မဟောသဓာအပိုင်း- ၂၁
ပြဿနာလေးချက် အဖြေလေးချက်
မင်းကြီးသည် မဟောသဓာ၏ စကားကို ကြားရသောအခါ လေးစားမြတ်နိုးသွားသည်။ ထို့ကြောင့် မဟောသဓာအား ထီးဖြူစိုက်ထားသော ရာဇပလ္လင်ပေါ်၌ ထိုင်စေသည်။ မိမိမူကား ကြမ်းပြင်ပေါ်၌ ထိုင်သည်။ ထို့နောက် နတ်သမီးမေးသော ပြဿနာလေးချက်ကို တစ်ချက်စီမေးသည်။ မဟောသဓာကလည်း ပိုင်နိုင်စွာဖြင့် တစ်ချက်စီ ဖြေဆိုပြသည်။
"သုခမိန်၊ ပထမပြဿနာမှာ လက်၊ ခြေတို့ဖြင့် မျက်နှာကို ပုတ်ခတ်၏။ သူ့ကို ယင်းသို့ပုတ်ခတ်သည့် အတွက် ချစ်နေရသည်။ သူကား မည်သူနည်း"
"အရှင်မင်းကြီး၊ နို့စို့အရွယ် ရင်သွေးငယ်ကို ဆိုခြင်းဖြစ်ပါသည်။ နို့စို့အရွယ် ရင်သွေးငယ်သည် မိခင်က ရင်ခွင်ပိုက်၍ ချော့မြှူသောအခါ မြူးရွှင်လျက် လက်၊ ခြေတို့ဖြင့် မိခင်ကို ပုတ်ခတ် ကန်ကျောက်သည်။ ဆံပင်ကို ဆွဲသည်။ လက်သီးဆုပ်ကလေးဖြင့် မိခင်၏ မျက်နှာကို ထုသည်။ ယင်းသို့ ပုတ်ခတ်သည့် အတွက် မိခင်တို့က ချစ်မဝနိုင်အောင် ဖြစ်နေရပါသည်"
"သုခမိန်၊ ဒုတိယပြဿနာမှာ နှုတ်ကဆဲရေး၏။ သို့ရာတွင် သူမလာမည်ကိုလည်း စိုးရိမ်သည်။ သူ့ကိုပင် ချစ်နေရသည်။ သူကား မည်သူနည်း"
"အရှင်မင်းကြီး၊ ဤပြဿနာမျာ ခုနစ်နှစ်၊ ရှစ်နှစ်အရွယ်ရှိသော သားကလေးကို ဆိုခြင်းဖြစ်ပါသည်။ ခုနစ်နှစ်၊ ရှစ်နှစ်အရွယ်ရှိသော သားသည် မိခင်ဖြစ်သူက လယ်တောသို့ ဖြစ်စေ၊ ဈေးဆိုင်သို့ ဖြစ်စေ အသွားခိုင်းလျှင် မုန့်ပေးမှ သွားမည်ဟု ပြောပါသည်။ မုန့်ပေးလိုက်သောအခါ ခိုင်းရာသို့ မသွား၊ တော်ရာတွင် အခြားကလေးများနှင့် ကစားနေပြီး နောက်မှ ပြန်လာပါသည်။ မိခင်က ထပ်၍ သွားခိုင်းသောအခါ ပြောင်ပြပြီး ထွက်ပြေးပါသည်။ ထိုအခါ မိခင်က မြည်တွန် ဆဲရေးပြီး တုတ်ကိုင်၍ လိုက်ပါသည်။ ယင်းသို့ နှုတ်က ဆဲရေးသော်လည်း စိတ်ထဲက မပါပါ။ နေဝင်၍ အိမ်ပြန်မလာလျှင် 'ငါ့သားသည် ငါဆဲရေး ခြိမ်းခြောက်သောကြောင့် အိမ်မှ ထွက်ပြေးရှာသည်။ ယခု အချိန်တန်သော်လည်း ပြန်မရောက်လာသေး။ အဘယ်အရပ်၌ ရှိနေပါသနည်း' ဟု စိုးရိမ်ပူပန်စွာ လှည့်လည် ရှာဖွေပါသည်။ နောက်ဆုံး ဆွေမျိုးအိမ်တွင် သားငယ်ကို တွေ့မြင်သောအခါ မျက်ရည်ကျလျက် သားငယ်၏ နဖူးဆံစတို့ကို နမ်းရှုပ်ပါသည်။ "ချစ်သား၊ မိခင် ဆဲရေးသည်ကို စိတ်ဆိုးသလော" ဟု ဆိုကာ ချော့မော့၍ အိမ်သို့ခေါ်ဆောင်သွားပါသည်"
"သုခမိန်၊ တတိယပြဿနာမှာ မဟုတ်မမှန် စွပ်စွဲပြောဆို၏။ မခံချင်အောင် မဟုတ်မမှန် ပြောတတ်၏။ ယင်းသို့ ပြောသည့်အတွက်ပင် သူ့ကို ချစ်နေရသည်။ သူကားမည်သူနည်း"
"အရှင်မင်းကြီး၊ ဤပြဿနာကား ညားခါစ ဇနီးမောင်နှံကို ဆိုခြင်းဖြစ်ပါသည်။ ညားခါစ ဇနီးမောင်နှံတို့သည် သင်သည် ငါ့အပေါ်၌ ချစ်စိတ် မရှိ၊ အခြားသူတစ်ယောက်အပေါ်၌သာ ချစ်စိတ်ရောက်နေသည် စသည်ဖြင့် မဟုတ်မမှန် စွပ်စွဲကာ မခံချင်အောင် ပြောဆိုတတ်ကြသည်။ ဤသို့ ပြောဆိုလျက်နှင့်ပင် အချင်းချင်း အလွန်ချစ်နေကြရပါသည်"
"သုခမိန်၊ စတုတ္ထပြဿနာမျာ ထမင်း၊ အဖျော်၊ အဝတ်အစား၊ အိပ်ရာနေရာ စသည်တို့ကို ယူဆောင်၏။ ယင်းသို့ ယူဆောင်သွားသည့်အတွက်ပင် သူ့ကို ချစ်ခင်မြတ်နိုး လေးစားနေရသည်။ သူကားမည်သူနည်း"
"အရှင်မင်းကြီး၊ ဤပြဿနာကား အကျင့်သီလရှိသော ရဟန်း ပုဏ္ဏားတို့ကို ဆိုခြင်းဖြစ်ပါသည်။ သဒ္ဓါတရားရှိသော သူတို့သည် ရဟန်း ပုဏ္ဏားတို့ကို မိမိတို့အား ဆွမ်းဘောဇဉ် စသည်ကို အလှူခံလျှင်လည်း ဝမ်းသာကြသည်။ ပေးလှူကြသည်။ အကယ်၍ အလှူမခံဘဲ မိမိဘာသာ လှူသော ပစ္စည်းတို့ကို ထိုရဟန်း ပုဏ္ဏားတို့က သုံးဆောင်လျှင်လည်း ဝမ်းသာကြပါသည်"
ဤသို့လျှင် ထီးချက်စောင့် နတ်သမီးမေးသော ပြဿနာတစ်ချက်စီကို မင်းကြီးက ပြန်မေးသည်။ မဟောသဓာသုခမိန်ကလည်း တစ်ချက်စီကို သေချာစွာ ရှင်းလင်းဖြေကြားသည်။ ပြဿနာတစ်ချက် ဖြေပြီးတိုင်း ထီးချက်စောင့်နတ်သမီးသည် ကိုယ်တစ်ပိုင်းပြလျက် မဟောသဓာအား ကောင်းချီးပေးသည်။ နတ်ပန်းနံ့သာတို့ဖြင့် ပူဇော်သည်။ နောက်ဆုံးဖြစ်သည့် စတုတ္ထပြဿနာကို ဖြေပြီးသောအခါ၌ကား ထီးချက်စောင့်နတ်သမီးသည် မဟောသဓာကို ကောင်းချီးလည်းပေးသည်။ ရတနာ ခုနှစ်ပါးကိုလည်း ရတနာကလပ်ဖြင့် ထည့်၍ ပူဇော်လေသည်။
မင်းကြီးသည်လည်း မဟောသဓာသုခမိန်အား ရှေးကထက်တိုး၍ ပူဇော်သည်။ စစ်သူကြီးအရာကိုလည်း ပေးလိုက်လေသည်။
(မဟောသဓာအပိုင်း- ၂၂ "သုခမိန်ငါးဦး ပြဿနာ" ဆက်တင်ပါမည်)
0 comments:
Post a Comment