စေတနာရှင်၏ လက်ငင်းအကျိုးပေး
အဘသာရင်သည် မိတ္ထီလာမြို့နယ် ဘူတာဟောင်းရပ်ကွက်တွင် နေထိုင်သည်။ သူ၏ အသက်မှာ ၇၂-နှစ်ရှိပြီ။ ကျန်းကျန်းမာမာဖြင့် သွားနိုင် လာနိုင်သူ ဖြစ်သည်။ သူသည် ကြင်နာတတ်သူဖြစ်ပြီး စေတနာဖြင့် အမြဲကူညီ တတ်သူ ဖြစ်သည်။ ပင်စင်စားတယောက်ဖြစ်၍ ငွေကြေးမလုံလောက်သဖြင့် သားသမီးများက ထောက်ပံ့သော ငွေကြေးဖြင့် စားသောက်နေရသူ ဖြစ်သည်။ ဤအခြေ၌ ရှိသော်လည်း အိမ်နီးချင်းများက ငွေကြေးအကူအညီ တောင်းလာလျှင် တွန့်ဆုတ်ခြင်းမရှိ။ ပေးကမ်းကူညီလေ့ရှိသည်။
တနေ့တွင် လမ်းပေါ်တွင် ကားတိုက်မိသော ခွေးတကောင်မှာ ခြေထောက်မထောက်နိုင်ဘဲ အစာငတ်နေ သည်ကို တွေ့ရသည်။ အဘသာရင်က ထိုခွေးကို အိမ်သို့ပွေ့ချီလာကာ ခြေထောက်ကို ဆေးထည့်ပေးသည်။ ကောင်းစွာကျွေးမွေးထားသည်။ မကြာမီ ခွေးကလေး၏ ခြေထောက် ကောင်းသွားသည်။ ထိုအခါ မိမိအိမ်၌ပင် ဆက်လက်၍ မွေးထားသည်။
သူ၏သားသည် စလင်းမြို့ရှိ စလင်းဆည်တည်ဆောက်ရေးတွင် တာဝန်ကျလျက်ရှိသည်။ သားက အလည်လာရန်ခေါ်သဖြင့် စလင်းမြို့သို့ သွားသည်။ စလင်းမြို့မှ တဆင့် စလင်းဆည်ရှိရာကို ဂျစ်ကားဖြင့် တောလမ်းမှ ခရီးဆက်ခဲ့သည်။
သူစီးလားသော ဂျစ်ကားပေါ်တွင် ကားဆရာအပါအ၀င် ခရီးသည် ၅-ဦး လိုက်ပါစီးနင်းလာသည်။ စလင်းဆည် မရောက်ခင် လမ်း၌ ရုတ်တရက် ဂျစ်ကားတိမ်းမှောက်သွားသည်။ ကားရှေ့ခန်းမှ စီးလာသူသည် နေရာ၌ပင် ပွဲချင်းပြီး သေဆုံးသွားသည်။ ကားဆရာအပါအ၀င် ခရီးသည် ၂-ဦးမှာလည်း ကျိုးသူကျိုး၊ ဒဏ်ရာ ရသူရနှင့် စလင်းဆေးရုံသို့ ပို့ခဲ့ရသည်။ အဘသာရင် တယောက်သာလျှင် မည်သို့မျှ ထိခိုက်ဒဏ်ရာမရ။ စလင်းဆည်သို့ အန္တရာယ်ကင်းစွာ ရောက်ရှိလာခဲ့သည်။
ဒုက္ခရောက်သူကို ကူညီတတ်ပြီး၊ ခွေးကလေး၏ အသက်ကို ကယ်တင်ခဲ့သော အဘသာရင်၏ မေတ္တာ စေတနာသည် နောက်ဘ၀အထိ မဆိုင်းဘဲ ယခုဘ၀တွင်ပင် အကျိုးပေးလေတော့သည်။
(ခင်မျိုးဦး-ထီလာ)
( မြတ်မင်္ဂလာ ၂၀၀၂-ခု နိုဝင်ဘာလ)
0 comments:
Post a Comment