ဗုဒ္ဓဘုရားနဲ့ ရဟန္တာများကို ဘာ့ကြောင့် “နာဂ” နဂါးဟု ခေါ်ဆိုပါသလဲ
ဒကာ။ ။ တချို့သော စာပေကျမ်းဂန်တွေထဲမှာ ယော နာဂေါ- နာဂမည်တွင် အကြင် ဘုရားရှင်ကိုယ်တော်မြတ်ကြီးသည် ဟူ၍လည်းကောင်း၊ ယော နာဂေါ- ဗုဒ္ဓနာဂကိုထား၍ တန်ခိုးတော်အရာ၌ တပါးတည်းဖြစ်တော်မူသော အရှင် မဟာမောဂ္ဂလာန်ထေရ်မြတ်ကြီးသည်။ ယေနာဂါ- အကြင်ရဟန္တာပုဂ္ဂိုလ်မြတ်တို့သည် စသည်ဖြင့် ဘာ့ကြောင့် နာဂ- နဂါးဆိုတဲ့ အမည်နဲ့ ဘုရားရဟန္တာတို့ကို ခေါ်ဝေါ်သုံးစွဲ ကြပါသလဲ ဆရာတော်၊ နာဂ-ဆိုတဲ့ အဘိဓာန်ပုဒ်ရဲ့ အနက်အဓိပ္ပာယ် ရှင်းပြပေးပါဘုရား။
ဆရာ။ ။ နာဂ- ဆိုတဲ့ ပါဠိက တောင်ကြီးတွေ၊ ဆင်ပြောင်ကြီးတွေ၊ နဂါးတိရစ္ဆာန်တွေကိုလည်း ခေါ်ဆိုတယ်၊ ဘုရား ရဟန္တာတို့ကို နာဂလို့ ခေါ်ဆိုတာကတော့ ထိုထို ပါဠိ, အဋ္ဌကထာ, ဋီကာ ကျမ်းစာတို့က….
ဆန္ဒာဒီဟိ န ဂစ္ဆတီတိ နာဂါ။ ။ မလိုက်ပါသင့်သော ဆန္ဒာဂတိ, ဒေါသာဂတိ, မောဟာဂတိ, ဘယာဂတိ တို့ကို ဘယ်သောအခါမျှ မလိုက်တတ်သောကြောင့် နာဂမည်တော်မူကြတယ် တဲ့။
တေန တေန မဂ္ဂေန ပဟီနေ ကိလေသေ န အာဂစ္ဆတီတိ နာဂါ။
ထိုထိုမဂ်လေးပါးဖြင့် ပယ်အပ်ပြီးသော ကိလေသာတို့အထဲသို့ နောက်ထပ် တဖန် မလာရောက်ကြတော့တဲ့အတွက် နာဂ မည်တော်မူတယ်တဲ့။
နာနာပကာရကံ အာဂုံ န ကရောန္တီတိ နာဂါ။ ။ အထူးထူး အပြားပြားသော မကောင်းမှုဟူသမျှတို့ကို ဘယ်သောအခါမှ မပြုကြသောကြောင့် နာဂ မည်တော်မူကြတယ်တဲ့။
ကဲ…အဲဒါတွေဟာ ကျမ်းဂန်များက လာတဲ့ စကားတော်တွေပါပဲ၊ “ပါဌ်တချက်၊ နက်များစွာ ” တဲ့၊ နာဂဆိုတဲ့ ပါဌ်ကို နဂါးတခုတည်းမှတ်မထားနဲ့၊ ကျေနပ်ပြီလား။
ဒကာ။ ။ အားရနှစ်သက်ကျေနပ်လှပါတယ် ဆရာတော်၊ ကိုရင်နာဂ တို့၊ ဦးနာဂတို့ ဆိုတာ ခုမှပဲ ကွဲပြားစွာနဲ့ သိရတော့တယ်၊ ဒကာကြီးတို့က နဂါးပဲ အောက်မေ့နေတာ။
0 comments:
Post a Comment