ကျားနှုတ်ခမ်းမွှေး
တနင်္လာနေ့၊ နိုဝင်ဘာလ ၂၊ ၂၀၀၉
တောင်ပေါ်မှာရှိတဲ့ အဘိုးအိုရဲ့ အိမ်ကလေးထဲ ယွန်းနုတ် ၀င်သွားတော့ အဘိုးအိုကို မီးဖိုရှေ့မှာ ထိုင်နေတာ တွေ့ရတယ်။ သူ့ကိုလှည့်မကြည့်ဘဲ အဘိုးအိုက မေးတယ်။
“ဘာလို့လာတာလဲ့” တဲ့။
“ပညာရှိ ဘိုးဘိုးရယ်၊ ကျွန်မ ဒုက္ခရောက်နေလို့ပါ။ ကျွန်မအတွက် ဆေးတစ်ခွက်စီရင်ပေးဖို့ လာပြီးတောင်းပန်တာပါ၊” ယွန်နုတ်က ပြောတော့……
“လာပြန်ပြီလား ဆေးတစ်ခွက်၊ ဟိုလူလာလဲ ဒါပဲ၊ ဒီလူလာလဲ ဒါပဲ၊ တစ်လောကလုံးရဲ့ ရောဂါတွေ ကုဖို့ ငါဘယ်လိုလုပ် ဆေးဖော်ပေးနိုင်မလဲ၊”
အဘိုးအိုက ဆိုတော့ ယွန်နုတ်က ပျာပျာသလဲနဲ့
“ဆရာကြီးရယ် .. ဆရာကြီးသာမကယ်ရင်တော့ ကျွန်မ ဒုက္ခလှလှကြီးရောက်ပါပြီ” လို့ပြောရှာတယ်။
“ကောင်ပြီ၊ မင်းဘာဖြစ်သလဲပြော၊” အဘိုးအိုက အလျှော့ပေးလိုက်တယ်။
“ကျွန်မရဲ့ခင်ပွန်းအတွက်ပါ ဘိုးဘိုး၊” ယွန်နုတ်ကပြောပြတယ်။
ကျွန်မအလွန်ချစ်ရတဲ့ ယောက်ျားပါ၊ သူက လွန်ခဲ့တဲ့ သုံးနှစ်လုံးလုံး စစ်ထဲလိုက်သွားရပါတယ်၊ အခု ပြန်ရောက်လာတဲ့အခါ သူ ကျွန်မကို စကားကောင်းကောင်းမပြောဘူး၊ ဘယ်သူ့ကိုမှလဲ မပြောဘူး၊ ကျွန်မပြောရင်လဲ မကြားသလိုပဲ၊ တစ်ခါတစ်လေ သူစကားပြောပြန်တော့လဲ ချိုချိုသာသာ မဟုတ်ဘူး၊
ထမင်းကျွေးလို့ သူမကြိုက်တဲ့ ဟင်းပါရင် ထမင်းပွဲကို တွန်းပစ်ခဲ့ပြီး အခန်းထဲက ဒေါသတကြီး ထွက်သွားတယ်၊ တစ်ခါတစ်လေ လယ်ထဲ အလုပ်လုပ်ရမယ့်အချိန်မှာလဲ မလုပ်ဘဲ ဟိုး…. တောင်ထိပ်ပေါ်တက်ပြီး ပင်လယ်ဘက်ကို သွားငေးကြည့်နေတယ်။
“ဟုတ်တယ်၊ စစ်ပွဲက ပြန်လာတဲ့ လူငယ်တွေ တစ်ခါတစ်လေ ဒီလိုဖြစ်တတ်တာပဲ၊” အဘိုးအိုက ဆိုတယ်။
ကဲ.. ဆက်ပြောစမ်းပါဦး… နောက် ဘာဖြစ်သေးလဲ၊
ဖြစ်တာကတော့ ဒါပါပဲ ပညာရှိ ဘိုးဘိုးရယ်၊ အဲဒါ ကျွန်မခင်ပွန်းကိုသာ နဂိုကလို ပြန်ပြီး ချစ်ချစ်ခင်ခင် ရှိလာအောင် ကုစားပေးနိုင်မယ့် ဆေးတစ်ခွက် ဖော်စပ်ပေး စေချင်တာပါပဲ၊
အင်း….. လွယ်ပါတယ်ကွာ၊ ဆေးတစ်ခွက်ရမယ်၊ ကောင်းပြီ၊ နောက်သုံးရက်ကြာရင် လာခဲ့ကွာ၊ အဲဒီခါကျတော့ ဆေးဖော်ဖို့ ဘာတွေလိုမလဲဆိုတာ ငါပြောမယ်။
သုံးရက်မြောက်တဲ့နေ့မှာ တောင်ပေါ်အဘိုးအိုရဲ့ အိမ်ကလေးကို ယွန်နုတ် ရောက်လာပြန်တယ်။
ငါ စဉ်းစားပြီးပြီကွ၊ အဘိုးအိုက ပြောတယ်။
မင်းဆေးက ဖော်လို့ရပါတယ်။ ဒါပေမဲ့အရေးအကြီးဆုံး ဆေးတစ်မည် လိုနေတယ်။ အဲဒါက ကျားနှုတ်ခမ်းမွှေး တစ်ချောင်းပဲကွ၊ အသက်ရှင်နေဆဲ ကျားဖြစ်ဖို့ လိုတယ်၊ အဲဒါသာ မင်းရလာရင် ငါ ဆေးဖော်ပေးလို့ ရပြီ။
ဟင်…… ကျားအရှင်ဆီက နှုတ်ခမ်းမွှေး ဟုတ်လား?
အဲဒါ ကျွန်မ ဘယ်လိုလုပ် ရနိုင်ပါ့မလဲ၊ ယွန်နုတ် စိတ်ပျက် လက်ပျက် ပြောလိုက်တဲ့အခါ
“ဆေးက သိပ်အရေးကြီးတယ် ဆိုရင်တော့ ရအောင်ရှာပေါ့ကွာ” တဲ့ အဘိုးအိုက ပြောပြီး တစ်ဖက်လှည့်သွားတယ်။
ယွန်နုတ်လည်း အိမ်ပြန်လာခဲ့ရတယ်။
အဲဒီနောက်မှာ ကျားနှုတ်ခမ်းမွှေး ဘယ်လို ရနိုင်မလဲ ဆိုတာကိုပဲ ယွန်နုတ် စဉ်းစားနေတယ်။
တစ်ညမှာတော့ သူ့ယောက်ျား အိပ်နေတုန်း ယွန်နုတ် အပြင်ထွက်တယ်။ သူ့လက်ထဲမှာ ပန်းကန်တစ်လုံးနဲ့ ထမင်းရယ် ဟင်းရယ် ထည့်လာတယ်။ ကျားရှိတယ်ဆိုတဲ့ တောဆီ သူသွားတာကိုး။
ကျားလိုဏ်ဂူနားရောက်တော့ ခပ်ဝေးဝေးက ရပ်ပြီး ကျားကို ထမင်းဟင်းတွေ လာစားဖို့ ခေါ်တယ်။ ကျားက ထွက်မလာဘူး။
နောက်တစ်ည သူ သွားပြန်တယ်။ ဒီတစ်ခါ နည်းနည်း ရှေ့တိုးတယ်။ မနေ့ကလိုပဲ စားစရာ ပန်းကန်ပြပြီး ခေါ်ပြန်တယ်။
ဒီလိုပဲ တစ်ညပြီး တစ်ည ဆက်သွားတယ်။ ကျား လိုဏ်ဂူဝနား နီးသထက် နီးလာပြီ။ ကျားကလည်း ညတိုင်း မြင်ရလို့ တစ်စတစ်စ ပိုရင်းနှီးလာပြီ။
တစ်ညမှာတော့ လိုဏ်ဂူဝနဲ့ ခဲတစ်ပစ်လောက်မှာ သူရပ်မိတယ်။
ကျားက ဂူအပြင်ဘက် သုံးလေးလှမ်း လှမ်းလာပြီး ရပ်ကြည့်နေတယ်။ တစ်ယောက်ကို တစ်ယောက် လရောင်မှာ အပြန်အလှန် ကြည့်နေကြတယ်။
နောက်ညလည်း အဲဒီလိုပဲ။
ဒါပေမဲ့ အများကြီး နီးသွာပြီ။ ယွန်နုတ်က ကျားကို နုနုညံ့ညံ့ ကြင်ကြင်နာနာနဲ့ စကားတွေ ပြောတယ်။
နောက်တစ်ညကျတော့ ကျားက ယွန်နုတ်ကို သေသေချာချာ ကြည့်ပြီးတဲ့နောက် ယွန်နုတ် ပန်းကန်ထဲက အစာတွေကို စားတယ်။
နောက်ညမှာတော့ ယွန်နုတ်သွားတဲ့အခါ ကျား သူ့ကိုထွက်ပြီး မျှော်နေတာ တွေ့ရတယ်။ အစာကျွေးပြီးတဲ့နောက် ကျားရဲ့ဦးခေါင်းကို သူ အသာအယာ ပွတ်သပ်ပေးတယ်။
ဒီလိုနဲ့ ခြောက်လနီးပါး ကြာသွားပြီးတဲ့ တစ်ညမှာတော့ ကျားရဲ့ဦးခေါင်းကို ခါတိုင်းလို ပတ်သပ်ရင်း ယွန်နုတ်က…
“သဘောကောင်းတဲ့ ကျားကြီးရေ၊ ငါ့မှာ မင်း နှုတ်ခမ်းမွေး တစ်ချောင်း ရမှ ဖြစ်မှာမို့ နုတ်ပါရစေ၊ ငါ့ကို စိတ်မဆိုးပါနဲ့ကွယ်” လို့ ပြောပြီး နှုတ်ခမ်းမွှေး တစ်ချောင်း ဆတ်ခနဲ နှုတ်ယူလိုက်တယ်။
သူစိတ်ပူသလို ကျားကြီးက စိတ်ဆိုးမသွားဘူး။
ယွန်နုတ် ၀မ်းသာအားရနဲ့ အိမ်ပြန်ပြေးတယ်။ ကျားနှုတ်ခမ်းမွှေးကို တင်းတင်းဆုပ်ပြီး တအားကို ပြေးတာ၊
နောက်နေ့မနက် တောင်ပေါ်က ပညာရှိ ဘိုးဘိုးရဲ့ တဲကို သူရောက်တော့ နေက ဟိုးပင်လယ်ပြင်ထဲက ထွက်ပြုစပဲ ရှိသေးတယ်။
“ဘိုးဘိုးရေ…. ကျွန်မ ရလာပြီ၊ ကျား နှုတ်ခမ်းမွှေး ကျွန်မ ရလာပြီ” လို့ အော်ဟစ်ပြောဆိုရင်း သူဝင်လာတယ်။
“ဟောဒီမှာ၊ ဘိုးဘိုး ပြောထားတဲ့အတိုင်း ကျွန်မယောက်ျား နဂိုကလို ချစ်ချစ်ခင်ခင် ကြင်ကြင်နာနာဖြစ်လာအောင် လုပ်ပေးနိုင်မယ့် ဆေး ဖော်ပေး ပေတော့၊” တဲ့။
အဘိုးအိုက နှုတ်ခမ်းမွှေးကို ယူပြီး သေသေချာချာ စစ်ဆေးကြည့်ရှုတယ်။ မှန်တယ်။ ဒါ… ကျားနှုတ်ခမ်းမွှေး အစစ်ပဲ လို့ သေချာတော့မှ အဲဒါကို သူ့ရှေ့က မီးဖိုထဲ ပစ်ထည့်လိုက်တယ်။
“ဟင်….. ဘယ်လိုလုပ်လိုက်တာလဲ ဘိုးဘိုး၊” ယွန်နုတ်က အလန့်တကြား မေးတော့….
“မင်း ဘယ်လို ရလာသလဲ ငါ့ကို ပြောပါ၊” တဲ့။ အဘိုအိုက ဆိုတယ်။
ဘယ်မှာ အလွယ်တကူ ရပါ့မလဲ ဘိုးဘိုးရယ်၊
ကျွန်မ ညတိုင်း တောထဲကို ပန်းကန်တစ်လုံးနဲ့အစာတွှေ ထည့်ပြီးသွားတယ်။ ပထမ ကျား လိုဏ်ဂူနဲ့ ခပ်ဝေးဝေး၊ နောက်ပိုင်း မြင်နေကျ ဖြစ်လာတော့ တဖြည်ဖြည်း ခပ်နီးနီး ရောက်အောင် တိုးရတယ်၊ သူ့ကို စကားတွေလဲ နူးနူးညံ့ညံ့ ကြင်ကြင်နာနာ ပြောရတယ်၊ သူကို အနှောင့်အယှက် ပေးဖို့မဟုတ်ဘူး၊ အစာ ကျွေးဖို့လာတာဆိုတာ သူသိအောင်ပေါ့၊ အတော်ကြီးကို စိတ်ရှည်လက်ရှည် လုပ်ရတယ်၊ သူစားမှာ မဟုတ်ဘူးဆိုတာ သိလျက်နဲ့ အစားအစာတွေ ညတိုင်း ထည့်ထည့်သွားရတယ်။
အဲဒီလိုပဲ ဇွဲမလျှော့ဘဲ သွား ချိုချိုသာသာပြော အစာစားဖို့ ခေါ်နဲ့ ရက်ပေါင်းအတော်ကြာလာတော့ တစ်ညမှာ သူ ရှေ့ဘက် နည်းနည်းထွက်လာတယ်၊
နောက်ကျတော့ ကျွန်မကို ထွက်ကြိုတယ်၊ ကျွန်မလက်ထဲက အစာကို စားတယ်၊ သူ့ခေါင်းကို ပွတ်ပေးတော့ ကြောင်ညည်းသလို ညည်းပြီး ငြိမ်ခံတယ်၊ အဲဒီလောက် ရင်းနှီးပြီးတော့မှ သူ့ဆီက နှုတ်ခမ်းမွှေးကို ကျွန်မ နုတ်လို့ ရတာပါ။
“ကောင်းတယ်၊ သိပ်ကောင်းတယ်၊ ကျားကိုယဉ်ပါးအောင် လုပ်ပြီးတော့ သူ့ဆီက မေတ္တာနဲ့ သူ့ရဲ့ ယုံကြည်မှုကို မင်း ရအောင် ယူနိုင်ခဲ့တာပဲ၊” အဘိုးအိုက မှတ်ချက်ချသည်။
“ဒါပေမယ့်… ခုတော့ အဘိုးက အဲဒီ နှုတ်ခမ်းမွှေးကို မီးထဲ ထည့်ပစ်လိုက်ပြီလေ၊
ကျွန်မကြိုးစားခဲ့သမျှ အလဟဿ ဖြစ်ရပြီပေါ့၊” ယွန်နုတ် က ဆိုတော့ အဘိုးအိုက ပြုံးပြီးပြောတယ်။
ဟာ…. ဘယ်ဟုတ်မလဲ၊
အလဟဿလို့ ငါမဆိုဘူး၊ နှုတ်ခမ်းမွှေးက မလိုတော့လို့ ပစ်လိုက်တာ၊
ဒီမှာ ယွန်နုတ်.. မင်းပြောစမ်း၊ ယောက်ျားတစ်ယောက်ဟာ ကျားတစ်ကောင်လောက် ကြောက်စရာ ကောင်းမလား၊ သူ့အပေါ်ထားရှိတဲ့ မေတ္တာ စေတနာ အကြင်နာတွေကို ကျားတစ်ကောင်လောက်မှ မခံယူတတ်ဘဲ နေမလား၊
အင်မတန် ကြမ်းကြုတ်တဲ့ တောရိုင်း တိရစ္ဆာန် တစ်ကောင်ရဲ့ ချစ်ခင် ယုံကြည်မှုကိုတောင် ကြင်နာမှု စိတ်ရှည်ဇွဲရှိမှု စွမ်းအားနဲ့ မင်းရအောင် ယူနိုင်ခဲ့ရင် မင်းယောက်ျားရဲ့ မေတ္တာ အကြင်နာတွေကို မင်း ပြန်မရနိုင်စရာ ဘာအကြောင်းရှိသလဲ၊
အဘိုးအိုစကားကို ကြားနာပြီး ခဏအဖို့ အဲဒီနေရာမှာ ယွန်နုတ် မလှုပ်မယှက် ငြိမ်သက်သွားတယ်။
နောက်တော့မှ…. တစ်ဖြည်းဖြည်း ပြုံးလာပြီး ၀မ်းမြောက်အားတက်စွာနဲ့ တောင်အောက်ကို ပြေးဆင်းသွားတော့တယ်။
မူရင်း။ ။ Harold Courlander ၏ The Tiger’s Whisker; A Korean Folk Tale – ဘာသာပြန်သူ ဖေမြင့်
0 comments:
Post a Comment