ကံ ကံ၏အကျိုး ( ၅၇ )

( ကြွေးဆပ်မည့်ကျွဲ )

ပုလဲမြို့နယ် ငန်းချောင်းရွာ၌ နေထိုင်သော ဘိုးသိန်းသည် လက်ပံရွာ ဦးဗလထံမှ ငွေနှစ်ထောင်ကို ချေးငှါးခဲ့သည်။ အလုပ်လုပ်ရင်း ဖဲ့၍ဖဲ့၍ မှန်မှန်ပေးဆပ်ခဲ့သည်။ သို့သော် အကြွေးမကျေခင် ပေးဆပ်စရာ ငွေရှစ်ရာအကျန်၌ ဖျားနာ၍ သေဆုံးသွားခဲ့သည်။

ဇနီးဖြစ်သူ မတင်ကြည်မှာ ဘိုးသိန်းအရင် ကွယ်လွန်သွားခဲ့ပြီးဖြစ်၍ ဘိုးသိန်းသေဆုံးချိန်၌ သားသမီး ၅-ယောက် ကျန်ရစ်ခဲ့သည်။ သားအကြီး ၂-ယောက်နှင့် သမီးအကြီး ၁-ယောက်မှာ အိမ်ထောင်သည်များဖြစ်ကြပြီး အငယ်ကလေး ၂-ယောက်အနက် ၁-ယောက်ပျက်စီးသွား၍ သားအငယ်ကလေးတယောက်သာ ကျန်ခဲ့သည်။

ဘိုးသိန်းသေဆုံးသွားပြီးနောက် တညတွင် ဦးဗလကို အိမ်ပ်မက်လာပေးသည်ဟုဆိုသည်။ အရီးဗလကို လုပ်ကျွေးဖို့ ကျုပ်လာခဲ့မယ်၊ ကျုပ်သားလေးကိုလဲ လှူပေးပါ-ဟု ပြောဆိုသွားခဲ့သည်ဟု ဆိုသည်။ နံနက်မိုးလင်းသောအခါ ဦးဗလက ဇနီးဖြစ်သူ ဒေါ်လှဝင်းကို ငါ ညက အိပ်မက်မက်တယ်၊ ဘိုးသိန်းက တို့အိမ်လာမယ်ဆိုတော့ ဧကန္တ ကျွဲမကြီးဗိုက်ထဲမှာ ကျွဲဝင်စား လာဖြစ်လိမ့်မယ်နဲ့ တူတယ်-ဟု ပြောဆိုသောအခါ ဒေါ်လှဝင်းက ဟုတ်ပါ့မလားတော်-ဟု ပြောလျှင် ဦးဗလက ကျွဲမကြီးက ကျွဲထီးကလေး မွေးလာရင်တော့ ဘိုးသိန်းဖြစ်မှာ သေချာတယ်-ဟု ဆိုသည်။

မကြာပါ ဦးဗလ+ဒေါ်လှဝင်းတို့အိမ်မှ ကိုယ်ဝန်လွယ်ထားသော ကျွဲမကြီးက အချိန်တန်၍ မွေးလာသောအခါတွင် ကျွဲထီးကလေး မွေးလာလေသည်။ အ်ိပ်မက်ပေးပြီး ခုရက်အကွာတွင် မွေးသည်ဟု ဆိုသည်။ မွေးသည့် ခုနှစ် လ ရက်မှာ ၁၃၅၇-ခုနှစ်၊ တော်သလင်းလပြည့်ကျော် ၂-ရက်နေ့ဖြစ်သည်။ ယခုအခါတွင် ၅-လသားအရွယ် ရောက်နေသော ကျွဲကလေးမှာ ဘိုးသိန်းဟုခေါ်လျှင် ခေါင်းထောင်၍ကြည့်သည်။ နားလည်သည်ဟု ဆိုသည်။

ဖခင်ဖြစ်သူ ကြွေးယူလာသောငွေဖြင့် ၀ိုင်း၍စားသောက်ခဲ့ကြသော ကျန်ရစ်သူ သားသမီးများမှာ ဖခင်ဖြစ်သူ ကျွဲဘ၀ရောက်နေမှန်းလဲ မသိကြ။ ဖခင်အပေါ် တင်ရှိနေခဲ့သော ကြွေးကိုလည်း ဆပ်ရမှန်းမသိကြပါ။ ဖခင်ဖြစ်သူ ဘိုးသိန်းသာ ကျန်ရှိသည့်ကြွေးကို ကျွဲဘ၀ဖြင့် ဆပ်ရပေတော့မည်။ ကြွေးယူခဲ့စဉ်က စားတော့ အများ၊ ခံရတော့ ကြွေးယူခဲ့သူ တယောက်တည်း။ ဘိုးသိန်းအဖြစ်ကား တွေးကြည့်လျှင် ရင်နာဖို့ ကောင်းလှ၏။

စာရေးသူငယ်စဉ်က လူကြီးသူမများ၏ ပြောစကားကို ကြားခဲ့ဖူးပါသည်။ သူများကြွေးကိုယူပြီး ပြန်မဆပ်ရင် ကျွဲ-နွားဖြစ်ပြီး ဆပ်ရတတ်တယ်-ဟု ထိုသို့လူကြီးသူမများ ပြောခဲ့သောစကားသည် ယခုကိုယ်တွေ့မျက်မြင် ဖြစ်နေပါပြီ။ စာရေးသူ၏ မျက်စိအာရုံထဲတွင် ဦးဗလ-ဒေါ်လှဝင်း တို့၏ ယာတောစပ် တဲနားတွင် ကျွဲမကြီးနောက် တကောက်ကောက် လိုက်၍ ခုန်ပေါက်ပြေးလွှား ဆော့ကစားလျက် မြက်စားနေသည့် ဘိုးသိန်းတဖြစ်လဲ ကြွေးဆပ်မည့် ကျွဲကလေးကိုသာ မြင်ယောင်နေမိပါတော့သည်။

( တသက်လှ-ပခုက္ကူ )
********************************************************************************

( အန္တရာယ်ကင်းသူ )

အသံတချက်ချက် မြည်နေသော တိုင်ကပ်နာရီမှာ ညနေ ၄-နာရီကို ညွှန်ပြနေပါသည်။
ကုန်ပဒေသာဆိုင်မှ အရောင်းစာရေးများ တဦးပြီးတဦး ပြန်သွားကြပါပြီ။ ဆိုင်တာဝန်ခံ ဦးကျော်ကျော်နှင့် ဦးသောင်းတင်တို့မှာမူ မပြန်နိုင်သေးချေ။ စာရင်းဇယားမှအစ ဆိုင်လုံခြုံရေးအတွက်ပါ ကြည့်ရှုစစ်ဆေး နေကြသည်။ ထိုစဉ် ရုတ်တရက် မိုးရွာလိုက်သောကြောင့် နှစ်ယောက်စလုံး မပြန်နိုင်သေးဘဲ ဆိုင်းအတွင်း ပြန်ထိုင်နေလိုက်ရသည်။

ဦးကျော်ကျော်မှာ ဘုရား တရားကို အလွန်ကြည်ညိုသူဖြစ်သည်။ ထို့ကြောင့် အိမ်အပြန် မည်မျှပင် မိုးချုပ်စေကာမူ ဓာရဏပရိတ်တော်ကို ရွတ်ဆိုမြဲ ဖြစ်သည်။ အချို့နေ့ဆိုလျှင် ည ၁၀-နာရီ၊ ၁၁-နာရီခန့်မှ အိမ်ပြန်ရသည်။ သို့သော် ဓာရဏပရိတ် ရွတ်ဆိုမှုကိုမူ အပျက်မခံဘဲ ရွတ်ဆိုမြဲ ရွတ်သည်။

ယနေ့လည်း မိုးရွာနေစဉ် ဦးကျော်ကျော်သည် ရုံးခန်းတွင်ထိုင်၍ ဓာရဏပရိတ်ကို ရွတ်ဆိုနေပါသည်။ ရွတ်ပြီးသောအခါ ရုံးခန်းတွင် မှောင်နေသောကြောင့် အရောင်းခန်းမဘက် ထွက်ခဲ့ပါသည်။
ဦးကျော်ကျော် အရောင်းခန်းမသို့အထွက် ခြေလှမ်း သုံးလေးလှမ်းမျှသာ လှမ်းလိုက်ရသေးသည်။ လေပြင်းတချက်တိုက်သံနှင့်အတူ ၀ုန်း-ဟူသော အသံကြီးကို ကြားလိုက်ရသည်။ ထို့ကြောင့် ဦးကျော်ကျော်ရော ဦးသောင်းတင်ပါ မီးထွန်းပြီး ရုံးခန်းထဲ ၀င်ကြည့်လိုက်ရာ နှစ်ဦးစလုံး အံ့သြတုန်လှုပ်သွားပါသည်။

အဘယ်ကြောင့်ဆိုသော် လွန်ခဲ့သော မိနစ်ပိုင်းက ဦးကျော်ကျော်ထိုင်ခဲ့သော ထိုင်ခုံပေါ်သို့ ဆွေးနေသော ထုပ်တန်းကြီးတချောင်း အမိုးပေါ်မှ ပြုတ်ကျခြင်းဖြစ်သည်။ အမြင့်မှ ပြုတ်ကျသောအရှိန်ကြောင့် ထိုင်ခုံလည်း နှစ်ပိုင်းကျိုးသွားသည်။

ကိုကျော်၊ သိပ်ကံကောင်းတယ်ဗျာ၊ ခင်ဗျားသာ ထမလာဘဲ ခဏလောက် ဆက်ထိုင်နေရင် မလွယ်ဘူး-ဟု ဦးသောင်းတင်က ပြောပါသည်။ ဦးကျော်ကျော်၏ စိတ်တွင်လည်း ဘုရားကို အာရုံပြုရွတ်ဆိုသော ဓာရဏပရိတ်၏ ဂုဏ်ကျေးဇူးကြောင့် အသက်ဘေးမှ ကင်းလွတ်သည်ဟု ယုံကြည်ယူဆပါသည်။

( မြတ်-နောင်ချို )

( မြတ်မင်္ဂလာ ၁၉၉၆-ခု ဒီဇင်ဘာလ )

Posted by: mingala at 12:19 PM