အမိမြေသို့အလည်တစ်ခေါက်ပြန်ခြင်းမှတ်တမ်း (၂)
၁၇ကြိမ်မြောက် အစည်းအဝေးကြီး၏ နောက်ဆုံးနေ့ တပိုတွဲလပြည့်နေ့တွင် ရွှေကျင်နိကာယ ဂိုဏ်းဝင်သံဃာ တော်များ စုပေါင်း စုရုံး၍ ပထမရွှေကျင် သာသနာပိုင်ဆရာတော်ဘုရားကြီး၏ သိမ်တော်ကြီးအတွင်း၌ သံဃာ့ ဥပုသ်ပြုတော်ခဲ့ကြသည်။ ထိုနေ့ညနေပိုင်းတွင် ဆရာတော် ဦးမဟောသဓပဏ္ဍိတမှ မြစကြာဆရာတော် ဦးလက္ခဏနှင့် မဆုံတာ ၁၅နှစ်ရှိပြီဖြစ်၍ သွားတွေ့ ချင်ကြောင်းပြောသဖြင့် မြစကြာဆရာတော် သီတင်းသုံးသော ရန်ကင်းတောင်ခြေရှိ ခန့်ဝင်း တောရကျောင်းသို့ သွားဖြစ်ခဲ့သည်။
မြစကြာ ဆရာတော်နှင့် မနက်ဖြန်သည် လွန်ခဲ့သော ၁၀-နှစ်ခန့်လောက် အချိန်တွင် အောင်ချမ်းသာကျောင်း စတင် တည်ထောင်ခဲ့စဉ် ကာလက တွေ့ဆုံခဲ့ဘူးသည်။ ဆရာတော် သည် တရားဟောအလွန်ကောင်းသည်၊ အသံလည်းကောင်းသည်။ ဆရာတော်ဦးမဟောနဲ့ အတူ ဆယ်နှစ်ကျော်ကျော် မလွန်ဓမ္မကထိအဖြစ် မြန်မာပြည် တစ်ခွင် လှည့်လည်လုပ်ဆောင်ခဲ့သဖြင့် တစ်ပါးနဲ့တစ်ပါး အလွန်ပင်သံယောဇဉ် ရှိကြ၏။
ခန့်ဝင်တော့ရကျောင်းအတွင်းသို့ ၀င်လိုက်သည်နှင့် အေးငြိမ်းတိက်ဆိတ်သော အရသာကို ပထမဦးဆုံး ခံစားလိုက်ရသည်။ မြစကြာဆရာတော်နှင့် ဆရာတော် ဦးမဟောတို့ ရှေးဟောင်းနှောင်းဖြစ်အကြောင်းများ ပျော်ရွှင်စွာ အာလာပသလ္လာပများပြောနေကြသည်မှာ နားထောင်လို့ ကောင်းသဖြင့် ၂-နာရီကျော် ကြာသွား သည်။
ထိုမှအပြန်တွင် ရန်ကင်းတောင်ခြေရှိ မြကျောက်သောက်ရေသန့်ထွက်ရှိရာ ဘုန်းတော်ကြီး ကျောင်းသို့သွား ရောက်ခဲ့ကြသည်။ တပိုတွဲလပြည်ကျော် တစ်ရက်နေ့တွင် သီတဂူဆရာတော် ၏ဒကာတစ်ဦးမှ (Adventure Travel Company) မှ စစ်ကိုင်းနှင့် မင်းကွန်း ဧရာဝတီမြစ်ကမ်း ရှုခင်းများ ကြည့်ရှုရန် ဖိတ်ကြားသဖြင့် ဆရာတော် ဦးမဟော ခေါင်းဆောင်သော အဖွဲ့အားလုံး စစ်ကိုင်းတောင်ရိုး၏ အလှပသာဒများကို မြင်တွေ့ခွင့် ရခဲ့သည်။
ထိုနေ့ ညနေပိုင်းတွင် မေမြို့ ရှိ သီတဂူဝေဇယန္တာကျောင်းသို့ သွားရောက်ကာ အနားယူခဲ့ကြ သည်။ နောက်ရက် မနက်ပိုင်းတွင် အဖွဲ့အားလုံး မဟာအံ့ထူးကံသာဘုရားကြီးကို သွားရောက် ဖူးမျှော်ဖြစ်ခဲ့ကြပြီး ကန်တော်ကြီး ဥယျာဉ်နှင့် ပွဲကောက်ရေတံခွန်များသို့ လည်ပတ်ခဲ့ကြ၏။
အမိမြေသို့ ဒီတစ်ခေါက် ပြန်ရသည်မှာ အလွန်ပင်ပျော်ရွှင်စရာကောင်းသည်။ စိတ်ချမ်းမြေ့မှု များရရှိခဲ့သည်။ မြန်မာပြည်၏ အလှ မြန်မာပြည်၏ သဘာဝများကို အပြည့်အ၀ ခံစားခွင့်ရ သည်။
0 comments:
Post a Comment