန်းလေး တစ်ပတ်ခန့်နားထားမယ့်အကြောင်း မိတ်ဆွေ ရဟန်းတော်များကို ကြေငြာဖြစ်ပါတယ်။ တစ်နေ့ သင်တန်းငါးကြိမ်အပြင် နှစ်ပတ်လည်စာစောင်ထုတ်ဝေရေး အတွက် ကုလားဒီဇိုင်နာဆရာရဲ့ အလုပ်ခန်းလေးကို နေ့စဉ်သွားရတဲ့ကိစ္စကလည်း အချိန်အများကြီး စားပါတယ်။ ကုလားဒီဇိုင်နာဆရာကလည်း အပ်သမျှအလုပ်တွေကို အကုန်လက်ခံတတ်လေတော့ အလုပ်အပ်သူဘေးမှာ ရှိမှပဲ ထလုပ်တတ်တာပါ။ ဒီကြားထဲ သူ့ရဲ့ လုပ်ဖော်ကိုင်ဖက်ပါဠိပါမောက္ခကလည်း အဘိဓမ္မာကျမ်းတစ်ကျမ်း ဘာသာပြန်ဆိုရေးအတွက် အကူအညီတောင်းနေပြန်တော့ နေ့စဉ်တစ်နာရီခန့် အချိန်ပေးရပြန်ပါသေးတယ်။
လတ်တလောဖြေရှင်းရမယ့် ပြဿနာက စိတ်ကြိုက်အိမ် ရှာမတွေ့သေးတာပါ။ မဇ္ဈိမတိုင်းရောက် ရွှေပြည်ကြီး သားရဟန်းတော်တွေအတွက် အိမ်ငှါးတဲ့အခါ အဓိကအချက်နှစ်ချက်နဲ့ စဉ်းစားရတာပါ။ လွတ်လပ်စွာ ချက် ပြုတ်ခွင့်ရှိမရှိနဲ့ သီးသန့်ဖြစ်မှုရှိမရှိပါပဲ။ တစ်ချို့အယူသည်းအိမ်ရှင်တွေက သက်သတ်လွတ်ပဲ လက်ခံတတ် ပါတယ်။ ရွှေပြည်သားရဟန်းတော်တွေကတော့ ငါးပိကျိုချက်ခွင့်ရရေးကို ဦးတည်ချက် ထားရလေ့ရှိပါတယ်။
ပြီးတော့ ရဟန်းတော်တွေပဲ စုပေါင်းနေထိုင်တဲ့အခါ သီးသန့်ဖြစ်ရေးဟာလည်း အရေးကြီးပါတယ်။ ကုလားမ တွေရဲ့ ဆာရီနဲ့ အခြားအရာများလှမ်းထားတဲ့ အ၀တ်ကြိုးတမ်းတွေနဲ့ ကင်းလွတ်ရေးပါပဲ။ တက္ကသိုလ် အဆောင် မှာတော့ ငါးပိကျိုပြီဆိုရင် ပုဏ္ဏားကျောင်းသားတွေ နှာခေါင်းရှုံ့ပြီး ထွက်ပြေးလေ့ရှိတာကိုး။ အင်း ပယ်ရမယ့် ရသတဏှာထဲမှာ ငါးပိရည်ကို စာရင်းမတို့နိုင်သေးသမျှတော့ “သဗ္ဗေမြန်မာ ငါးပိရည်ဋ္ဌိတိကာ” ကိုပဲ ဆက်ရွတ်ရပေဦးမပေါ့။
ဘာပဲဖြစ်ဖြစ် မိတ်ဆွေရဟန်းတော်တွေကတော့ သူ့အတွက် နေရာမျှဝေပေးဖို့ ဖိတ်ခေါ်ကြတာ ကျေးဇူးပါ။ လာနေပါပေါ့။ သူကလည်း တစ်ကိုယ်တည်းအတွက်ဆိုရင်တော့ ကိုယ်ပိုင်အခန်းနဲ့ မနေတတ်တာကြာပါပြီ။ ဗာရာဏသီမှာ သူမခိုမကပ်ဖူးတဲ့ အခန်းရယ်လို့ မရှိသလောက်ပါပဲ။ သူရောက်တဲ့နေရာ၊ သူတည်းခိုမိတဲ့ အခန်းတွေဟာ သူ့စာသင်ခန်းလေးတွေ ဖြစ်ခဲ့ဖူးသေးရဲ့။ တွေ့တဲ့စာအုပ်တွေ လျှောက်ဖတ်ပြမိတာကိုး။ နားညီးတဲ့လူထသွားကြစေပေါ့။ သူ့မိတ်ဆွေရဟန်းတော်တွေကိုလည်း သင်တန်းစည်းကမ်း ထုတ်ပြန်ထား ပါသေးတယ်။ ပျင်းတဲ့နေ့ ကျောင်းမတက်ရ။ စိတ်ကူးပေါ်တဲ့နေ့ အချိန်မရွေးပြန်လာနိုင်သည်ပေါ့လေ။ အဆင် ပြေပါတယ်။ ခုတော့ သူ့အနေနဲ့ သတ်သတ်မှတ်မှတ်ဆိတ်ငြိမ်ကျယ်ဝန်းတဲ့ စာသင်ခန်းလေးအတွက်ပါ စဉ်းစားနေမိတာပါ။
ဘာရယ်မဟုတ်ပါဘူး၊ ဘလော့စာမျက်နှာမှာ တစ်နေ့စာ ကွက်လပ်ချန်မထားချင်လို့ ကောက်ရေးမိတဲ့စာပါ။ ဘာပဲဖြစ်ဖြစ် ဒီနေ့မှာ မှတ်မှတ်ရရ သူ့မယ်တော်ဖြစ်တဲ့ အကယ်ဒမီဒေါ်ချိုပြုံးဆီက ပို့လိုက်တဲ့ သားရဟန်း အတွက် စာလေးတစ်စောင်တော့ ဖတ်ရပါတယ်။ ဗုဒ္ဓဂယာ ဘုရားဖူးရောက်လာတဲ့ တေးရေးဆရာပုဏ္ဏက နဲ့အတူ ထည့်ပေးလိုက်တဲ့ စာလေးတစ်စောင်ထဲမှာ အများဆိုင်စာမျက်နှာတော့ မပါခဲ့ပါဘူး။ ရိုးရိုးလေးပါပဲ။ ပုဂ္ဂလိက အကြောင်းအရာလေးအချို့နဲ့ “စိတ်ရွှင်လန်းချမ်းမြေ့ပါစေ”ဆိုတဲ့စာပိုဒ်လေးနောက်မှာ “မယ်တော်ချို” လို့ လက်မှတ်ထိုးထားရုံလေးပါပဲ။
၂၀၀၈ နှစ်ပတ်လည်စာစောင်မှာ မယ်တော်ချိုရေးတဲ့ စာလေးတစ်ပုဒ်ကိုတော့ သတိရမိပါသေးတယ်။ ဗုဒ္ဓဂယာ ကို ဘုရားဖူးလာရင်း ပြန်ရတော့မယ့်ဆဲဆဲ လေယာဉ်ပေါ်တက်ခါနီး အခိုက်အတံ့လေးကို ဖွဲ့တဲ့စာပါ။
“အော် ချိုပြုံးလည်း လွမ်းနေရဆဲပါပဲလား၊ သို့သော် သည်အလွမ်းက လောကီဆန်လွန်းသော အလွမ်းတော့ မဟုတ်၊ သားရဟန်းတို့၏ အနာဂတ်သာသနာ့အရေး မျှော်တွေးအားတက်နေမိသည့် မိခင်တစ်ယောက်၏ မုဒိတာယှဉ်သောအလွမ်းပါပေ” တဲ့။
တေးရေး ဆရာကြီးပုဏ္ဏကကိုတော့ ဗာရာဏသီမြို့ပြနဲ့ ဂင်္ဂါရှုမျှော်ခင်းကို တစ်ညနေခင်းလုံးလိုက်ပြမိ ပါသေးတယ်။ အော်တိုကားလေးစီးရင်း ဗာရာဏသီကို လက်ညွှန်းထိုးပြပြီး ဗာရာဏသီအကြောင်းပြောပြရတာ အရသာရှိပါတယ်။
တေးရေးဆရာကြီးဆီက ကြားရတဲ့ စကားတစ်ခွန်းက ရင်ကို ထိပါတယ်။ သားသမီးတွေရှိပြီး သားသမီးတွေရဲ့ အဖေလို့အခေါ်မခံရတဲ့ အဖေပါဘုရားတဲ့။ ရင်သွေးတွေက Handicapped လေးတွေပါတဲ့။ သူလည်း ရောထွေး ကြေကွဲမိပါသေးတယ်။
မစဉ်းစားတော့ပါဘူး။
0 comments:
Post a Comment