ဒေသန္တရ ခရီးသွား မှတ်တမ်း (၇)...

ကမ္ဘာ့ အမြင့်ဆုံး ကစ်ဘား (Kibber) ရွာကို လှမ်းမြင်ရပြီ

ခါဇာ (Kaza) မြို့ကနေ နံနက်မှာ ဘစ်ကားနဲ့ စာရေးသူ ခရီးထွက်ခဲ့ပြန်ပြီ။ သွားနေတဲ့ နေရာလေး ကတော့ ကစ်ဘား (Kibber) ဆိုတဲ့ ရွာလေးပါ။ ပင်လယ်ရေမျက်နှာပြင် အမြင့် မီတာ ၄၂၀၅ ရှိပါတယ်။ ပေ အတိုင်းအတာနဲ့ တွက်လိုက်မယ် ဆိုရင်တော့ ပေပေါင်း ၁၄,၀၀၀ နီးပါး ရှိပါတယ်။ အဲဒီနယ်က လူတွေကတော့ ကစ်ဘား (Kibber) ရွာလေးဟာ ကမ္ဘာမှာ အမြင့်ဆုံး ကျေးရွာတစ်ရွာ ဖြစ်ပါတယ် တဲ့။
စာရေးသူလည်း ကမ္ဘာ့ အမြင့်ဆုံးရွာ ဆိုတော့ ရောက်ဖူးအောင် သွားမှပဲ ဆိုပြီး ထွက်လာခဲ့ရတာပဲ။ ဘတ်စ်ကား ကတော့ မြန်မာနိုင်ငံက ဘတ်စ်ကားတွေလိုပါပဲ တိုးကြိတ်နေတာ။ စာရေးသူကတော့ စောစောစီးစီး ကားဂိတ်ကိုသွားပြီး နေရာယူထားလိုက်တော့ ထိုင်ခုံနေရာတော့ ရသား။

ကစ်ဘား (Kibber) ရွာကို ရောက်ပြီ

ခါဇာ (Kaza) မြို့ ကားဂိတ်ကနေ ကား စထွက်ပြီ။ ဘစ်ကားက တစ်ခါတလေ တောင်စောင်းတွေကနေ ကွေ့ပတ်မောင်းနေရတော့ အန္တရယ်တော့ ရှိတယ်လေ။ ဘစ်ကားပေါ် ပါလာတဲ့ ခရီးသည်တွေ တော်တော်များများကတော့ စိတ်ပုတီးစိတ်ပြီး စိုးရိမ်စိတ်ကို ဖြေဖျောက်နေကြတယ်နဲ့ တူပါတယ်။ အဲဒီ နယ်မြေမှာ နေထိုင်ကြတဲ့ လူတွေက ဗုဒ္ဓဘာသာသာဝင်တွေ ဆိုတော့ လူတိုင်းလိုလိုမှာ စိတ်ပုတီးလေးတွေ ကိုယ်စီ ဆောင်ထားတတ်ကြတယ်။
လမ်းခုလတ်မှာ ခရီးသည်တွေ ဆင်းလိုက်တက်လိုက်နဲ့ ကားမောင်းသမားနဲ့ ကားစပယ်ယာလည်း အငြိမ်မနေရဘူး။ လမ်းတစ်နေရာမှာ ဘုန်းကြီးတစ်ပါး ဘတ်စ်ကားပေါ် တက်လာပါလေရော။ ဒါပေမဲ့ ကားပေါ်မှာ ရှိတဲ့ လူတွေကတော့ ဘုန်းကြီးတစ်ပါး ကားပေါ်တက်လာလို့ နေရာဖယ်ပေးမယ်လို့ စိတ်ကူးတောင် ရှိဟန် မတူဘူး။ အဲဒီ ဘုန်းကြီးကတော့ လူတွေ ကြားထဲမှာပဲ တိုးကြိတ်ပြီး နေနေရတယ်။

ကမ္ဘာ့အမြင့်ဆုံး ကစ်ဘား (Kibber) ရွာ ညနေဆို လူခြေတိတ်

ကြည့်ရတာ အမြင်မတော်တော့ စာရေးသူကပဲ အဲဒီ ဘုန်းကြီးအတွက် လက်ရှိထိုင်နေတဲ့ နေရာလေးကို ပေးလိုက်ပါတယ်။ ဒါပေမဲ့ မထိုင်ဘူးလို့ အတင်းငြင်းတော့ စာရေးသူလည်း ကိုယ့်နေရာကိုယ် ပြန်ထိုင်လိုက်တော့တယ်။ နံဘေးက လူတွေကတော့ စာရေးသူကို အထူးအဆန်းသဖွယ် ဖြစ်နေတာပေါ့။ အဲဒီနေရာက လူတွေ ဗုဒ္ဓဘာသာလည်း ဆိုသေး၊ ဘုန်းကြီးတစ်ပါး ကားပေါ်မှာ ပါလာတာ နေရာလေး တစ်နေရာတောင်မှ မလှူချင်ကြပါလား လို့ တွေးမိတော့တယ်။
ဒါကြောင့် စာရေးသူက ကိုယ့်မြန်မာနိုင်ငံက ဒကာ၊ ဒကာမတွေကို သိပ်ကို လေးစားနေမိတာ။ မြန်မာနိုင်ငံမှာ ဆိုရင်တော့ ဘစ်ကားပေါ် သံဃာတစ်ပါး တက်လာရင် နေရာလှူချင်တဲ့ လူတွေ အများသား။ သံဃာကို ကြည်ညိုတဲ့ စိတ်တွေနဲ့ လှူကြတာလေ။ ဘာပဲ ဖြစ်ဖြစ် ဒကာ၊ ဒကာမတွေက နေရာ လှူချင်ချင်၊ မလှူချင်ချင် သံဃာတွေ အတွက် ထိုင်ခုံနေရက အဆင်သင့် ဘစ်ကားပေါ်မှာ ရှိနေပြီးသားလေ။

ရေခဲတောင် နောက်ခံ ပန်းချီနဲ့ ရွာဦးစေတီ

ဟော… ပြောရင်းဆိုရင်း ကစ်ဘား (Kibber) ရွာကိုတော့ ရောက်လာပြီ။ ဘစ်ကားစီးလာတာတောင် သုံးနာရီ ကျော်ကျော် ရှိသွားပြီပဲ။ ရှုခင်းတွေကတော့ တော်တော်လှသားပဲ။ သစ်ပင်တွေကတော့ လုံးဝ မရှိဘူး။ ရေခဲတွေ ဖုံးလွှမ်းထားတဲ့ တောင်တန်းကြီးတွေများ သွယ်တန်းနေလိုက်ကြတာ အပြာရောင် မိုးကုတ်စက်ဝိုင်းကြီးရဲ့ အောက်မှာ စာပန်းချီ ချယ်မှုန်းမယ် ဆိုရင်တော့ လွှမ်းစရာလေး တစ်ခု ဖြစ်သွားမလားပဲ။
ကမ္ဘာမှာ အမြင့်ဆုံးရွာလေး ဆိုတော့လည်း တော်တော်တော့ အေးတယ်။ ဒီရွာမှာ တည်းခိုဖို့အတွက် တည်းခိုခန်းကို သွားမေးရဦးမယ်။ တည်းခိုခန်း ဆိုပေမဲ့ မြို့စတိုင်လိုတော့ အပျံစား ဘယ်ဟုတ်လိမ့် မလဲနော်။ ကျေးရွာဆိုတာ့လည်း ကျေးရွာ အဆင့်လောက်ပဲ့ပေါ့။ ဘာပဲ ဖြစ်ဖြစ်လေ စာရေးသူအတွက် ကတော့ ကျောတစ်ပြား ချစရာနေရာလေး ရရင် လုံလောက်ပါပြီ။ ဘုရားလက်ထက်တော်က ရဟန်းတွေဟာ သစ်ပင်အောက်မှာတောင် သီတင်းသုံးကြသေးတာပဲ။ သစ်ပင်ကို ကျောင်းအဖြစ်နဲ့ သီတင်းသုံးကြတာလေ။

ဖြူစင်တဲ့ စေတနာနဲ့ ဆွမ်းကပ်ဖို့ ပြင်

ဒါနဲ့ တည်းခိုခန်းရောက်တော့ တည်းခိုခန်း အဆောက်အဦ ကလည်း ပြင်ဆင်လျှက် တန်းလန်း ဖြစ်နေတုန်းပဲ။ ဒါကြောင့် တည်းခိုဖို့ မဖြစ်နိုင်ဘူး တဲ့လေ။ အဲဒါမှ ဒုက္ခ။ အစောနက ပြောခဲ့သလိုမျိုး သစ်ပင်အောက် သွားပြီး သီတင်းသုံးရတော့မယ်နဲ့ တူတယ်။ သစ်ပင်တွေကလည်း ဒီမှာ မရှိတော့ သစ်ပင်အောက်မှာတောင် သီတင်းသုံးဖို့ မလွယ်နိုင်ဘူး။ ရာသီဥတုကလည်း အရမ်းအေး ဆိုတော့ ဘယ်လိုများ လုပ်ရပါ့။ လေအေးတွေကလည်း တိုက်နေတာ လွန်ပါရော။
“လားမားကြီး… စိတ်မပူပါနဲ့။ တပည့်တော်တို့ရဲ့ အိမ်မှာ သီတင်းသုံးပါ”
တည်းခိုခန်း ပိုင်ရှင် ဒကာမကြီးက ပြောလိုက်တဲ့ စကားသံကို ကြားလိုက်ရတယ်။ မင်္ဂလာ ရှိလှတဲ့ စကားလေးပါပဲ။ တော်သေးတာပေါ့ ဒီနေ့အတွက်တော့ မစိုးရိမ်ရတော့ဘူး။ လူစကားနဲ့ ပြောရမယ် ဆိုရင်တော့ ထမင်းစားအိမ် ရသွားပြီလေ။ နေစရာ အတွက်ရော၊ ဆွမ်းအတွက်ရော မပူရတော့ဘူး။ ကံကောင်းလိုက်ပါဘိ။

ရောသမမွှေ နေ့ဆွမ်း

ပင့်ဖိတ်တဲ့ အလှူရှင်အိမ်ကိုတော့ ရောက်သွားပြီ။ စာရေးသူကို နေရာပေးပြီး ဆွမ်းကပ်ဖို့ ပြင်တော့တာပဲ။ မိသားစုလေးက စာရေးသူကို ခင်ကြပါတယ်။ သူတို့လည်း ဗုဒ္ဓဘာသာတွေ ဆိုတော့ ရဟန်းသံဃာတွေနဲ့ စိမ်းနေဟန် မတူဘူး။
ဆွမ်းထမင်း အထဲမှာ ငရုပ်သီး များများ ရောထားတဲ့ ပဲဟင်းကို ထည့်လိုက်တယ်။ ပြီးတော့ အဖတ် မပါတဲ့ ဟင်းရည်တစ်မျိုး ခွက်ထဲထည့်။ သောက်ရေ တစ်ခွက်နဲ့ ဆွမ်းကပ်တော့တာပဲ။ အဲဒီ ဆွမ်းဟင်း၊ ဆွမ်းထမင်းတွေဟာ သာမန်အားဖြင့် ကြည့်မယ် ဆိုရင်တော့ ဟင်းကောင်းထဲမှာ မပါနိုင်ဘူး။ ဆွမ်းထမင်း အထဲကို ဆွမ်းဟင်းတွေက ထည့်ရောထားလိုက်တော့ ရောသမမွှေ ဆွမ်း ဖြစ်သွားတော့တယ်။
အဲဒီ ရောသမမွှေ ဆွမ်းကိုတော့ စာရေးသူတို့က စစ်ကိုင်းမှာ သီတင်းသုံး တုန်းက ဆိုရင် အမြဲ ဘုဉ်းပေးနေကျ။ ဆွမ်းခံပြန်လာလို့ ဆွမ်းဟင်း နည်းတဲ့ အခါများမှာတော့ ရောသမမွှေ ပြီး ဘုဉ်းပေးမှ အဆင်ပြေတာလေ။ ဒီလိုမှ မဟုတ်ရင် ဆွမ်းဟင်းက နည်းနည်းနဲ့ ဆိုတော့ ဆွမ်းတွေချည်း ကျန်နေတော့မှာ။ အခုကတော့ ဆွမ်းထမင်းရော ဆွမ်းဟင်းရော ကြိုက်သလောက် ရောသမမွှေ လို့ ရတယ်။

ဖြူစင်သူတို့ နှလုံးသားမှ အေးချမ်းမှုလေးများ

ဒါပေမဲ့ အလှူရှင်တွေရဲ့ စေတနာအားတွေက သိပ်ကို ကောင်းတာလေ။ အဲဒီ စေတနာတွေက ဆွမ်းဟင်း၊ ဆွမ်းထမင်းတွေအထဲ ပါနေကြတာ။ အဲဒါကြောင့် ဒီနေ့ ဘုဉ်းပေးရတဲ့ ဆွမ်းကတော့ဖြင့် မြိန်လိုက်သည် ဖြစ်ခြင်း။
ရာသီဥတုကလည်း အေးလွန်းတဲ့ နေရာမှာ ငရုပ်သီးကလည်း စပ်စပ်လေးနဲ့ ဆိုတော့ ဘယ်ပြော ကောင်းလိုက်မလဲ စာရေးသူလည်း ဘုဉ်းပေးလိုက်တာ အိမ်ရှင်တွေ သိပ်ကို ၀မ်းသာသွားကြတယ်။
နေ့လယ် ခဏနားပြီးတာနဲ့ ညနေပိုင်း ရွာထဲ လမ်းလျှောက်ရမယ်။ မြည်း သားအမိ အုပ်စုတွေလည်း စားကျက်ကနေ ရွာထဲကို ညနေ အိမ်ပြန်ချိန်မှာ ပြန်လာကြပြီ။ ဒီအရပ်ဒေသတွေမှာက ပစ္စည်း သယ်ပို့ ဖို့ဆိုတာက မြည်းတွေကိုပဲ အားကိုးပြီး အသုံးပြုနေကြတာ။
ရွာထဲက အိမ်တိုင်းလိုလို ကတော့ ပြတင်းပေါက်တွေ အလုံပိတ်လို့ ရအောင် လုပ်ထားကြတယ်။ ဆောင်းရာသီမှာ ဆိုရင် နှင်းတွေနဲ့ အတူ လေပြင်းတွေက တိုက်တော့ တခါးတွေ မလုံရင် အိမ်ထဲမှာတောင် မနေနိုင်ဘူး။ အရမ်းအေးတာ ဆိုပဲ။ စာရေးသူ ရောက်သွားတဲ့ အချိန်က နွေရာသီလေ။ အဲဒီတော့ နှင်းတွေ သိပ်မရှိဘူး။

အအေးဒဏ်ကြောင့် ပါးလေးတွေ နီမြန်းနေ

အသက်ကြီးတဲ့ ရွာသားတွေကတော့ ပြောပြကြတယ်။
“လားမားကြီးရေ... ဟိုးတုန်းက ဆိုရင် နွေရာသီမှာလည်းပဲ နှင်းတွေကျတာ။ အခုတော့ ကမ္ဘာကြီး ဖန်လုံအိမ် အာနိသင် ဖြစ်လာလို့ ပူနွေးလာပြီး ဒီနယ် တစ်ဝိုက်မှာ အခုလို နွေရာသီအချိန် နှင်းတွေ မရှိသလောက် ဖြစ်ကုန်တာ”
စာရေးသူလည်း ကမ္ဘာ့ ရာသီဥတု ဆောင်းပါးတွေ ဖတ်ဖူးတာလေး ရှိတယ်။ ဟိမ၀န္တာ တောင်တန်းတွေမှာ ရှိကြတဲ့ ရေခဲတွေဟာ ကမ္ဘာကြီး ပူနွေးလာလို့ အရည်ပျော်တာ မြန်နေတယ်။ ရေခဲမြစ်တွေကလည်း ခမ်းခြောက်လာပြီး နောက်ထပ် ဆယ်စုနှစ် အနည်းငယ် အတွင်းမှာ တဖြည်းဖြည်း တိမ်ကောလာနိုင်တဲ့ အခြေအနေတွေ ဖြစ်လာနိုင်တယ်။
ဟိမ၀န္တာ တောင်တန်းကို အမှီပြုနေတဲ့ မြစ်ကြီးတွေဟာလည်း ရေခမ်းခြောက်မှု ဘေးဒဏ်တွေကို ကြုံရနိုင်တယ်။ အဲဒီ မြစ်တွေကို အားကိုပြီး နေထိုင်နေကြတဲ့ အာရှတိုက်သား သန်း ၁၃၀၀ တို့ရဲ့ ဘ၀ ရပ်တည်မှု အတွက် အန္တရာယ် ရှိလာနိုင်တယ်။ မော်လဒိုက် ကျွန်းနိုင်ငံ ငယ်လေးလည်း နောင်နှစ်ပေါင်း မကြာမီမှာ ရေအောက်ကို ရောက်ရတော့မယ်။

မြည်းသားအမိတို့ အိမ်အပြန်

အခု စာရေးသူ ရောက်နေတဲ့ နေရာကလည်း တိဗက် ကုန်ပြင်မြင့်ရဲ့ တစ်စိတ် တစ်ဒေသကုန်းမြင့် ဆိုတော့ ဟိမ၀န္တာ နဲ့လည်း ဆက်စပ်မှု ရှိနေတယ်။
စာရေးသူတို့ နေထိုင်တဲ့ ဒီကမ္ဘာကြီးကို ကယ်တင်မယ့် သူတွေဟာ ဒီကမ္ဘာမှာ ရှိတဲ့ လူသားတွေကပဲ မဟုတ်လား။ ကယ်တင်ဖို့ နောက်မကျသေးပေမဲ့ မကယ်တင်ခဲ့ရင်တော့ ဒုက္ခရောက်မှာကတော့ အသေအချာ။
ဒီလိုနဲ့ ညမိုးချုပ်တော့ စာရေးသူ သီတင်းသုံးနေတဲ့ အိမ်က မိသားစုနဲ့ စကားလက်ဆုံ ကျတော့တယ်။ မိသားစုမှာက ဖခင်ကြီးနဲ့ သားသမီးတွေပဲ ရှိနေတယ်။ မိခင်ကြီးကတော့ မြို့တက်သွားပြီး လိုအပ်တာတွေ သွားဝယ်နေတယ်။ မိသားစုနဲ့ စာရေးသူ ဧည့်ခန်းမ အထဲက မီးလင်းဖိုလေး အရှေ့မှာ ထိုင်ပြီး မီးလှုံရင်း ရင်းရင်းနှီးနှီးပေါ့။ ဗုဒ္ဓဘာသာ အကြောင်းလေးတွေကို ဆွေးနွေးဖြစ်တယ်။ အဲဒီ မိသားစုက ပညာတတ် ဘွဲ့ရတွေပါ။ စာရေးသူတို့ မြန်မာနိုင်ငံရဲ့ ဗုဒ္ဓဘာသာ အကြောင်းကို သူတို့က မေးကြတယ်။
စာရေးသူကတော့ ပထမဦးဆုံး ပြောပြဖြစ်တာကတော့ အိမ်မှာ ဘုရားကျောင်းဆောင် ထားကြတဲ့ အကြောင်းလေးပါ။ မြန်မာနိုင်ငံမှာ ဆိုရင် ဗုဒ္ဓဘာသာမှန်သမျှ အိမ်တိုင်းမှာ ဘုရားကျောင်းဆောင် ရှိကြတယ်။ စာရေးသူ အခု ရောက်နေတဲ့ ဗုဒ္ဓဘာသာ အိမ်မှာက ဘုရားကျောင်းဆောင် မရှိပဲကိုး။
ပြီးတော့ မြန်မာနိုင်ငံရဲ့ ဒကာ၊ ဒကာမတွေရဲ့ စေတနာ သဒ္ဓါတရား ထက်သန်ကြပုံတွေကို ပြောပြတော့ အဲဒီ မိသားစုလည်း စိတ်ဝင်တစား နားထောင်နေကြတယ်။ ရဟန်းတစ်ပါး ကိုယ့်အိမ်ကို ကြွလာရင် အိမ်မှာ ရှိကြတဲ့ လူတွေ အားလုံးက ခြေ၊ လက်၊ နဖူး၊ တတောင်၊ ဒူး ထိခြင်းငါးပါးနဲ့ ရှိခိုးကန်တော့ ကြတယ် လို့ ပြောပြတော့ သူတို့က အံ့သြနေကြတယ်။
သူတို့ဆီမှာက အဲဒီလိုမျိုး မရှိကြပဲ။ ခေါင်းငုံ့ပြီး အရိုအသေ ပေးတာလောက်ပဲ ရှိကြတာလေ။ ရှိခိုးတဲ့ အကြောင်းလေးကို စာရေးသူကို မေးကြတယ်။
စာရေးသူလည်း အဲဒီ မိသားစုကို အတိုချုံးပြီးတော့ ရှင်းပြလိုက်တယ်။
“ထိခြင်းငါးပါးနဲ့ ရှိခိုးကန်တော့တယ် ဆိုတာက အရိုအသေ ပေးတယ် ဆိုတာထက် မိမိမှာ ရှိတဲ့ မာန် မာနတွေကို လျှော့ချလိုက်တာပါ။ လူတွေဟာ ငါ ဆိုတဲ့ အတ္တတွေ လွန်ကဲနေရင် သူတစ်ပါးကို အရိုအသေပေးဖို့ရာ ၀န်လေးနေတတ်ကြတယ်။ မြန်မာနိုင်ငံမှာ သီလ၊ သမာဓိ၊ ပညာတွေကို ပြည့်စုံအောင် ကြိုးစား အားထုတ် နေကြတဲ့ ရဟန်းသံဃာတွေကို လူတွေက ရှိခိုးခြင်းနဲ့ မာန်မာနတွေကို လျှော့ချပြီး ကုသိုလ်တွေ ယူကြတာပေါ့”
စာရေးသူ ပြောပြတာကို မိသားစု အားလုံးက လက်ခံကြပါတယ်။ ဗုဒ္ဓဘာသာနဲ့ ပတ်သက်တဲ့ အခြေခံပိုင်း လေးတွေကို ပြောပြလိုက်တယ်။ ကိုယ့်နိုင်ငံ ကောင်းကြောင်းတွေချည်း ပြောနေလို့ မဖြစ်သေးဘူး။ ကိုယ့်အကြောင်း အကောင်းပြောတာက တစ်ခါတလေ သူများ မကောင်းကြောင်း ပြောတာနဲ့ တူနေတတ်တယ်လေ။

အိမ်ခေါင်ပေါ်က မြည်း စားကျက်

စကားကလည်း ပြောလို့ ကောင်းနေလိုက်တာ ညဥ့်နက်နေတာတောင် သတိမထားမိကြဘူး။ မီးလင်းဖိုလေးက အခန်းထဲမှာ ရှိနေလို့ တော်သေးတယ်။ ကဲ ဒီနေ့ညတော့ ကမ္ဘာ့အမြင့်ဆုံး ကျေးရွာ ကစ်ဘား (Kibber) မှာ ရာသီဥတု အေးအေးချမ်းချမ်းလေးနဲ့ ကျိန်းစက် ရတော့မှာပဲ။
အရှေ့ဘက် မိုးကုပ်စက်ဝိုင်းကြီးက သူရိယနေမင်းကြီးတောင် ရေခဲလွင်ပြင် တောင်တန်းတစ်လျှေက်မှာ မေးတင်လို့ လောကကြီးကို အနွေးဓာတ်တွေ ပေးရင် လှမ်းကြည့် မိတ်ဆက်နေပြီပဲ။
မျက်နှာသစ်ရမယ့် ရေစည်ပိုင်းကို ကြည့်လိုက်တော့ အပေါ်ယံ ရေမျက်နှာပြင်မှာ ရေတွေခဲနေတာပဲ။ အိမ်ရှင် မိသားစုကတော့ ခဲနေတဲ့ ရေတွေကို ထုခွဲပြီး စာရေးသူအတွက် ကိုယ်လက် သန့်စင်ဖို့ ရေနွေး ကျိုပေးပါတယ်။
နံနက်စာ ဘုဉ်းပြီးတာနဲ့ စာရေးသူ ခရီးဆက်ရဦးမှာပါလား။
ညက သီတင်းသုံးခဲ့တဲ့ မိသားစုလေးကို နှုတ်ဆက်ပြီး ကစ်ဘား (Kibber) ရွာလေးက ထွက်ခွာလာခဲ့ပြန်ရပေါ့။ အဲဒီ မိသားစုလေးကိုတော့ စာရေးသူ အမှတ်ရနေမိမှာပါ။ သူတို့လေးတွေရဲ့ ခင်မင်စရာကောင်းတဲ့ ဓလေ့စရိုက်။ ရင်းနှီးဖော်ရွေမှု၊ ပွင့်လင်းမှု၊ ဧည့်ဝတ် ကျေပွန်မှု လေးတွေဟာ ရိုးသားဖြူစင်မှု၊ အကြင်နာနှလုံးသား ရှိသူတို့ရဲ့ ပြယုဂ်တွေပဲ မဟုတ်လား။
နောက်ထပ် ဆက်ရမယ့် ခရီးက ခြေကျင်ခရီး။ သွားရမယ့် နေရာကို လှမ်းကြည့်လိုက်တော့ တောင်ကုန်းတွေကို ကျော်ဖြတ်ရမယ့် လမ်းခရီးပဲ။ စာရေးသူလည်း လမ်းတစ်လျှောက် လိုအပ်တဲ့ ရိက္ခာလေးတွေကို လွယ်အိတ်ထဲထည့်ပြီး ကစ်ဘား (Kibber) ရွာလေးကို စွန့်ခွာထားခဲ့ရတယ်။

နေရစ်ပေဦးတော့ ကစ်ဘား (Kibber) ရယ်

သံသရာမှာ ခရီးသွားနေကြတဲ့ သတ္တ၀ါတွေလည်း ဒီလိုပဲ မဟုတ်လား။ နိဗ္ဗာန် မရောက်မချင်း တစ်ဘ၀ပြီး တစ်ဘ၀ စွန့်ခွာ သွားနေကြရတာ။ ၃၁ ဘုံ မှာ တစ်ဘုံပြီး တစ်ဘုံ ကျင်လည်နေကြရတဲ့ အချိန်မှာ ကုသိုလ် ရိက္ခာအထုပ်လေး ပါသွားမှ နောင်ရေး စိတ်အေးရတယ်။ နို့မို့ရင်တော့လား အပါယ်မှာ စုံးစုံးမြုပ်မယ် ဆိုတာ မတွေးဝံ့စရာပါလား နော်။
သြော်… သံသရာ …. သံသရာ … ဘယ်တော့များ ပြီးဆုံးမှာ ပါလိမ့်…..

Posted by nyanadipa