သြကာသထဲက ကံသုံးပါး

သြကာသ သြကာသ သြကာသ … ကာယကံ၊ ၀စီကံ၊ မနောကံ၊ သဗ္ဗဒေါသ၊ ခပ်သိမ်းသော အပြစ်တို့ကို၊ ပျောက်ပါစေခြင်းအကျိုးငှါ၊ ပထမ၊ ဒုတိယ၊ တတိယ၊ တစ်ကြိမ်၊ နှစ်ကြိမ်၊ သုံးကြိမ်မြောက်အောင်၊ ဘုရားရတနာ၊ တရားရတနာ၊ သံဃာရတနာ၊ ရတနာမြတ်သုံးပါးတို့အား၊ ရိုသေမြတ်နိုး၊ လက်စုံမိုး၍၊ ရှိခိုးပူဇော်၊ ဖူးမြော်မာန်လျော့၊ ကန်တော့ပါ၏အရှင်ဘုရား…..

ဒါက မြန်မာဗုဒ္ဓဘာသာတို့ရဲ့ ရင်ထဲအသည်းထဲမှာ စွဲနေတဲ့ အသည်းစွဲဘုရားရှိခိုးလေးပေါ့၊ ဒို့များ ပုဂံခေတ်သာသနာ့ပြုအရှင် ရှင်အရဟံ ပြန်လည်စတင် အုပ်မြစ်ချတည်ထောင် ပေးခဲ့တဲ့ ဗုဒ္ဓဘာသာဝင်တို့ရဲ့အသည်းထဲမှာ သံမှိုနဲ့ရိုက်ခက်ထားသလို စွဲနေတဲ့ အသည်းစွဲဘုရားရှိခိုးလေး၊ ယဉ်ကျေးတဲ့ လူ့အဖွဲ့အစည်း အတွင်းမှာ နေထိုင်ကြတဲ့သူတွေဟာ အရာရာမှာ ယဉ်ယဉ်ကျေးကျေး လုပ်ဆောင်တတ်ကြတယ်၊ ကျေးဇူးပြု၍ ၀င်ခွင့်ပြုပါခင်ဗျာ၊ ကျေးဇူးပြု၍ သွားခွင့်ပြုပါခင်ဗျာ၊ ကျေးဇူးပြု၍ ကူညီပါရစေနော် စသည်ဖြင့်ပေါ့၊ အဲဒီမှာ သိပ်လှတဲ့အလှကို ဒီဘုရားရှိခိုးမှာတွေ့ရတယ်၊ ခွင့်တောင်းဘို့ရာ ခွင့်ပြုဘို့ရာမှာ ထပ်ပြီး ခွင့်တောင်းထားတာလေး။

ရတနာမြတ်သုံးပါးကို ကာယကံ- ကိုယ်အမူအရာ၊ ၀စီကံ- နှုတ်အမူအရာ၊ မနောကံ- စိတ်အမူအရာ၊ သုံးအနက် တစ်ပါးပါးနဲ့ပစ်မှားမိ ပြုမိ၊ ပြောမိ၊ ကြံမိတွေးမိခဲ့သည်ရှိသော် ခွင့်လွတ်တော်မူပါ၊ ခွင့်ပြုတော်မူပါဟု တောင်းပန်ပို့အရေး ဟော … ရှေ့ကနေ ဦးစွာပထမ- သြကာ သြကာသ သြကာသ- ဆိုပြီး ခွင့်ပြုပါ ခွင့်ပြုပါ ကျေးဇူးပြု၍ခွင့်ပြုပါလို့ သုံးကြိမ်တိုင် တောင်းပန်ထား တယ်၊ ဘယ်လောက်များ ယဉ်ကျေးလိုက်ပါသလဲ၊ ဘယ်လောက်များ အတုယူဘွယ် ကောင်းလိုက်ပါသလဲ၊ တကယ့်ကို အသည်းစွဲ ရင်ထဲသိမ်းစရာပ၊ ထပ်တွန့်ပြီး မေးလာတတ်ပါတယ်၊ ခွင့်လွတ်ပါတောင်းပန်ဘို့အရေး ခွင့်ပြုပါလို့များ ရှေ့ကနေ ကြိုတောင်းပန် နေရသေးလားပေါ့၊ ခုန လိုပါပဲ၊ ပြောခဲ့သလိုပေါ့၊ ယဉ်ကျေးသူတွေ အဲဒါကို ပြုလုပ်ကြပါတယ်လို့၊ နိုင်ငံခြားမှာ တွေ့ကြပါလိမ့်မယ် ဒီစကားလေး၊ စကားတစ်ခုပြောဘို့ ရှေ့ဆုံးက စကားလေးပေါ့- Excuse me! Can I help you? Excuse me! May I help you? Excuse me! May I go? May I come? စသည် စသည်ပေါ့၊ သိပြီးသားတွေ ဖြစ်မှာမို့ ဘာသာမပြန်တော့ပါဘူး။

ပြောချင်တာက ဒီထဲမှာပါတဲ့ ကံသုံးပါး၊ ကာယကံ၊ ၀စီကံ၊ မနောကံ ဒီသုံးပါးကိုပေါ့၊ ညီငယ် ညီမငယ်များ အမှတ်မှားတတ်လို့ပါ၊ တစ်ချို့ကလည်း ဒီက ကံသုံးပါးကို ဒုစရိုက်ဆယ်ပါးနဲ့ ရောပစ်တတ်ကြလို့ပါ၊ ဒီထဲက တစ်ပါးပါးနဲ့ ပစ်မှားမိသည်ရှိသော် အပြစ်ပျောက်ရေး လက်အုပ်ချီမိုးပြီး သုံးကြိမ်တိုင်တိုင် ရှိခိုးပြီး တောင်းပန်တာလေ၊ အဲဒါတွေက တကယ်တော့ ဒုစရိုက်ဆယ်ပါးခေါ်တဲ့ ကာယကံသုံးပါး၊ ၀စီကံလေးပါး၊ မနောကံသုံးပါးတို့ မဟုတ်ကြဘူး၊ သူ့အသက် သတ်တာ၊ သူ့ဥစ္စာကို ခိုးတာ၊ သူ့သားမယား ကျူးလွန်စော်ကား ကာမဂုဏ်တရားကို မှားမှားယွင်းယွင်းဖောက်ပြန် ကျင့်တာ အဲဒီကံတွေက ခုလို တောင်းပန်လိုက်ရုံနဲ့ ပြေသွားကြတာမဟုတ်ဘူး၊ တစ်ခုခု ကျူးလွန်မိရင် မကောင်းတဲ့ အကျိုး ပေးကိုပေးမှာ၊ အဲဒီတရားတွေက လုံးဝမလုပ်ဘဲ ရှောင်ရမှာ၊ ကျူးလွန်လို့ကို မရဘူး၊ မဟုတ်တာ မမှန်တာပြောတာ၊ သူတစ်ပါးတွေ ချစ်နေတာ ခင်နေတာကိုကွဲအောင် ကုန်းတိုက်စကားပြောဆိုတာ၊ ကြမ်းတမ်းတဲ့စကားတွေပြောဆိုတာ၊ အကျိုးမပါ ပြိန်ဖျင်းတဲ့စကားတွေ ပြောတာ၊ အဲဒီကံတွေက မကျူးလွန်ရဘူး၊ ကျူးလွန်ရင် အပြစ်ဖြစ်မှာ၊ အပြစ်ဖြစ်၊ အပြစ်နဲ့ ထိုက်သင့်တဲ့ အကျိုး မကောင်းကျိုးခံစားကြရမှာ၊ သူများဥစ္စာကို ငါ့ဥစ္စာဖြစ်ရင်ကောင်းမှာပဲဆိုတဲ့ မတော်လောဘနဲ့ ကြံစည်တာ၊ သူများအကျိုးပျက်ရာ ပျက်ကြောင်းကြံစည်တာ၊ အယူလွဲမှား ဖောက်ပြန်ကျင့်တာ တွေးတာ၊ ယူတာတွေဟာ သူ့အပြစ်သူ့အကျိုးတွဲလျက်ပေးမှာ ရမှာသေချာတယ်၊ လုံးဝ လုံးဝ ရှောင်ကြဉ်ကြရမှာ၊ အဲဒါ တကယ့်ကို မကောင်းတဲ့ ဒုစရိုက်တရားတွေ၊ အကုသိုလ်တရားတွေဖြစ်တယ်။

ခုပြောတဲ့ ကံသုံးပါးက ရတနာသုံးပါး မိဘ ဆရာသမား အစ်ကို အစ်မ ဦးကြီး ဦးလေး စသည်ဖြင့် အသက်ဂုဏ်ဝါ သိက္ခာ ကြီးမြတ်သူတွေကို တစ်ပါးပါးနဲ့ ကျူးလွန်ခဲ့မိသော် အပြစ်ပျောက်ရေး တောင်းပန်တာ၊ ငါးပါးသီလယူခါနီး သရဏဂုံဆောက်တည်ခါနီး စိတ်ကိုလုံးဝ ဖြူစင်အောင် ဆေးကြောတာဖြစ်တယ်၊ အဲဒီထဲက ကျူးလွန်မှုတို့သည်သာ ခုလို တောင်းပန်လိုက်တာနဲ့ ပျောက်ကင်းတာဖြစ်တယ်၊ ဒီကံသုံးပါးကလည်း တောင်းပန်ကိုတောင်းပန်ရတယ်၊ မတောင်းပန်ရင်ဖြင့် မကျေဘူး။

တောင်းပန်လို့ ကျေပုံ၊ မတောင်းပန်လို့ အပြစ်ရပုံလေး ပြောပြမယ်…

ဘုရားရှင်လက်ထက်တော်အခါက ၀ဿာကာရပုဏ္ဏားကြီးဆိုတာရှိတယ်၊ သူဟာ ရဟန္တာတစ်ပါးကို မျောက်ကဲ့သို့ပါတကား လို့ ၀စီကံနဲ့ပစ်မှားဘူးတယ်၊ ဘုရားရှင်သိတော့ ဘုရားရှင်က ဒီပုဏ္ဏား ရဟန္တာကို တောင်းပန်ရင် တောင်းပန်၊ မတောင်းပန်ရင်ဖြင့် သေရင် တိရစ္ဆာန်ဘ၀မှာ မျောက်ဖြစ်လိမ့်မယ်လို့မိန့်ခဲ့တယ်၊ သူကလည်း မတောင်းပန်ခဲ့ဘူး၊ ဒါကြောင့် မြတ်ဘုရား မိန့်တဲ့တိုင်း သေတော့ တကယ်ပဲ မျောက်ဖြစ်သွားတယ်၊ အဲဒါဟာ ရဟန္တာအရှင်သူမြတ်ကို ၀စီကံ- နှုတ်နဲ့ပစ်မှားခဲ့တဲ့အကျိုးဆက်ပဲ။

တစ်ခါ- သောတာပန်ရဟန်းငယ်လေးတစ်ပါးဟာ ရဟန္တာမထေရ်ကြီးတစ်ပါးနဲ့အတူ နောက်ကနေလိုက်ပြီး ဆွမ်းခံကြွတယ်၊ နံနက်စောစော အိမ်တစ်အိမ်ကနေ ယာဂုဆွမ်း လောင်းလှူလိုက်တယ်၊ အဲဒီအချိန်မှာပဲ မထေရ်ကြီးမှာ ရှိနေတဲ့ လေနာရောဂါထလာတယ်၊ အစာမရှိလို့ဖြစ်တာ၊ အစာရှိတာနဲ့ ပျောက်မယ်ဆိုတာသိလို့ မထေရ်ကြီးဟာ လမ်း တစ်နေရာမှာပဲ ဇွန်းခွက်မပါသလို့ သပိတ်ကို စောင်းမော့ပြီး သောက်လိုက်တယ်၊ လေနာပျောက်သွားတယ်ပေါ့၊ ဒါကိုမြင်ပြီး သောတာပန်ရဟန်းငယ်လေးက `မထေရ်ကြီးနယ် ရွာတွင်းမှာ အမြင်မတော်လိုက်လေခြင်း၊ အမြင်တန်လိုက်လေခြင်း`ဆိုပြီး စိတ်နဲ့ပစ်မှားမိလိုက်တယ်၊ ကျောင်းရောက်တော့ မထေရ်ကြီးက `ငါ့ရှင် သင့်မှာ အဘယ်ထောက်တည်ရာ တရားရှိပါသလဲမေးတော့` ရဟန်းငယ်က `အရှင်ဘုရား တပည့်တော် သောတာပတ္တိဖိုလ်သို့ ဆိုက်ရောက်ပြီးပါပြီးဘုရား`လို့လျှောက်လိုက်တယ်၊ ဒီအခါ မထေရ်ကြီးက `ငါ့ရှင် သင် တရားဆက် အားမထုတ်လေနဲ့တော့`လို့ မိန့်လိုက်တယ်၊ ဒီတော့မှ ရဟန်းငယ်လည်း ရဟန္တာကို ပစ်မှားမိပြီဆိုပြီး မိမိရဲ့ မနောကံ- စိတ်နဲ့ပစ်မှားမိတာကို ခွင့်လွတ်ဘို့ တောင်းပန်လိုက်တယ်၊ ဒီတော့မှ တရားဆက် အားထုတ်ပြီး တရားထူးများဆက်လက်ရရှိခဲ့တယ်။

မထေရ်ကြီးပြောတာက သင်သည် ရဟန္တာကိုစိတ်နဲ့ပစ်မှားမိတဲ့အတွက် အရိယူပ၀ါဒန္တရာယ် ထိုက်တယ်လို့ ဆိုလိုတာဖြစ်တယ်၊ ဒါကို ရဟန်းငယ်ကလည်း သိလုိ့တောင်းပန်တာ၊ မတောင်းပန် လို့ကတော့ သောတာပန်ပင် ဖြစ်လင့်ကစား တရားဆက် အားထုတ်လို့မရဘူး။ ဆိုချင်တာက ဒုစရိုက်ဆယ်ပါးထဲက ကံသုံးပါးမဟုတ်သော်ငြား ဒီကံသုံးပါးဟာလည်း မတောင်းပန်လို့ကတော့ မပျောက်တော့ဘူး၊ အဲဒီထဲက တစ်ပါးပါးနဲ့ ငြိနေရင်ဖြင့် သီလယူလည်း မစင်ကြယ်၊ သရဏဂုံလည်း စင်ကြယ်မှာမဟုတ်တော့ဘူး၊ ဒါကြောင့် ဒီသြကာသ ကန်တော့ခန်းဟာ သိပ်အရေးပါပြီး ကျကျနန စိတ်ပါလက်ပါ ပြုလုပ် အလေးထားဘို့လိုပါတယ်။

မိမိအတွေ့ကြုံလေး တစ်ခုပြောပြမယ်၊ မန္တလေး နိုင်ငံတော်ပရိယတ္တိသာသနာ့တက္ကသိုလ်မှာ ဘီအေအောင်၊ အမ်အေ ရေးဖြေပြီးလို့ ကျမ်းရေးရမည့် ကျောင်းသားရဟန်းငယ်များ မန္တလေး၊ စိန်ပန်းရပ်မှာရှိတဲ့ မဟာစည်သာသနာ့ရိပ်သာကိုသွားပြီး တရားတစ်လ အားထုတ်ရပါတယ်၊ မဖြစ်မနေ ကို သွားအားထုတ်ရပါတယ်၊ ရည်ရွယ်ချက်ကတော့ စာရေးတဲ့ခါ ကျမ်းရေးတဲ့အခါ သမာဓိရအောင်ပေါ့၊ ဒီထက်လည်း မာစတာတန်း အောင်မြင်ပြီးသူတွေ တရားပါ အားထုတ်တတ်အောင်၊ တရားပြတတ် ဟောတတ်အောင်ပေါ့၊ အဲဒီမှာ တရားအားထုတ်တော့ စိတ်ပါလက်ပါ တကယ်အားထုတ်တဲ့ခါ တရား အားထုတ်လို့ လုံးလုံးကို မရပါဘူး၊ ဘာမှားနေတယ်လည်း မသိပါဘူး၊ မကောင်းတဲ့အာရုံ ကြောက်မက် ဖွယ်တွေ၊ လန့်စရာတွေ၊ စိတ်ပျက်စရာတွေချည်း တွေ့နေရလို့ တရားပြဆရာတော်တစ်ပါးထံကို သွားပြီး မေးလျှောက်ရပါတယ်၊ ဘုရားတပည့်တော်ဖြင့် ဘယ်လိုပင် ကြိုးစားပါသော်လည်း တရားအား ထုတ်လို့မရပါဘုရား လို့။

ဒီအခါမှာ ဆရာတော်ဘုရားက - ဦးဇင်းလေး ဦးဇင်းလေးဟာ ဒီဘ၀မဟုတ်ရင်တောင် ရှေးရှေးဘ၀တွေမှာ အနန္တောအနန္တငါးပါးနဲ့စပ်ပြီး ပစ်မှားဘူးခဲ့တာ ရှိလိမ့်မယ်၊ ဒီတော့ တရားအားမထုတ်မီမှာ အနန္တောအနန္တငါးပါးကို တောင်းပန်ရှိခိုးပါ၊ အမျှဝေပါ၊ မေတ္တာပို့ပါ၊ အဲဒီခါကျရင် ငါ့ရှင် တရားအားထုတ်လို့ ရသွားပါလိမ့်မယ် တဲ့၊ ဟုတ်တယ်၊ တကယ်ပါပဲ၊ ဆရာတော့်စကားအတိုင်း လိုက်နာလိုက်တဲ့အခါမှ တရားအားထုတ်ရတာ စိတ်ချမ်းသာကိုယ်ချမ်းသာဖြစ်၊ ကြိုးစားရသလောက် အမြတ်ရခဲ့ပါတယ်၊ ဒါကြောင့် ခု ဒီထဲက ကံသုံးပါးဟာ ဒုစရိုက်ထဲက ကံသုံးပါး မဟုတ်ဘူးဆိုရုံဖြင့် အလေးထားစရာ မဟုတ်ဘူးဆိုပြီး အတွေးမှားကာဖြင့် မသွားကြပါနဲ့၊ အလေးထားရပါမယ်၊ အလွန်လည်း အရေးကြီးပါတယ်၊ ရေးပြတာကတော့ ဒီသြကာသတွင်းပါ ကံသုံးပါးသည် သူ့အသက်သတ်ခြင်း စသည်နှင့်တူတူဆိုပြီး သူ့အသက် သတ်ကာ၊ သူ့ဥစ္စာကို ခိုးကာ တောင်းပန်ရင် ကျေလိမ့်မည်အထင်ရောက်လျက် ကျူးလွန်မိကြမည်ကို စိုးသောကြောင့် ရေးသားတင်ပြရပါကြောင်း…

ကလေးငယ်များကို သင်ပြတဲ့ခါ ကံသုံးပါး လွဲမှားစွာ သင်ပြမိ ပြောမိ ဆိုမိ ဖြစ်မည်ကိုလည်း စိုးသည် တစ်ကြောင်းကြောင့် တင်ပြသည်ဖြစ်ပါကြောင်း…..

10.12. 2009

ဝန်ခံချက်။ ။ ရဝေထွန်း (ဆရာတော်ဦးတိလောကသာရ)၏ ဗုဒ္ဓဘာသာဟူသည်မှာကို ဖတ်ပြီး ဤစာပိုဒ်ရေးပါသည်။